અમદાવાદ / રખડતાં શ્વાનનો આતંક: લોકોએ કહ્યું અમને પણ બહાર નીકળતા બીક લાગે છે, નવજાત બાળકને ઉઠાવી જવાની ઘટના બાદથી વધ્યો ફફડાટ

• અમદાવાદમાં રખડતા શ્વાનનો આતંક યથાવત્
• શહેરના પૂર્વ અને પશ્ચિમ વિસ્તારમાં હજુ પણ જોવા મળે છે શ્વાનનો ત્રાસ
• ચાલુ મહિનામાં 2 હજાર 670 રખડતા શ્વાન પકડ્યાનો દાવો

અમદાવાદમાં રખડતા શ્વાનનો આતંક યથાવત છે. ત્યારે શહેરનાં પૂર્વ અને પશ્ચિમ વિસ્તારમાં હજુ પણ શ્વાનનો ત્રાસ જોવા મળી રહ્યો છે.  જેમાં મણીનગર, ખોખરા, હાટકેશ્વર અને જશોદાનગરમાં રખડતા શ્વાન જોવા મળી રહ્યા છે. ત્યારે  AMC ની રખડતા શ્વાનને પકડવાની કામગીરી માત્ર કાગળ પર જ જોવા મળી રહી છે. તો બીજી તરફ સ્થાનિકોએ રોષ ઠાલવતા કહ્યું છે કે રખડતા શ્વાનને કારણે અમારા બાળકો બહાર રમી શકતા નથી. તેમજ બહારથી આવતા લોકો પણ ડરનાં માર્યા અમારે ઘરે આવી શકતા નથી. તેમજ બાળકોની સાથે મોટા માણસો પણ શ્વાનથી ડરે છે. રખડતા શ્વાનને લઈ AMC દ્વારા દાવો કરવામાં આવ્યો છે કે ચાલુ મહિનામાં 2670 રખડતા શ્વાન પકડાયા છે. ત્યારે સૌથી મોટો પ્રશ્ન એ છે કે લોકોને રખડતા શ્વાનથી મુક્તિ ક્યારે મળશે તે એક મોટો સવાલ છે. 

ચાલુ મહિના દરમિયાન 2600 થી વધુ શ્વાન પકડવામાં આવ્યા છેઃ મેયર કિરીટ પરમાર
અમદાવાદમાં રખડતા શ્વાનને લઈને મેયર કિરીટ પરમાર દ્વારા નિવેદન આપ્યું છે કે,  ચાલુ માસે  AMC દ્વારા 2600 થી વધારે શ્વાનોને પકડવામાં આવ્યા છે. ખસીકરણનું જે કામ છે તેને વધારે વેગ મળે તે રીતનું અમદાવાદ મ્યુનિસિપલ કોર્પોરેશન દ્વારા પ્રયત્ન છે. બે-ત્રણ દિવસ પહેલા મક્તમપુરામાં એક નાની બાળકીને ત્યાંના શ્વાન દ્વારા કરડ્યું હતું. એને પણ ધ્યાન રાખી તાત્કાલીક AMC દ્વારા  તે વિસ્તારમાંથી તેમજ આજુબાજુનાં વિસ્તારમાંથી કૂતરા પકડવાનું કામ ચાલુ છે.   સાથે સાથે AMC દ્વારા  વધારે શ્વાન પકડાય અને વધારે રસીકરણ થાય તે રીતનો પ્રયત્ન છે.  પરંતું જીવદયા સંસ્થા દ્વારા અવાર નવાર પશુઓ માટે એ લોકો અવાર નવાર કોર્ટમાં જતા હોય છે. ત્યારે અમુક વખત અમારે કોર્ટનાં આદેશનો પણ અમલ કરવાનો હોય છે.