શહેરી કોટડા / કારનો દરવાજો ખખડાવ્યો પછી બંદૂક કાઢીને ધડાધડ ફાયરિંગ: અમદાવાદમાં શૉકિંગ ઘટના

• શહેર કોટડામાં ફાયરિંગની ચોંકાવનારી ઘટના
• લૂંટનાં ઈરાદે જ્વેલર પર 2 રાઉન્ડ ફાયરિંગનો મામલો
• પોલીસે તાત્કાલિક 3 આરોપીઓની કરી અટકાયત

અમદાવાદનાં શહેર કોટડામાં જ્વેલર્સના વેપારીની કાર પર ત્રણ શખ્સોએ લૂંટના ઇરાદે બે રાઉન્ડ ફાયરિંગ કરી. જેમાં એક રાઉન્ડ ફાયરિંગ કરીને કાર ઉભી રાખવાનો પ્રયાસ કર્યો હતો પરંતુ  વેપારીએ કાર હંકારી મૂકી જેથી બાદમાં બીજું ફાયરિંગ ટાયર પર કર્યુ હતું. પરંતુ વેપારીએ કાર ન રોકતા ત્રણેય શખ્સો બાઇક લઇને ભાગી ગયાં હતા. 

નિલેશભાઈ દલાલની કાર પર ફાયરિંગ
નારણપુરામાં રહેતા નિલેશભાઇ દલાલ નિકોલમાં માંગલીક ગોલ્ડના નામથી સોના-ચાંદીના દાગીના વેચવાનો ધંધો કરે છે. 6 ફ્રેબ્રુઆરીએ સવારના સમયે તેઓ પોતાના ધંધા પર  આવ્યા હતા અને રાત્રીના સમયે ગાડી લઇને ઘરે પરત જતા હતા. ત્યારે બાપુનગર શ્યામ શિખર ચાર રસ્તા થઇને અનિલસ્ટાર્ચ મિલ પાસેથી પસાર થતા હતા ત્યારે  મિત્રનો ફોન આવતા તેમણે ગાડી રોકી હતી. આ દરમિયાન એક અજાણ્યો શખ્સ આવ્યો અને તેણે કારનો દરવાજો ખખડાવ્યો હતો. જે બાદ શખ્સે ગાડીની આગળ  આવીને કાચ પર બંદૂકથી ફાયરિંગ કર્યુ હતું. જેથી નિલેશભાઇ ગભરાઇને ત્યાંથી કારમાં જ ભાગી ગયા હતા. જે બાદ શખ્સે તેના બે સાગરિતો સાથે મળીને નિલેશભાઇનો બાઇક પર પીછો કરીને રોકવાનો  પ્રયાસ કર્યો હતો. પરંતુ તેમણે કાર રોકી ન હતી. જે બાદ સરસપુર સીટી ગોલ્ડ સિનેમા પાસે શખ્સોએ ફરીથી કારના ટાયર પર ફયરિંગ કર્યુ હતુ. જે બાદ ત્રણેય શખ્સો ચામુંડા બ્રિજ તરફ નાસી  ગયા હતા.

પોલીસને તાત્કાલિક કર્યો ફોન
ફાયરિંગની ઘટનાથી ગભરાયેલા નિલેશભાઇએ પોલીસને ફોન કરતા પોલીસનો કાફ્લો ઘટનાસ્થળે પહોંચ્યો હતો. પોલીસ તપાસમાં લૂંટ કરવાના ઇરાદે ફાયરિંગ કર્યુ હોવાની આશંકા સેવાઇ રહી છે. આ અંગે  નિલેશભાઇએ શહેર કોટડા પોલીસ સ્ટેશનમાં અજાણ્યા ત્રણ શખ્સો સામે ફરિયાદ નોંધાવતા પોલીસે આસપાસના સીસીટીવી ફુટેજના આધારે તપાસ શરૂ કરી છે. તપાસમાં સામે આવ્યું કે લૂંટના પ્રયાસ કરવા માટે જે બાઇકનો ઉપયોગ કર્યો  હતો તે ચોરીની છે . શહેરકોટડા પોલીસ અને ક્રાઇમ બ્રાન્ચની જુદી જુદી ટીમોએ CCTV ફુટેજના આધારે આરોપીની શોધખોળ શરૂ કરી હતી.જેમાં 3 શકાસ્પદ લોકોની અટકાયત કરી છે .

વધુ વાંચો: PM મોદી ગુજરાતનાં CM બન્યા પછી તેમની જ્ઞાતિને OBC કરાઇ? રાહુલ ગાંધીના આરોપ પર ભાજપે જુઓ શું કહ્યું

મોરે ગેંગનું કનેક્શન
ફાયરિંગ અને લૂંટ પ્રયાસનાં આ કેસમાં મોરેના ગેંગનું કનેક્શન ખુલ્યું છે . જેને લઈને ક્રાઇમ બ્રાન્ચની ટીમ  મુખ્ય સૂત્રધારને પકડવા રવાના થઈ છે. હાલમાં શહેર કોટડા પોલીસે ગુનો નોંધી તપાસ શરૂ કરી.