જૂનાગઢ / જૂનાગઢના બાટવામાં નગરપાલિકાના ભાજપ પ્રમુખ પર પાઈપ વડે હુમલો, કારણ અકબંધ

જૂનાગઢ જિલ્લામાં કાયદો અને વ્યવસ્થાને લઈને એક ચિંતાજનક ઘટના સામે આવી છે. બાટવા નગરપાલિકાના પ્રમુખ સુનિલ જેઠવાણી પર જાહેર રસ્તા પર અસામાજિક તત્વોએ પાઈપ વડે હુમલો કર્યો હોવાની માહિતી મળી છે. આ ઘટનાએ સ્થાનિક રાજકીય અને પ્રશાસનિક વર્તુળોમાં ચકચાર મચાવી છે.

પ્રાથમિક માહિતી મુજબ, સુનિલ જેઠવાણી પર આ હુમલો ત્યારે થયો જ્યારે તેઓ જાહેર માર્ગ પરથી પસાર થઈ રહ્યા હતા. અચાનક કેટલાક અજાણ્યા શખ્સોએ તેમને નિશાન બનાવી હુમલો કર્યો. હુમલામાં તેઓને ઇજાઓ પહોંચી હોવાની વિગતો મળી રહી છે, જોકે તેમની હાલત સ્થિર હોવાનું કહેવાય છે.

આ ઘટના પછી જૂનાગઢ પોલીસની કામગીરી સામે પ્રશ્નો ઉઠી રહ્યા છે. જાહેર સ્થળે એક ચૂંટાયેલા પ્રતિનિધિ પર હુમલો થવો કાયદો અને વ્યવસ્થાની સ્થિતિ અંગે ગંભીર ચિંતા ઉભી કરે છે. સ્થાનિક લોકો અને રાજકીય આગેવાનો દ્વારા ઘટનાની કડક નિંદા કરવામાં આવી છે અને આરોપીઓને ઝડપથી પકડવાની માંગ ઉઠી છે.

આ પણ વાંચોઃ અમદાવાદમાં ચાલુ વીડિયો કોલ પર યુવકે કેનાલમાં ઝંપલાવ્યું, ગર્લફ્રેન્ડના પિતાની ધમકીઓથી કંટાળી કર્યો આપઘાત

હાલમાં, પોલીસ દ્વારા કેસ નોંધવામાં આવ્યો છે અને આરોપીઓને ઝડપી લેવા માટે તજવીજ શરૂ કરવામાં આવી છે. હુમલાનું ચોક્કસ કારણ હજી સ્પષ્ટ થયું નથી, જેના કારણે વિવિધ અટકળો પણ ચાલી રહી છે. પોલીસે તપાસનો દોર તેજ કર્યો છે અને નજીકના CCTV ફૂટેજ સહિતના પુરાવાઓ એકત્રિત કરવામાં આવી રહ્યા છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ