વિદેશ પ્રવાસ / PM મોદી આર્જેન્ટિનાના પ્રવાસે, કરશે દ્વિપક્ષીય વાર્તાલાપ, ચર્ચાશે આ વિવિધ મુદ્દા

PM નરેન્દ્ર મોદી ત્રિનિદાદ અને ટોબેગોથી બે દિવસની સફળ મુલાકાત પૂરી કર્યા પછી હવે પોતાના પાંચ દેશના પ્રવાસના ત્રીજા તબક્કે આર્જેન્ટિના પહોંચ્યા છે. તેઓ બ્યુનોસ આયર્સ ખાતે મોડી સાંજે પહોંચ્યા હતા, જ્યાં ભારતીય સમુદાયે તેમનું ઉષ્માભર્યું સ્વાગત કર્યું હતું. ભારતીય રાજદૂત અજનીશ કુમારે આ મુલાકાતને ઐતિહાસિક ગણાવી હતી, કારણ કે છેલ્લા 50 વર્ષમાં કોઈ પણ ભારતીય વડાપ્રધાનની આર્જેન્ટિનાની આ પ્રથમ દ્વિપક્ષીય મુલાકાત છે.

આઝાદીના પિતા સમાન આર્જેન્ટિનાના રાષ્ટ્રપિતા જનરલ જોસ ડી સાન માર્ટિનને PM મોદીએ પ્લાઝા ડી સાન માર્ટિન ખાતે શ્રદ્ધાંજલિ આપી. આ પ્રસંગે આર્જેન્ટિનાના વિદેશ મંત્રી પણ તેમની સાથે હાજર રહ્યા હતા. ત્યારબાદ PM મોદીએ આર્જેન્ટિનાના રાષ્ટ્રપતિ જેવિયર મિલી સાથે સત્તાવાર વાતચીત કરી હતી. વાતચીત બાદ રાષ્ટ્રપતિ મિલીએ વડા પ્રધાન મોદીના માનમાં ભોજનનું આયોજન કર્યું હતું. PM મોદીએ પછી આર્જેન્ટિનાના લોકપ્રિય બોકા જુનિયર્સ ફૂટબોલ સ્ટેડિયમની મુલાકાત લીધી અને ફૂટબોલ સંસ્કૃતિને નજીકથી અનુભવ્યો.

મુલાકાત બાદ સંબંધો બનશે મજબૂત

આ મુલાકાત ભારત અને આર્જેન્ટિના વચ્ચેના દ્વિપક્ષીય અને વ્યૂહાત્મક સંબંધોને મજબૂત બનાવવાનું કામ કરશે. ભારત અને આર્જેન્ટિના 2019થી વ્યૂહાત્મક ભાગીદારીમાં જોડાયેલા છે. પૂર્વમાં બ્રાઝિલમાં G20 સમિટ દરમિયાન પણ બંને નેતાઓ વચ્ચે મીટીંગ થઈ હતી. બંને દેશો વચ્ચે ઊર્જા, કૃષિ, ખાણકામ, નવીનીકરણીય ઊર્જા, ટુ-વ્હીલર, દવાઓ અને આરોગ્ય સેવાઓ જેવા ક્ષેત્રોમાં સહકાર વધારવા પર ચર્ચા થઈ રહી છે.

ભારતને વિશ્વની "ફાર્મસી"

ભારતીય દવાઓ અને તબીબી સાધનો માટે પણ આર્જેન્ટિનામાં ઘણો અવકાશ છે. રાજદૂત કુમાર જણાવે છે કે ભારતને વિશ્વની “ફાર્મસી” તરીકે ઓળખવામાં આવે છે અને તેના તબીબી ઉપકરણો અમેરિકન અને યુરોપિયન બજારમાં લોકપ્રિય છે. હવે આર્જેન્ટિનામાં પણ તેઓ આઉટરીચ વધારવાનો પ્રયત્ન કરશે.

છેલ્લા 20 વર્ષમાં સૌથી મહત્વપૂર્ણ

આર્જેન્ટિનાની ખાદ્ય તેલ સંગઠન CIARAના પ્રમુખ ગુસ્તાવો ઇડિગોરાસે PM મોદીની આ મુલાકાતને છેલ્લા 20 વર્ષમાં સૌથી મહત્વપૂર્ણ ગણાવી. તેમણે જણાવ્યું કે આર્જેન્ટિના ભારત સાથે વ્યાપારિક અને આર્થિક નાતાને વધારે મજબૂત કરવા ઈચ્છે છે. હાલ $5 બિલિયનના દ્વિપક્ષીય વેપારને આગામી 3-4 વર્ષમાં વધારીને $8 બિલિયન કરવાનું લક્ષ્ય છે.

આ પણ વાંચો : અમદાવાદમાં નાગરવેલ હનુમાનજીનું મંદિર, અહમદશાહ બાદશાહ સાથે જોડાયેલો છે ઈતિહાસ

ખનિજોની સમૃદ્ધતા

આર્જેન્ટિનામાં લિથિયમ, તાંબુ અને દુર્લભ ખનિજોની સમૃદ્ધતા છે જે ભારત માટે અત્યંત ઉપયોગી બની શકે છે, ખાસ કરીને સ્વચ્છ ઊર્જા અને ઔદ્યોગિક વિકાસ માટે. ઓગસ્ટ 2022માં બંને દેશોએ ખનિજ સહયોગ માટે સમજૂતી કરી હતી અને જાન્યુઆરી 2025માં તેની પ્રથમ સંયુક્ત બેઠક પણ યોજાઈ હતી.

બધા જ સમાચાર અને અપડેટ્સ મેળવવા માટે પ્લે સ્ટોર/ એપ સ્ટોર પર જઈને અથવા આ લાઈન પર ક્લિક કરીને ડાઉનલોડ કરો અમારી લેટેસ્ટ એપ