ચેતીને રહેજો / લોકોનાં જીવ સાથે રમત ક્યાં સુધી? અમદાવાદમાં ફરી ઝડપાયા સ્વાસ્થ્ય સાથે ચેડાં કરનારા ત્રણ બોગસ તબીબ

• અમદાવાદમાં બોગસ તબીબોનો રાફડો ફાટ્યો
• ઓઢવમાં ડિગ્રી વગરના બે ડૉક્ટરનાં દવાખાનાં સીલ
• છેલ્લા એક દાયકાથી ‌ડિગ્રી વગરના મુન્નાભાઇ MBBSનો જમાવડો 

અમદાવાદમાં બોગસ તબીબોનો રાફડો ફાટ્યો હોય તેવું લાગી રહ્યું છે. અમદાવાદ ‌જિલ્લાનાં નાનાં નાનાં ગામડાંમાં છેલ્લા એક દાયકાથી ‌ડિગ્રી વગરના મુન્નાભાઇ એમબીબીએસ પેદા થયા છે, જે પોતાનાં દવાખાનાં ખોલીને બેઠા છે. આ તરફ હવે તંત્ર દ્વારા અમદાવાદના ઓઢવમાં બુધવારે બે ડૉક્ટરના દવાખાના સીલ કરવામાં આવ્યા હોવાનું સામે આવ્યું છે. 

અમદાવાદના ઓઢવ વિસ્તારમાં છેલ્લા કેટલાક સમયથી કોઈપણ પ્રકારની ડિગ્રી વગર જ તબીબી પ્રેક્ટિસ માટે દવાખાના ચલાવતા ડૉક્ટરો સામે કાર્યવાહી કરવામાં આવી છે.  વિગતો મુજબ ઓઢવના ભગવતીનગર ખાતે આવેલા બાલાજી ક્લિનિકમાં એલોપેથી સારવાર ડો.એ.કે.શર્માની પાસે HMBSની ડિગ્રી હોવાનું ખૂલ્યું છે. જોકે નિયમો મુજબ એલોપેથી પ્રેક્ટિસ કરી શકે નહીં, જોકે તપાસ દરમ્યાન તેમના ક્લિનિકમાંથી ઇન્જેક્શન સહિતની એલોપેથી પ્રેક્ટિસની વસ્તુઓ મળી આવતા તેમનું ક્લિનિક સીલ કરવામાં આવ્યું છે. 

આ સાથે ઓઢવના ભવાનીનગરના ટેકરા ખાતે આવેલા આર્ય ક્લિનિક ખાતે ડો.ચંદ્રપાલ આર્ય DMPની ડિગ્રી ધરાવતા હોવાનું ખૂલ્યું હતું. જોકે તેઓ પણ નિયમ મુજબ એલોપેથી પ્રેક્ટિસ કરી શકે નહી. તેમ છતાં તપાસ દરમિયાન તેમની પાસેથી ઇન્જેક્શન, મલ્ટી વિટામિન સહિતની અનેક એલોપેથી દવાઓ મળી આવી હતી. 

અમદાવાદમાં બિલાડીની ટોપની જેમ ઊગી નીકળેલા આવા બોગસ ડોકટરો સામે તંત્રએ લાલ આંખ કરી છે. ગઇકાલે એટલે કે બુધવારે તંત્ર દ્વારા ઓઢવમાં એકસાથે 2 બોગસ ડોકટરોને ઝડપી પાડી દવાખાના સીલ કરી દીધા હતા. જોકે તંત્રની આ કાર્યવાહીને કારણે ઓઢવ પંથક સહિત સમગ્ર અમદાવાદના બોગસ ડૉક્ટરોમાં ચકચાર મચી ગઈ છે. 

 નારોલમાં પણ કરાઇ મોટી કાર્યવાહી 
અમદાવાદના નારોલમાં મ્યુનિ.ની દક્ષિણ ઝોનની ટીમે ચેકિંગ દરમિયાન બોગસ ડૉક્ટર ઝડપી પાડ્યો છે. દક્ષિણ ઝોનની ટીમને જાણવા મળ્યું કે, નારોલ અલીફનગરમાં એક દુકાન પર દવાખાનાના બોર્ડ વિના દર્દીઓને તપાસ ચાલી રહી હતી. જેને લઈ મેડિકલ ટીમે ત્યાં હાજર નિશારખાન મંગતીખાન ઘાંચી (ઉ.40) પાસે મેડિકલ ડિગ્રી માંગતા તેમની પાસે કોઈ અધિકૃત ડિગ્રી ન હોવાનું પકડાયું હતું. જે બાદ મેડિકલ ઓફિસરે નારોલ પોલીસ સ્ટેશનમાં નિશારખાન ઘાંચી સામે ડિગ્રી વિના પ્રેક્ટિસ કરી લોકોના જીવ જોખમમાં મુકવા બદલ ફરિયાદ નોંધાવી હતી.