બે મહિલાઓ સાથે મળે એટલે કોઇના ઘરની પંચાત જ થતી હોય. તેવી ધારણાઓ મહિલાઓ માટે બાંધી દેવામાં આવી છે. પરંતુ સમાજની આ ધારણા તદ્દન ખોટી છે. કારણ કે આજની મહિલાઓને અન્યના ઘરની ચર્ચામાં નહીં પરંતુ સમાજમાં કેમ કરી પોતાની જાતને ઉપયોગી બનાવી શકાય તેમાં છે. અહીં પણ એવી જ મહિલાઓની વાત કરવી છે જે પાંચ, દસ, વીસ નહીં પરંતુ છેલ્લા ચાલીસ વર્ષથી સાથે મળીને સમાજ માટે, મહિલાઓ માટે અને જરૂરીયાતમંદ લોકો માટે કાર્યરત છે.
મહિલાઓનું ગ્રુપ 40 વર્ષથી સમાજ માટે કાર્યરત
દરેક આયુ અને દરેક સમાજની બહેનો છે ગ્રુપમાં સામેલ
આ ગ્રુપ મહિનામાં એકવાર જુદી-જુદી થીમ પર કાર્યક્રમોનું આયોજન કરે છે
આણંદ જીલ્લામાં ચાલીસ વર્ષથી જાગૃતિ મહિલા સમાજની બહેનો અન્યને જીવવાની પ્રેરણા પુર્ણ પાડી રહી છે. જાગૃતિ મહિલા સમાજ એવી મહિલાઓનું ગ્રુપ છે જેમાં દરેક આયુની અને દરેક સમાજની બહેનો છે. કોઇ 75 વર્ષે વકૃત્વ સ્પર્ધામાં પ્રથમ આવે છે. તો કોઇ 35-40 વર્ષે જીવનના અનેક રંગ લોકો સમક્ષ રજૂ કરે છે.
ગ્રુપ દ્વારા દરેક તહેવારની ઊજવણી કરાય છે
આજથી 40 વર્ષ પહેલાની વાત કરીએ તો કદાચ મહિલાઓ માટે ઘરની બહાર નીકળી સ્વતંત્ર પણે પોતાના વિચારો રજૂ કરવાની છૂટ જોઇએ તેટલી નહોતી. તે સમયે કુસુમબેન એડનવાલા, ભારતીબેન પટેલ, સરોજબેન શાહ, સ્મીતાબેન પંડ્યા, મનીષાબેન સોલંકી, હંસાબેન ધ્રુવ જેવી મહિલાઓએ સાથે મળીને જાગૃતિ મહિલા સમાજની નીવ મૂકી. કોઇ પણ ભેદભાવ વગર દરેક સમાજની મહિલાઓની સમસ્યાને પોતાની સમજતા આ ગ્રુપ મહિનામાં એકવાર સાથે મળી જુદી-જુદી થીમ પર કાર્યક્રમોનું આયોજન કરે છે. ક્યારેક દિવાળી, તો ક્યારેક નવરાત્રિ, ઉતરાયણ હેોય, કે પછી ગણેશ મોહત્સ કોઇ તહેવાર એવો નહીં હોય જેની ઉજવણી આ ગ્રુપ દ્ધારા કરવામાં ના આવે. એટલુ જ નહીં પણ કોઇ સારા કામને પ્રોત્સાહિત કરવાનું કામ પણ કરવામાં આવે છે.
ભલે આ ગ્રુપ સાથે જોડાયેલી મહિલાઓ ના હોય છતા તે કોઇ સારા કાર્યમાં ભાગ લે તો તેને ઉત્સાહભેર અહીં આવકારવામાં આવે છે. જેના કારણે મહિલાઓ જુદા-જુદા કાર્ય કરવા અને પોતાની કલાને ખીલવા પ્રોત્સાહિત થાય છે. તો વળી કોઇની જરૂરીયાત હોય કે સમસ્યા તેના નિવારણ માટે હંમેશા આ ગ્રુપની મહિલાઓ તૈયાર હોય છે. દરેકને સાથે લઇ દરેકની સમસ્યાને પોતાની સમજી તેનો ઉકેલ લાવવાનો પ્રયત્ન કરવો અને હંમેશા કઇક નવુ કરતા રહેવુ જાગૃતિ મહિલા સમાજનો ફંડા છે. આગામી ડિસેમ્બરમાં આ મહિલા સમાજ ચાલીસ વર્ષ પૂર્ણ કરી રહી છે. ત્યારે દરેક મહિલાઓ માટે આ ગ્રુપ એક ઉદાહરણ સમાન છે.