સાવધાન / હજુ તો ઉત્તરાયણને દોઢ મહિનાની વાર છે, એ પહેલા જ રાજ્યમાં ગળું કપાયાની ઘટનાઓ શરૂ

ઉત્તરાયણના તહેવારને હજુ ઘણા દિવસો બાકી છે. ત્યારે સુરતમાં પતંગની ધારદાર દોરીનો કહેર શરૂ થઈ ગયો છે. ઉત્તરાયણ પહેલા સુરત શહેરમાં વાહન ચાલકોના ગળા કપાવવાનો કિસ્સો સામે આવ્યો છે. જેમાં એક 45 વર્ષીય વ્યક્તિ ગંભીર રીતે ઇજાગ્રસ્ત થયા છે. જેઓ લોહીલુહાણ હાલતમાં બ્રિજ પર જ પડી જતા રાહદારીઓ તાત્કાલીક તેઓની મદદે આવ્યા હતા. અને તેઓને સારવાર અર્થે સિવિલ હોસ્પિટલ સારવાર અર્થે ખસેડવામાં આવ્યા હતા.

સુત્રો દ્વારા મળતી માહિતી મુજબ યુવકની સ્થિતિ ગંભીર હોવાનું જણાવાયું છે અને તેનું સારવાર હેઠળ રાખવામાં આવ્યું છે. ઉત્તરાયણ પહેલાં જ આવા કિસ્સાઓ સામે આવતાં સુરતમાં ફરી માજા દોરીના ઉપયોગ અંગે ચિંતા વ્યક્ત થઈ રહી છે. સ્થાનિક તંત્ર અને પોલીસ દ્વારા ફરી એકવાર જાહેરમાં અપીલ કરવામાં આવી છે કે પ્રાણઘાતક ચાઇનિઝ માજા દોરીનો ઉપયોગ ન કરે અને સલામતીના નિયમોનું કડક પાલન કરે.

બ્રિજ પર લોકોના ટોળે ટોળા એકઠા થયા

પ્રાપ્ત માહિતી અનુસાર, સુરત શહેરના અડાજણ વિસ્તારમાં આવેલ ભક્તિધામ સોસાયટીમાં રહેતા પશુપતિસિંહ (ઉ.વર્ષ.45) જેઓ મજૂરાગેટ બ્રિજ પરથી પસાર થઈ રહ્યા હતા. ત્યારે અચાનક પતંગની ઘાતક દોરી તેમના ગળા પર વાગી હતી. જેના કારણે તેમને ગળાના ભાગે ગંભીર ઈજા થવા પામી હતી. દોરી વાગતાં વાહન ચાલક પશુપતિસિંહ લોહીલુહાણ હાલતમાં બ્રિજ પર જ પડી ગયા હતા. આ ઘટના બ્રિજ પરથી પસાર થતા અન્ય રાહદારીઓના ધ્યાને આવતા રાહદારીઓ તાત્કાલીક તેઓને સારવાર અર્થે હોસ્પિટલ ખસેડ્યા હતા. અકસ્માત સર્જાતા બ્રિજ પર લોકોના ટોળે ટોળા એકઠા થઈ જવા પામ્યા હતા.

રાહદારીઓએ સારવાર અર્થે ખસેડ્યો

આ બાબતે રાહદારીએ જણાવ્યું હતું કે, મજૂરા ગેડ વિસ્તારના બ્રિજ પરથી પસાર થઈ રહ્યો હતો. ત્યારે ગળું કપાયેલી હાલતમાં એક વ્યક્તિ રોડ પર પડ્યો હતો. અને બ્રિજ પર લોકોના ટોળે ટોળા ઉમટ્યા હતા. જે બાદ તેઓને તાત્કાલીક ધોરણે સારવાર અર્થે નવી સિવિલ હોસ્પિટલ ખાતે ખસેડવામાં આવ્યા હતા.

આ પણ વાંચોઃ આમોદની શમા હોટલમાં ટ્રક ડ્રાઇવરનું હાર્ટ એટેકથી મોત, CCTVમાં ઘટના કેદ

ઉત્તરાયણ પહેલા જ વાહન ચાલકોમાં ભયનો માહોલ

ઉત્તરાયણને હજુ ઘણા દિવસો બાકી છે. ત્યારે સુરતમાં પતંગની દોરીથી ગળું કપાવવાનો પ્રથમ બનાવ બનવા પામ્યો છે. ઉત્તરાયણ પહેલા જ વાહન ચાલકોમાં પતંગની દોરીને લઈ ભયનો માહોલ જોવા મળી રહ્યો છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ