કવાયત / સુપ્રીમ કોર્ટની પહેલ: હવેથી અદાલતોમાં પ્રોસ્ટીટ્યૂટ-મિસ્ટ્રેસ જેવા શબ્દો નહીં બોલી શકાય, નવી શબ્દાવલી થઈ જાહેર

• સુપ્રીમ કોર્ટની નવી પહેલા, જેન્ડર સ્ટીરિયોટાઇપ કોમ્બેટ હેન્ડબુક લોન્ચ
• નિર્ણયો અને દલીલોમાં હવે જેન્ડર સ્ટીરિયોટાઇપ શબ્દોનો ઉપયોગ નહીં કરાય 
• હેન્ડબુકમાં વાંધાજનક શબ્દો અને તેના બદલે ઉપયોગમાં લેવાતા શબ્દો અને વાક્યોની યાદી 

સુપ્રીમ કોર્ટના નિર્ણયો અને દલીલોમાં હવે જેન્ડર સ્ટીરિયોટાઇપ શબ્દોનો ઉપયોગ કરવામાં આવશે નહીં. સુપ્રીમ કોર્ટે મહિલાઓ માટે વપરાતા અપમાનજનક શબ્દો પર પ્રતિબંધ મૂકવા માટે જેન્ડર સ્ટીરિયોટાઇપ કોમ્બેટ હેન્ડબુક લોન્ચ કરી છે. નોંધનીય છે કે, આ પહેલા 8 માર્ચે મહિલા દિવસ પર સુપ્રીમ કોર્ટમાં આયોજિત એક કાર્યક્રમમાં કહેવામાં આવ્યું હતું કે, કાયદાકીય બાબતોમાં મહિલાઓ માટે વાંધાજનક શબ્દોનો ઉપયોગ બંધ થશે, ટૂંક સમયમાં એક શબ્દકોશ પણ આવશે.

બુધવાર, 16 ઓગસ્ટના રોજ હેન્ડબુક બહાર પાડતા CJI DY ચંદ્રચુડે જણાવ્યું હતું કે, તે ન્યાયાધીશો અને વકીલોને સમજવામાં સરળ બનાવશે કે કયા શબ્દો રૂઢિચુસ્ત છે અને તેમને કેવી રીતે ટાળવા. CJI ચંદ્રચુડે જણાવ્યું કે, આ હેન્ડબુકમાં વાંધાજનક શબ્દો અને તેના બદલે ઉપયોગમાં લેવાતા શબ્દો અને વાક્યોની યાદી છે. તેઓનો ઉપયોગ કોર્ટમાં દલીલો આપવા, ઓર્ડર આપવા અને તેની નકલો તૈયાર કરવા માટે થઈ શકે છે. આ હેન્ડબુક વકીલો તેમજ ન્યાયાધીશો માટે છે.

આ હેન્ડબુકમાં એવા શબ્દો છે જે ભૂતકાળમાં અદાલતો દ્વારા ઉપયોગમાં લેવાયા છે. શબ્દો કેમ ખોટા છે અને તે કાયદાને કેવી રીતે વધુ વિકૃત કરી શકે છે તે પણ સમજાવવામાં આવ્યું છે. 

જાગૃત કરવા માટે બનાવવામાં આવી છે હેન્ડબુક - CJI
જસ્ટિસ ચંદ્રચુડે કહ્યું કે, આ હેન્ડબુક તૈયાર કરવાનો હેતુ કોઈ નિર્ણયની ટીકા કે શંકા કરવાનો નથી, પરંતુ તે જણાવવાનો છે કે કેવી રીતે અજાણતાં રૂઢિચુસ્તતાની પરંપરા ચાલી રહી છે. કોર્ટનો હેતુ એ સમજાવવાનો છે કે સ્ટીરિયોટાઇપિંગ શું છે અને તેનાથી શું નુકસાન થાય છે, જેથી કોર્ટ મહિલાઓ વિરુદ્ધ વાંધાજનક ભાષાના ઉપયોગથી બચી શકે. તેને ટૂંક સમયમાં સુપ્રીમ કોર્ટની વેબસાઈટ પર અપલોડ કરવામાં આવશે.

કલકત્તા હાઈકોર્ટની ટીમે તૈયાર કરી પરિભાષા
CJI ચંદ્રચુડે જે કાયદાકીય પરિભાષા વિશે જણાવ્યું છે તે કલકત્તા હાઈકોર્ટના જસ્ટિસ મૌસુમી ભટ્ટાચાર્યની આગેવાની હેઠળની સમિતિએ તૈયાર કરી છે. આ સમિતિમાં નિવૃત્ત જસ્ટિસ પ્રભા શ્રીદેવન અને જસ્ટિસ ગીતા મિત્તલ અને પ્રોફેસર ઝુમા સેનનો સમાવેશ થાય છે, જે હાલમાં પશ્ચિમ બંગાળ નેશનલ યુનિવર્સિટી ઑફ જ્યુરિડિકલ સાયન્સ કોલકાતામાં ફેકલ્ટી મેમ્બર છે.