શેરબજાર / ખુલતાં જ બજારમાં જશ્ન, એક ઝાટકે 15 લાખ કરોડની કમાણી, આ 4 કારણો જવાબદાર

Stock Market Update: ઈરાન અને યુનાઇટેડ સ્ટેટ્સ વચ્ચે બે અઠવાડિયાના યુદ્ધવિરામની જાહેરાત બાદ ભારતીય શેરબજારમાં જબરદસ્ત તેજી જોવા મળી છે. નિફ્ટી 850 પોઈન્ટથી વધુ ઉછળી ટ્રેડ કરી રહ્યો છે. જ્યારે સેન્સેક્સમાં લગભગ 3000 પોઈન્ટનો જોરદાર વધારો નોંધાયો છે. સાથે જ નિફ્ટી બેંક પણ 2700 પોઈન્ટથી વધુ ચડી ગયો છે. આ ધમાકેદાર તેજીના કારણે રોકાણકારોને મોટો ફાયદો થયો છે અને માત્ર થોડા જ કલાકોમાં તેમણે કુલ મળીને 15 લાખ કરોડથી વધુની કમાણી કરી છે.

7 એપ્રિલે BSEનું માર્કેટ કેપિટલાઇઝેશન ઘટીને 429.26 લાખ કરોડ સુધી આવી ગયું હતું. પરંતુ આજે તેમાં જોરદાર સુધારો જોવા મળ્યો છે અને 15 લાખ કરોડથી વધુનો વધારો થતાં તે 445 લાખ કરોડને પાર પહોંચી ગયું છે. બપોરે 12 વાગ્યે નિફ્ટી 838 પોઇન્ટના ઉછાળા સાથે 23958 પર ટ્રેડ કરી રહ્યો હતો. જ્યારે સેન્સેક્સ 2843 પોઇન્ટ વધીને 77452 પર પહોંચ્યો હતો. નિષ્ણાતોના મત મુજબ યુદ્ધવિરામની જાહેરાત બાદ બજારમાં મજબૂત તેજીનો માહોલ સર્જાયો છે અને હાલના સ્તરથી તેમાં વધુ 1500 પોઇન્ટ સુધીનો વધારો જોવા મળી શકે છે.

શેરબજારમાં ચાલી રહેલી તેજી વચ્ચે 16માંથી 14 મુખ્ય ક્ષેત્રોમાં વધારો નોંધાયો. જ્યારે આઇટી અને ફાર્મા ક્ષેત્રોમાં થોડી નબળાઈ જોવા મળી. નિફ્ટી સ્મોલકેપ 100 અને નિફ્ટી મિડકેપ 100 સૂચકાંકોમાં આશરે 3.5%નો ઉછાળો નોંધાયો. બીએસઈના ટોચના 30 શેરોમાંથી માત્ર ત્રણ પાવર ગ્રીડ, સન ફાર્મા અને ટેક મહિન્દ્રામાં લગભગ 1% સુધીનો ઘટાડો જોવા મળ્યો. જ્યારે બાકીના 27 શેરોમાં તેજી રહી. ઇન્ડિગોના શેરમાં સૌથી વધુ 10%નો જોરદાર ઉછાળો નોંધાયો. જ્યારે એલ એન્ડ ટી અને બજાજ ફાઇનાન્સના શેરોમાં લગભગ 7% સુધીનો વધારો જોવા મળ્યો.

આ પણ વાંચો: સોના-ચાંદીમાં તોફાની તેજી, બંનેના ભાવમાં તોતિંગ વધારો, જાણો કેટલા વધ્યા

શેરબજારમાં તેજી આવવાના 7 કારણો:

• યુનાઇટેડ સ્ટેટ્સ અને ઇરાન વચ્ચે બે અઠવાડિયાના યુદ્ધવિરામની જાહેરાતથી બજારમાં સકારાત્મક ભાવના ફેલાઈ, જેને યુએસ પ્રમુખ ડોનાલ્ડ ટ્રમ્પે વૈશ્વિક શાંતિ માટે મહત્વપૂર્ણ પગલું ગણાવ્યું.
• યુદ્ધવિરામની જાહેરાત બાદ બ્રેન્ટ ક્રૂડ 13.24% ઘટીને $95 પ્રતિ બેરલ થયું. જેના કારણે ઊર્જા પુરવઠા અંગેની ચિંતાઓ ઓછી થઈ.
• દક્ષિણ કોરિયાનો KOSPI, જાપાનનો નિક્કી 225, શાંઘાઈનો SSE કમ્પોઝિટ અને હોંગકોંગનો હેંગ સેંગ સહિત એશિયન બજારોમાં 3%થી વધુનો જોરદાર ઉછાળો નોંધાયો.
• યુદ્ધવિરામની જાહેરાત બાદ શરૂઆતના કારોબારમાં રૂપિયા યુએસ ડોલર સામે 50 પૈસા મજબૂત બની 92.56 પર ટ્રેડ થયો.
• ભારતીય રિઝર્વ બેંકે વ્યાજ દરો યથાવત રાખતાં બજારમાં સકારાત્મક સંકેત મળ્યો.
• યુદ્ધવિરામની જાહેરાત બાદ રોકાણકારોએ લાર્જ-કેપ અને વેલ્યુ સ્ટોક્સમાં ભારે ખરીદી કરતા તેમાં જોરદાર તેજી જોવા મળી.
• ભારત VIX 5% ઘટીને 19.85 પર પહોંચતા બજારની અસ્થિરતા ઘટી અને તેજી માટે સકારાત્મક સંકેત મળ્યો.

(DISCLAIMER બિઝનેસને લગતો આ આર્ટિકલ ન્યૂઝ આધારિત છે જેમાં રિસ્કનું પ્રમાણ વધુ હોય શકે છે, કોઈ પણ જગ્યાએ રોકાણ કે બિઝનેસને લગતો વહીવટ કરતી વખતે એક વખત માર્કેટ નિષ્ણાંતની સલાહ લેવી જરૂરી છે, vtvgujarati.com કોઈ પણ મુશ્કેલી માટે બંધનકર્તા રહેશે નહીં જેની ખાસ નોંધ લેવી.)

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ