દિલ્હી ટેસ્ટ / ટીમ ઈન્ડિયાએ વેસ્ટ ઈન્ડિઝનો કર્યો વ્હાઈટવોશ, સીરિઝ 2-0થી જીતી લીધી, યશસ્વી-કુલદીપ જીતના હીરો

IND vs WI 2nd Test Day 5 : અરુણ જેટલી સ્ટેડિયમ ખાતે રમાયેલી ભારત અને વેસ્ટ ઇન્ડીઝ વચ્ચેની બીજી અને અંતિમ ટેસ્ટ મેચમાં ભારતીય ટીમે શાનદાર વિજય હાંસલ કર્યો. પાંચમા દિવસના પ્રથમ સત્રમાં ભારતે 121 રનની સાદી લક્ષ્યાંક સરળતાથી હાંસલ કરી મેચ સાત વિકેટથી જીતી. આ સાથે ભારતે બે મેચોની ટેસ્ટ શ્રેણી 2-0થી પોતાના નામે કરી લીધી.

કુલદીપ-યશસ્વી બન્યા જીતના હીરો

આ વિજયના હીરો બન્યા કુલદીપ યાદવ અનેયશસ્વી જયસ્વાલ. કુલદીપે મેચમાં કુલ 8 વિકેટ લઇને વેસ્ટ ઇન્ડીઝના બેટિંગ લાઇનઅપને ધ્વસ્ત કર્યો જ્યારે યશસ્વી જયસ્વાલે ભારતના પ્રથમ દાવમાં શાનદાર 175 રનની ઇનિંગ રમી.

શ્રેણી વિજયે શુભમન ગિલનું નવું યુગ શરુ કરાવ્યું

આ શ્રેણી વિજય ખાસ કરીને એટલે પણ યાદગાર રહ્યો કે, શુભમન ગિલે કેપ્ટન તરીકે પોતાની પહેલી ટેસ્ટ શ્રેણી જીતી. તેમના નેતૃત્વમાં ભારતીય ટીમે આત્મવિશ્વાસભર્યું પ્રદર્શન કરી ટક્કર આપી.

જન્મદિવસે ગંભીર માટે ખાસ ભેટ

મુખ્ય કોચ તરીકે ગૌતમ ગંભીર માટે પણ આ જીત ખાસ રહી. 14 ઓક્ટોબરના રોજ પોતાના 43મા જન્મદિવસે ભારતે મેચ જીતી તેમને યાદગાર ભેટ આપી.

મેચની હાઇલાઇટ્સ

• ભારતનો પ્રથમ દાવ : 518/5 ડિકલેર – યશસ્વી જયસ્વાલ (175), શુભમન ગિલ ( 102)
• વેસ્ટ ઇન્ડીઝનો પ્રથમ દાવ : 248 – કુલદીપ યાદવ (5 વિકેટ), બુમરાહ (2), જાડેજા (2)
• વેસ્ટ ઇન્ડીઝનો બીજો દાવ : 390 – જોન કેમ્પબેલ (112), શાઈ હોપ (103)
• ભારતનો લક્ષ્યાંક : 121/3 – કેએલ રાહુલ (નાબાદ 58), સાઈ સુદર્શન (39)

ફોલોઓન બાદ પણ વિન્ડીઝનો સંઘર્ષ

ભારતે પ્રથમ દાવમાં 270 રનની મોટી લીડ મેળવી પછી વેસ્ટ ઇન્ડીઝને ફોલોઓન લાગુ કર્યો. બીજી ઇનિંગમાં વિન્ડીઝે નોંધપાત્ર પ્રદર્શન કર્યું હતું, ખાસ કરીને કેમ્પબેલ અને શાઈ હોપે સદી ફટકારી. તેમ છતાં, ભારતીય બોલર્સ ફરી હાવી રહ્યા અને ટીમને નાનું લક્ષ્યાંક આપ્યું.

આ પણ વાંચો : રોહિત શર્મા અને વિરાટ કોહલી 2027નો વર્લ્ડ કપ રમશે કે નહીં? રવિ શાસ્ત્રીએ ફોડ્યો મોટો 'બોમ્બ'!

જીત માટે સહેલાઇભર્યો પીછો

લક્ષ્યાંકનો પીછો કરવા ઉતરેલી ભારતીય ટીમની શરૂઆત નબળી રહી હતી, કારણ કે યશસ્વી જયસ્વાલ માત્ર 8 રન બનાવીને આઉટ થયો. જોકે, કેએલ રાહુલ અને સાઈ સુદર્શન વચ્ચે 79 રનની મજબૂત ભાગીદારીના કારણે ભારતે ટૂંક સમયમાં લક્ષ્યાંક હાંસલ કર્યો. આ વિજય સાથે ભારતે વેસ્ટ ઇન્ડીઝ સામે સતત 10મી ટેસ્ટ શ્રેણી જીતી છે. વેસ્ટ ઇન્ડીઝે છેલ્લે 2002માં ભારત સામે શ્રેણી જીતી હતી. ત્યારબાદથી ભારત વિન્ડીઝ સામે એકપણ ટેસ્ટ શ્રેણી હારી નથી.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ