- ઓડિશા, આંધ્રપ્રદેશ અને પશ્ચિમ બંગાળના દરિયા કિનારે ટકરાશે જવાદ
- વાવાઝોડમાં 100 કિમી પ્રતિ કલાકની ઝડપે ફૂંકાશે પવન
- શ્રીકાકુલમ,વિજયનગર, અને વિશાખાપટ્ટનમથી 54,028 લોકોનું સ્થળાંતર
ઓડિશા, આંધ્રપ્રદેશ અને પશ્ચિમ બંગાળના દરિયા કિનારે ટકરાશે જવાદ
બંગાળની ખાડીમાં સર્જાયેલું ચક્રવાત જવાદ શનિવારે ઉત્તરી આંધ્રપ્રદેશ અને દક્ષિણ ઓડિશામાં ત્રાટકી શકે છે. આવી સ્થિતિમાં, નુકસાનના જોખમને ધ્યાનમાં રાખીને સરકારે, નેવી, NDRF અને SDRFની ટીમોને બચાવ કાર્યમાં તૈનાત કરવામાં આવી છે. IMDએ જણાવ્યું હતું કે શુક્રવારે બપોર સુધીમાં જવાદ ચક્રવાતમાં તીવ્ર બન્યો હતો. ચક્રવાતને કારણે, શનિવારે ઉત્તર તટીય આંધ્ર પ્રદેશ અને તેની નજીકના દક્ષિણ કોસ્ટલ ઓડિશામાં વરસાદની તીવ્રતા વધવાની આશંકા છે.
વાવાઝોડાના પગલે અત્યાર સુધીમાં 54,028 લોકોને સુરક્ષિત સ્થાને ખસેડાયા
આંધ્રપ્રદેશમાં ચક્રવાત જવાદને જોતા ત્રણ જિલ્લામાં NDRFની 11 ટીમો, SDRFની 5 ટીમો, કોસ્ટ ગાર્ડની 6 ટીમો અને મરીન પોલીસની 10 ટીમો તૈનાત કરવામાં આવી છે. વિશાખાપટ્ટનમ, વિઝિયાનાગ્રામ અને શ્રીકાકુલમમાંથી 54,008 લોકોને સુરક્ષિત સ્થળોએ ખસેડવામાં આવ્યા છે.
અગામી 12 કલાકમાં જવાદ નબળો પડે તેવી સંભાવના - હવામાન વિભાગ
હવામાન વિભાગે શનિવારે એવી પણ માહિતી આપી છે કે આગામી 12 કલાકમાં ચક્રવાત જવાદ નબળો પડવાની સંભાવના છે. આ દરમિયાન તે ઉત્તર તરફ આગળ વધે તેવી શક્યતા છે. ત્યારપછી, તે ઉત્તર-ઉત્તરપૂર્વ તરફ ઓડિશાના કિનારા તરફ આગળ વધશે અને 5 ડિસેમ્બરની સાંજ સુધીમાં પુરીની નજીક જશે. તે પછી તે નબળી પડી શકે છે અને ઉત્તર-ઉત્તર પૂર્વ તરફ પશ્ચિમ બંગાળ તરફ આગળ વધી શકે છે. હવામાન વિભાગે માહિતી આપી છે કે ચક્રવાત જવાદ હાલ પશ્ચિમ મધ્ય બંગાળની ખાડીમાં હાજર છે. તે વિશાખાપટ્ટનમથી 230 કિમી દક્ષિણપૂર્વમાં, ગોપાલપુરથી 340 કિમી દક્ષિણે, પુરીથી 410 કિમી દક્ષિણ-દક્ષિણપશ્ચિમ અને પારાદીપથી 490 કિમી દક્ષિણ-દક્ષિણપશ્ચિમમાં છે.
જવાદ ચક્રવાતને કારણે લગભગ 150 ટ્રેનો રદ કરવામાં આવી
જવાદ ચક્રવાતને કારણે રેલ વ્યવહાર પણ પ્રભાવિત થઈ રહ્યો છે. રેલવે દ્વારા જણાવવામાં આવ્યું છે કે જવાદ ચક્રવાતને કારણે લગભગ 150 ટ્રેનો રદ કરવામાં આવી છે. આ ચક્રવાત ઓડિશા, પશ્ચિમ બંગાળ અને આંધ્રપ્રદેશને અસર કરી રહ્યું છે.
જવાદ ચક્રવાતને કારણે આજે ઓડિશામાં તમામ શાળાઓ બંઘ કરાઈ
ચક્રવાત જવાદના ખતરાને જોતા ઓડિશામાં આજે શાળાઓ બંધ છે. તમામ સરકારી અધિકારીઓ અને કર્મચારીઓની રજાઓ પણ રદ કરવામાં આવી છે.ઓડિશામાં ચક્રવાત જાવાદની અસર દરિયાકાંઠાના વિસ્તારોમાં વધુ જોવા મળી શકે છે, તેથી ગોપાલપુર, પુરી, પારાદીપ, ધમારા પોર્ટ હાઈ એલર્ટ પર છે. ચક્રવાતની અસરને કારણે દરિયામાં જબરદસ્ત જોરદાર મોજા ઉછળશે. તેઓ બંદરને પણ નુકસાન પહોંચાડી શકે છે.
