NRI / કેનેડામાં ભારતીય મૂળના યુવક પર જીવલેણ હુમલો, સારવાર દરમિયાન મોત

Canada Firing News: કેનેડાના ટોરોન્ટો શહેરમાં ભારતીય મૂળના એક યુવકની દિવસ દરમિયાન ગોળી મારીને હત્યા કરાયાની ઘટના સામે આવી છે. ખુલ્લા પાર્કિંગ લોટમાં થયેલા ગોળીબારથી સ્થાનિક લોકોમાં ભયનો માહોલ સર્જાયો છે.

આ ગોળીબારની ઘટનામાં મૃત્યુ પામનારની ઓળખ ચંદા કુમાર (ઉંમર 37 વર્ષ) તરીકે કરવામાં આવી છે. તેઓ કર્ણાટકના રહેવાસી હતા અને છેલ્લા લગભગ 6 વર્ષથી કેનેડામાં રોજગાર માટે ગયા હતા અને ત્યાં જોબ કરતાં હતા.

વુડબાઇન શોપિંગ સેન્ટર પાસે બની ઘટના

પ્રાથમિક માહિતી મુજબ આ ઘટના ટોરોન્ટોના વુડબાઇન શોપિંગ સેન્ટર નજીક આવેલા પાર્કિંગ લોટમાં બની હતી. દિવસના સમયે અચાનક વાહન પર નિશાન સાધીને હુમલાખોરોએ અનેક રાઉન્ડ ફાયરિંગ કર્યું હતું.

હુમલાખોરોએ ચંદા કુમારના વાહનને નિશાન બનાવી ગોળીબાર કર્યો હતો. ફાયરિંગ બાદ તેઓ ગંભીર રીતે ઘાયલ હાલતમાં મળી આવ્યા હતા.

હોસ્પિટલમાં સારવાર દરમિયાન મોત

ઘટના બાદ ચંદા કુમારને તાત્કાલિક નજીકની હોસ્પિટલમાં ખસેડવામાં આવ્યા હતા. જ્યાં ડોક્ટરોએ સારવાર શરૂ કરી હતી. જોકે ગંભીર ઈજાઓના કારણે સારવાર દરમિયાન તેમનું મોત થયું હોવાનું હોસ્પિટલ દ્વારા જાહેર કરવામાં આવ્યું છે.

આ પણ વાંચો: અમેરિકાના ઓરેગોનમાં ઇમિગ્રન્ટ્સ સામે કાર્યવાહી પર રોક, ICEની કાર્યવાહી સામે ફેડરલ જજનો હસ્તક્ષેપ

હુમલાખોરોની શોધ અને કારણોની તપાસ ચાલુ

ઘટનાની જાણ થતાં જ સ્થાનિક પોલીસ સ્થળ પર પહોંચી હતી અને આસપાસના CCTV ફૂટેજના આધારે હુમલાખોરોની શોધખોળ શરૂ કરી છે. આ ગોળીબાર પાછળનું કારણ શું હતું તે અંગે પોલીસ દ્વારા તપાસ હાથ ધરવામાં આવી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ