બિઝનેસ / અમેરિકાનો એક નિર્ણય, અને ભારતમાં ચાંદી પહોંચ્યું 2 લાખને નજીક!

Gold Rate: અમેરિકી ફેડરલ રિઝર્વે વ્યાજ રેટમાં ઘટાડો કર્યો છે. ફેડરલ રિઝર્વે સતત ત્રીજી વખત વ્યાજ દર ઘટાડ્યા છે. આ નિર્ણયથી યુએસમાં લોન સસ્તી થશે, પરંતુ તેની અસરથી ભારતમાં સોના અને ચાંદીના ભાવ આસમાને પહોંચી ગયા છે. યુએસના નિર્ણય બાદ ભારતમાં ચાંદીનો ભાવ પ્રતિ કિલોગ્રામ ₹1.88 લાખને વટાવી ગયો, જ્યારે સોનાનો ભાવ ₹1.28 લાખને વટાવી ગયો.

ભારતમાં આજના સોના અને ચાંદીના ભાવ

ગુરુવારે સોના અને ચાંદીના ભાવમાં ભારે વધારો જોવા મળ્યો હતો, જેના કારણે સોનાનો ભાવ પ્રતિ 10 ગ્રામ ₹1.28 લાખ અને ચાંદીનો ભાવ પ્રતિ કિલો ₹1.88 લાખને વટાવી ગયો હતો. ઈન્ડિયા બુલિયન જ્વેલર્સ એસોસિએશનના જણાવ્યા અનુસાર, 24 કેરેટ સોનાના 10 ગ્રામનો ભાવ ₹808 વધીને ₹1,28,596 થયો છે, જે પ્રતિ 10 ગ્રામ ₹1,27,788 થી વધીને ₹1,28,596 થયો છે.

22 કેરેટથી 18 કેરેટ સુધીના સોનાનો ભાવ

22 કેરેટ સોનાનો ભાવ પ્રતિ 10 ગ્રામ વધીને ₹117,794 થયો છે, જે અગાઉ પ્રતિ 10 ગ્રામ ₹117,054 હતો. 18 કેરેટ સોનાનો ભાવ પ્રતિ 10 ગ્રામ ₹95,841 થી વધીને ₹96,447 થયો છે.

ચાંદી 2 લાખની નજીક પહોંચી

સોના કરતાં ચાંદીના ભાવમાં તીવ્ર ઉછાળો જોવા મળ્યો છે. છેલ્લા 24 કલાકમાં ચાંદીના ભાવ 2,793 રૂપિયા વધીને 1,88,281 રૂપિયા પ્રતિ કિલોગ્રામના સર્વકાલીન ઉચ્ચ સ્તરે પહોંચી ગયા છે, જે અગાઉ 1,85,488 રૂપિયા પ્રતિ કિલોગ્રામ હતા. હાજર બજારની સાથે, વાયદા બજારમાં પણ સોના અને ચાંદીના ભાવમાં વધારો જોવા મળ્યો છે. 5 ફેબ્રુઆરી, 2026 ના સોનાના કોન્ટ્રેક્ટનો ભાવ 0.68 ટકા વધીને 1,30,680 રૂપિયા અને 5 માર્ચ, 2026 ના ચાંદીના કોન્ટ્રેક્ટનો ભાવ 2.43 ટકા વધીને 1,93,317 રૂપિયા થયો છે.

ઈન્ટરનેશનલ બજારમાં સોનાનો ભાવ

આંતરરાષ્ટ્રીય બજારમાં પણ સોના અને ચાંદીમાં વધારો જોવા મળી રહ્યો છે. સોનું 0.51 ટકાના વધારા સાથે 4,246.75 ડોલર પ્રતિ ઔંસ અને ચાંદી 2.53 ટકાના વધારા સાથે 62.59 ડોલર પ્રતિ ઔંસ પર હતું.

વધુ વાંચો: PM મોદીએ ઘૂમાવ્યો ડોનાલ્ડ ટ્રમ્પને ફોન, જુઓ કયા-કયા મુદ્દાઓ પર થઇ વાતચીત?

સોના અને ચાંદીના ભાવ વધવાના કારણો

એક્સપર્ટના મતમુજબ યુએસ વ્યાજ દરોમાં 25 બેસિસ પોઇન્ટનો ઘટાડો 3.50 ટકાથી 3.75 ટકા કરવાથી કિંમતી ધાતુઓમાં તેજીનો માર્ગ મોકળો થયો છે. નીચા વ્યાજ દરો સોના અને ચાંદીને રાખવાનો ખર્ચ ઘટાડે છે અને નવા રોકાણને આકર્ષિત કરે છે. વધુમાં, વ્યાજ દરમાં ઘટાડા પછી યુએસ ડોલરના નબળા પડવાથી સોના અને ચાંદીના ભાવને વધુ ટેકો મળ્યો છે, જેના કારણે વૈશ્વિક ખરીદદારો માટે આ ધાતુઓ વધુ પોસાય તેવી બની છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ