- ભ્રૂણ પરીક્ષણ કરાવનાર લોકો ચેતે
- પરીક્ષણના વીડિયો યૂટ્યબ કરનારની સામે કાર્યવાહી
- કેન્દ્રીય સ્વાસ્થ્ય મંત્રાલયે આપી ચેતવણી
જે લોકો યુટ્યુબ પર ગર્ભપરીક્ષણના વીડિયો અપલોડ કરે છે તેમનું હવે આવી બન્યું છે. જો તમે પણ મોટું દેખાડવું આવું કરતાં હોય તો બંધ કરી દેજો નહીંતર દંડાઈ જશો. કેન્દ્રીય આરોગ્ય અને પરિવાર કલ્યાણ મંત્રાલયે યુટ્યુબર્સને નોટિસ મોકલીને તેમની ચેનલ પર અપલોડ કરેલા પ્રિનેટલ સેક્સ-નિર્ધારણના વીડિયોને 36 કલાકની અંદર હટાવવાનો આદેશ આપ્યો છે. જો યુટ્યુબર્સ આવું નહીં કરે તો તેમની સામે કાયદેસરની કાર્યવાહી કરવામાં આવશે અને આવા લોકોને જેલ પણ ભોગવવી પડી શકે છે.
સરકારે યુટ્યુબ પર આવા ચાર હજાર વીડિયોની ઓળખ
સરકારે યુટ્યુબ પર ભ્રૂણ પરીક્ષણના ચાર હજાર વીડિયોની ઓળખ કરી છે. આ તમામ વીડિયોને તાત્કાલિક ડિલિટ કરવાનો આદેશ આપ્યો છે અને જો આવું નહીં કરાય તો કાયદેસરની કાર્યવાહી ઉચ્ચારી છે. મંત્રાલયે લોકોને ભ્રૂણ પરીક્ષણથી દૂર રહેવાની પણ સલાહ આપી છે. પ્રી-કન્સેપ્શન એન્ડ પ્રી-નેટલ ડાયગ્નોસ્ટિક ટેકનિક એક્ટ 1994 (પીસીપીએનડીટી એક્ટ) હેઠળ દેશમાં પ્રિ-નેટલ સેક્સ નિર્ધારણ પર પ્રતિબંધ છે. આ કાયદા હેઠળ નિદાન કેન્દ્રોને નિયમોનું ચુસ્તપણે પાલન કરવાનું કહેવામાં આવે છે. આ કાયદો સ્ત્રી ભ્રૂણ હત્યાને રોકવા અને ભારતમાં ઘટી રહેલા લિંગ પ્રમાણને રોકવા માટે બનાવવામાં આવ્યો હતો.
મંત્રાલય સોશિયલ મીડિયા પર નજર રાખી રહ્યું છે
મંત્રાલયના સચિવ પી.વી.મોહનદાસે જણાવ્યું હતું કે મંત્રાલય આવી વાંધાજનક સામગ્રી માટે નિયમિતપણે સોશિયલ મીડિયા પર નજર રાખી રહ્યું છે. જ્યારે આ વીડિયો અમારા ધ્યાનમાં આવ્યો, ત્યારે અમે સૌ પ્રથમ વાંધાજનક ચેનલોની ઓળખ કરી અને તેમની એક યાદી બનાવી. બાદમાં અમે આવી ચેનલોને વિડિયો દૂર કરવા માટે નોટિસ મોકલી હતી. મોહનદાસે જણાવ્યું હતું કે, આ અગાઉ મંત્રાલયે સર્ચ એન્જિન ગૂગલને પણ આવી વાંધાજનક સામગ્રીને દૂર કરવા જણાવ્યું હતું. મોહનદાસે જણાવ્યું હતું કે, જો કોઈ પણ વ્યક્તિ વેબસાઈટ કે સોશિયલ મીડિયા પ્લેટફોર્મ પર પીસીપીએનડીટી એક્ટનું ઉલ્લંઘન કરતી સામગ્રી જુએ છે, તો તે [email protected] ઈમેલ પર રાજ્ય અથવા મંત્રાલયના નોડલ અધિકારીઓને ફરિયાદ કરી શકે છે.
યુટ્યુબ પર ભ્રૂણ પરીક્ષણ વીડિયોના લાખો વ્યૂઝ
હકીકતમાં, થોડા દિવસો પહેલા, દિલ્હીના રેડિયોલોજિસ્ટ ડો.અનુજ અગ્રવાલને યુટ્યુબ પર એક વીડિયો મળ્યો હતો, જેમાં એઈમ્સ હોસ્પિટલના નર્સિંગ સ્ટાફનો ભાગ હોવાનો દાવો કરવામાં આવ્યો હતો. યુટ્યુબ ચેનલ ગર્ભાવસ્થા, ગર્ભાવસ્થાની ટિપ્સ અને પ્રિનેટલ સેક્સ-નિર્ધારણ તકનીકો પરના વિડિઓઝથી ભરેલી હતી. ચોંકાવનારી વાત એ હતી કે આ વીડિયોને લગભગ સાત લાખ લોકોએ જોયો હતો.
