સ્પોર્ટસ / 'આખું ભારત તેનું હકદાર', જીત બાદ વ્હીલચેર પર તિરંગો લપેટી મેદાનમાં એન્ટ્રી મારતી પ્રતિકા રાવલ

ભારતીય મહિલા ક્રિકેટ ટીમે ઈતિહાસ રચ્યો છે — પહેલી વાર ICC મહિલા ODI વર્લ્ડ કપનો ખિતાબ જીત્યો છે. DY પાટિલ સ્ટેડિયમમાં રમાયેલી રોમાંચક ફાઇનલમાં ભારતે દક્ષિણ આફ્રિકાને 52 રનથી પરાજિત કર્યું. પરંતુ આ વિજય પછી એક એવો દ્રશ્ય જોવા મળ્યું, જે દરેકને ભાવુક બનાવી ગયું. ઈજાના કારણે બહાર થઈ ગયેલી પ્રતિકા રાવલ વ્હીલચેરમાં મેદાન પર આવી અને પોતાની ટીમ સાથે આ ઐતિહાસિક જીતની ઉજવણીમાં જોડાઈ.

પ્રતિકા રાવલ આ વર્લ્ડ કપ માટે ભારતીય ટીમની મુખ્ય પસંદગી હતી. તેને ઓપનિંગ બેટ્સમેન તરીકે સામેલ કરવામાં આવી હતી અને શરૂઆતના તબક્કામાં તેણે ઉત્તમ પ્રદર્શન કર્યું હતું. પરંતુ અંતિમ લીગ મેચ દરમિયાન થયેલી ઈજાને કારણે તેને ટૂર્નામેન્ટમાંથી બહાર થવું પડ્યું.

શેફાલીનો ચમકદાર દેખાવ

પ્રતિકાની જગ્યાએ શેફાલી વર્માને ટીમમાં તક મળી. સેમિફાઇનલમાં ઓસ્ટ્રેલિયા સામે તે ફક્ત 10 રન બનાવી શકી હતી, પરંતુ ફાઇનલમાં શેફાલીએ અદભૂત રમત દેખાડતાં 87 રન ફટકાર્યા અને સાથે બે મહત્વપૂર્ણ વિકેટ પણ લીધી.

ફાઇનલ પછી વ્હીલચેરમાં મેદાન પર ઉતરેલી પ્રતિકાએ કહ્યું:

“આ અનુભૂતિ શબ્દોમાં વ્યક્ત કરી શકતી નથી. મારા ખભા પરનો ધ્વજ એ ગૌરવનું પ્રતીક છે. મારી ટીમ સાથે અહીં હોવું અવાસ્તવિક લાગે છે. ઈજાઓ રમતનો ભાગ છે, પણ હું ખુશ છું કે હજી પણ આ ટીમનો હિસ્સો છું. આખું ભારત આ જીતનો હકદાર છે. મેદાનની બહારથી દરેક બોલ જોવો પણ ઘણો કઠિન હતો — દરેક વિકેટ, દરેક બાઉન્ડ્રી મારી સાથે ભાવનાત્મક રીતે જોડાયેલી હતી. અમે ખરેખર તે કરી બતાવ્યું!”

વર્લ્ડ કપની સફર

ભારતએ 30 સપ્ટેમ્બરે શ્રીલંકા સામેની જીત સાથે પોતાના અભિયાનની શરૂઆત કરી. ત્યારબાદ 5 ઓક્ટોબરે પાકિસ્તાન સામે રમાયેલી મેચમાં ભારતે 88 રનથી દમદાર જીત મેળવી.

પરંતુ ત્યાર પછી ટીમને સતત ત્રણ પરાજયોનો સામનો કરવો પડ્યો — પ્રથમ દક્ષિણ આફ્રિકા સામે 3 વિકેટથી, પછી ઓસ્ટ્રેલિયા સામે, અને પછી ઇંગ્લેન્ડ સામે 4 રનથી હાર મળી.

આ પણ વાંચોઃ Women World Cup જીત પર દેશભરમાં ઉજવણી, ‘આ જીત ભવિષ્યના ચેમ્પિયન્સને પ્રેરણા આપશે’ PM મોદી

આ ત્રણ હાર પછી સેમિફાઇનલ સુધી પહોંચવું મુશ્કેલ લાગતું હતું, પરંતુ ટીમે ન્યુઝીલેન્ડ અને બાંગ્લાદેશ સામે જીત મેળવીને સેમિફાઇનલ માટે સ્થાન પકડી લીધું. ત્યારબાદ ભારતે સેમિફાઇનલ અને ફાઇનલ બંનેમાં વિજય હાંસલ કરીને ઇતિહાસ રચે દીધો.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ