ગુજરાત / મતદાન વગર મહેસાણાની કડી નગરપાલિકામાં ભાજપનો ભગવો લહેરાયો, 22 બેઠક બિનહરીફ મેળવી

સ્થાનિક સ્વરાજ્યની ચૂંટણીને લઈને મતદાન પહેલાં જ રાજકીય સમીકરણોમાં મોટો ફેરફાર જોવા મળી રહ્યો છે. ભારતીય જનતા પાર્ટી (ભાજપ) માટે આ ચૂંટણીમાં શરૂઆતથી જ અનુકૂળ પરિસ્થિતિ ઊભી થઈ છે. કારણ કે પાર્ટીએ અત્યાર સુધીમાં કુલ 47 બેઠકો બિનહરીફ રીતે પોતાના ખાતામાં નોંધાવી છે.

ઉમેદવારી નોંધાવાના છેલ્લાં દિવસે 25 બેઠક ભાજપે મેળવી

ઉમેદવારી નોંધાવાના છેલ્લાં દિવસે પણ ભાજપને નોંધપાત્ર સફળતા મળી હતી. જેમાં 25 બેઠકો પર કોઈ વિરોધી ઉમેદવાર ન હોવાને કારણે જીત નિશ્ચિત થઈ ગઈ હતી. આ પરિણામો ભાજપ માટે સંગઠનાત્મક મજબૂતી અને સ્થાનિક સ્તરે તેની પકડ દર્શાવે છે.

કડી નગરપાલિકામાં ભાજપનો ભગવો લહેરાયો

ખાસ કરીને મહેસાણા જિલ્લાના કડી નગરપાલિકામાં ભાજપનો પ્રભાવ સ્પષ્ટ જોવા મળ્યો છે. અહીં કુલ 22 બેઠકો ભાજપે બિનહરીફ જીતી લીધી છે, જે સ્થાનિક રાજકારણમાં પાર્ટીની મજબૂત સ્થિતિનો પુરાવો છે.

નવસારી જિલ્લામાં ભાજપે 9 બેઠકો બિનહરીફ મેળવી

જિલ્લાવાર જોવામાં આવે તો નવસારી જિલ્લામાં ભાજપે 9 બેઠકો બિનહરીફ મેળવી છે. ખેડા જિલ્લામાં 3 બેઠકો અને કચ્છ જિલ્લામાં 2 બેઠકો પર ભાજપના ઉમેદવારોને કોઈ પડકાર મળ્યો નથી. તાપી જિલ્લામાં 4 બેઠકો પર ભાજપ બિનહરીફ જીત્યું છે, જ્યારે વલસાડ જિલ્લામાં 5 બેઠકો પર પાર્ટીનું પ્રભુત્વ રહ્યું છે. ઉપરાંત, ભરૂચ અને પંચમહાલ જિલ્લામાં પણ એક-એક બેઠક પર ભાજપના ઉમેદવારો બિનહરીફ જાહેર થયા છે.

આ પણ વાંચોઃ ગુજરાતમાં વધુ એક હાઈ પ્રોફાઈલ દારુ પાર્ટી ઝડપાઈ, 18 નબીરાઓ ઝડપાયાં

મતદાન ભાજપે મહત્વપૂર્ણ રાજકીય લીડ મેળવી લીધી

આ રીતે મતદાન પહેલાં જ ભાજપે મહત્વપૂર્ણ રાજકીય લીડ મેળવી લીધી છે. નિષ્ણાતોના મત અનુસાર, બિનહરીફ જીતો માત્ર સંખ્યાબળ જ નહીં, પરંતુ વિરોધ પક્ષોની નબળી સ્થિતિ અને ભાજપની વ્યૂહરચનાની સફળતા પણ દર્શાવે છે. હવે આવનારા મતદાનમાં ભાજપ આ લીડને કેટલી આગળ લઈ જાય છે તે જોવું રસપ્રદ રહેશે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ