ક્રાઈમ / બૈરાને હાથ નીચે રાખવાના તો જ સીધા ચાલે : સાસુ-સસરા પરિણીતાના પતિને ફોન કરીને કહેતા

• પત્નીએ પતિ સામે નોંધાવી પોલીસ ફરિયાદ
• પતિના હતા અન્ય સ્ત્રી સાથે આડા સંબંધો 
• સાસરિયાઓ પતિને ફોન કરીને ચઢાવતા હતા

રાજ્યમાં સ્ત્રીઓ પર વધતા જતા અત્યાચાર હવે એક ચિંતાનો વિષય બન્યો છે. ત્યારે વધુમાં મેગાસીટી અમદાવાદમાં ફરી એક ગંભીર મામલો સામે આવ્યો છે. શહેરના રાણિપ વિસ્તારમાં રહેતી પરિણીતાએ તેના પતિ તેમજ તેના સાસરીયાઓ સામે ફરિયાદ નોંધાવી છે. કારણકે તે લોકો પરિણીતાને અસહ્ય ત્રાસ આપતા હતા. પરંતુ વાત માત્ર ત્રાસ આપવાને લઈને પૂરી નથી થતી. 

2013માં લગ્ન 

31 વર્ષીય પરિણીતા ખાનગી હોસ્પિટલમાં નોકરી કરે છે. તેણીએ 2013માં રાજસ્થનના મનોજ નામના યુવક સાથે લગ્ન કર્યા હતા. તેનું લગ્નજીવન શરૂઆતમાં એક મહિનો બરાબર રહ્યું. પરંતુ બાદમાં તેના સાસરીયાઓએ તેને ત્રાસ આપવાનું શરૂ કર્યું. જેમા તેઓ ઘરકામ બાબતે તેનો વાંક કાઢીને તેને ખરુ ખોટું સંભળાવતા હતા. 

ફોન પર સાસરિયાઓ પતિને ચઢાવતા

સાસરિયાઓના ત્રાસને કારણે પરિણીતાએ અને તેના પતિએ 7 મહિનામાંજ  ઘર છોડી દીધું અને તેઓ પરિણીતાના માતાપિતાના ઘરે રહેવા જતા રહ્યા. પરંતુ તેનો જેઠ અને તેના સાસુ સસરા પતિને ફોન કરીને ચઢાવતા હતા કે બૈરાને હાથ નીચે રાખવા જોઈએ સાથેજ તેને ફોન પર એવું પણ કહેતા હતા કે તારા સસરાને કહેજે કે તેમની સંપત્તિ તેઓ તારા નામે કરે. 

અન્ય સ્ત્રી સાથે પતિના પ્રેમ સંબંધો 

જોકે હદ તો ત્યારે વટી ગઈ કે જ્યારે પત્નીને જાણ થઈ કે તેના પતિના અન્ય સ્ત્રી સાથે આડાસબંધો છે. સાંભળીને તમને નવાઈ લાગશે કે પત્નીને પતિના સંબંધોની જાણ થયા બાદ પતિ લાજ શરમ નેવે મૂકીને તેની પત્નીની સામેજ તેની પ્રેમીકા જોડે બિભત્સ વર્તન કરતો હતો. સાથેજ તે તેની પત્ની સાથે ઝઘડો કરીને તેને માર પણ મારતો હતો અને તેને એવું પણ કહેતો હતો કે મારી પ્રેમીકાને હું નહી છોડી શકું તારાથી થાય એ કરી લે. 

કંટાળીને પરિણીતાએ પોલીસમાં નોંધાવી ફરિયાદ

એક તરફ સાસરિયાઓનો ત્રાસ અને બિજી તરફ પતિના આડા સંબંધોને કારણે પરિણીતાની હાલત એવી થઈ ગઈ હતી કે તે ન તો કોઈને કહી શકે કે ન તો તે સહિ શકે. જેથી કંટાળીને તેણે તેના પતિ તેમજ સાસરિયાઓ સામે પોલીસમાં ફરિયાદ નોંધાવી છે.