ઉડાઉ જવાબ / બનાસકાંઠામાં એક જ દિવસમાં બે કેનાલોમાં 20 અને 40 ફૂટનાં ગાબડાં, અધિકારીઓએ કહ્યું- ખેડૂતો જવાબદાર

• મુખ્ય ઇજનેરે ગાબડા માટે ખેડૂતોને ગણાવ્યા જવાબદાર
• જાનાવાડા માઇનોર કેનાલમાં 40 ફૂટનું ગાબડું
• વાવના ઢેરિયાના ગામની કેનાલમાં 20 ફૂટનું ગાબડું

રાજ્યમાં નર્મદા કેનાલમાં ગાબડા પડવાનો સિલસિલો યથાવત છે. બનાસકાંઠામાં એક જ દિવસમાં બે કેનાલોમાં ગાબડાં પડવાની ઘટના સામે આવી છે. એક તો સનેસડા ગામે જાનાવાડા માઇનોર કેનાલમાં ગાબડું પડ્યું છે. માઇનોર કેનાલમાં 40 ફૂટનું ગાબડું પડ્યું છે. તો બીજી તરફ વાવના ઢેરિયા ગામની કેનાલમાં ફરી એક વખત ગાબડું પડ્યું છે. રાણેછા ડિસ્ટ્રીબ્યુટર કેનાલમાં 20 ફૂટનું ગાબડું પડ્યું છે. કેનાલોમાં ગાબડા પડતા કેનાલોની કામગીરીને લઇ તંત્ર સામે સવાલ ઉભા થયા છે. તો કેનાલનું પાણી ખેતરમાં ફરી વળતા ખેડૂતોમાં પણ રોષ જોવા મળી રહ્યો છે. તંત્ર દ્વારા નક્કર કામગીરી ન કરતા ખેડૂતો રોષે ભરાયા છે. વારંવાર કેનાલમાં ગાબડાં પડતા ખેડૂતો પરેશાન થઇ ગયા છે.

મુખ્ય ઇજનેરે ગાબડા માટે ખેડૂતોને ગણાવ્યા જવાબદાર

કેનાલમાં ગાબડા પડવા મામલે મુખ્ય ઇજનેરે ઉડાઉ જવાબ આપ્યો હતો. ધારાસભ્ય ગેનીબેનની રજૂઆત બાદ નર્મદા વિભાગના મુખ્ય ઇજનેર કે.આર.પરીખે ઉડાઉ જવાબ આપ્યો હતો. તેમણે જણાવ્યું કે, પાણી ખેચવા માટે લગાવેલા પંપો એકસાથે બંધ થાય છે. એકસાથે પંપ બંધ થતા કેનાલ ઓવરફ્લો થાય છે. બનાસકાંઠામાં માત્ર 44 ગાબડા જ પડ્યા છે. ભંગાણથી ફક્ત 15 ખેડૂતોને નુકસાન થયું છે. 

રાત્રે ખેડૂતો એક સાથે પાણી ખેચવાનું બંધ કરે છેઃ ડે.એન્જિનિયર

બનાસકાંઠામાં કેનાલોમાં ગાબડા પડવા મામલે હવે અધિકારીઓએ દોષનો ટોપલો ખેડૂતો પર ઢોળ્યો છે. આ મુદ્દે ડે.એન્જિનિયર એચ.બી.રાણાએ કહ્યું કે, રાત્રે ખેડૂતો એક સાથે પાણી ખેચવાનું બંધ કરે છે. જેના કારણે પાણીનું લેવલ વધતા કેનાલો ઓવરફ્લો થાય છે. આ ઉપરાંત લીલના કારણે પણ કેનાલમાં પાણીનું લેવલ વધતું હોવાનો અધિકારીએ દાવો કર્યો છે.

ભાજપના જ મળતિયાને કોન્ટ્રાક્ટ અપાય છેઃ કોંગ્રેસ

તો સમગ્ર મામલે કોંગ્રેસના ધારાસભ્ય ગેનીબેન ઠાકોરે સરકાર પર આક્ષેપ કર્યા હતા. તેમણે જણાવ્યું કે, ભાજપના મળતિયા કોન્ટ્રાક્ટરોને કોન્ટ્રાક્ટ અપાયા છે. ભાજપના મળતિયા હોવાથી કોન્ટ્રાક્ટરોને બ્લેક લિસ્ટમાં નથી મુકવામાં આવતા.

વારંવાર કેનાલોમાં પડતા ગાબડાંને લઇને ખેડૂત સતત મુશ્કેલીનો સામનો કરે છે. ત્યારે આ મુદ્દાને લઇને મહામંથન કરવામાં આવ્યું હતું.