Minority Scholarship Scam / પોતાના મંત્રાલયમાં સ્કોલરશીપનું કૌભાંડ સામે આવતાં એક્શનમાં સ્મૃતિ ઈરાની, તાબડતોબ તપાસનો આદેશ

• દેશમાં સૌથી મોટા કહી શકાય તેવુ લઘુમતી શિષ્યવૃત્તિ કૌભાંડ સામે આવ્યું
• કેન્દ્રીય મંત્રી સ્મૃતિ ઈરાની એક્સનમાં આવ્યા
• નકલી વિદ્યાર્થીઓના નામે 144 કરોડનો ધૂંબો માર્યો હોવાનુ સામે આવ્યું

લઘુમતી મંત્રાલયમાં મસમોટું શિષ્યવૃત્તિ યોજનાનું  કૌભાંડ સામે આવતા ખળભળાટ મચી ગયો છે. આ મામલે કેન્દ્રીય મંત્રી સ્મૃતિ ઈરાની એક્સનમાં આવ્યા છે અને તેમણે તાબડતોબ તપાસના આદેશ જારી કર્યા છે. શિષ્યવૃત્તિ યોજનામાં નકલી વિદ્યાર્થીઓના નામે 144 કરોડનો ધૂંબો મારી દેવામાં આવ્યો હોવાનું સામે આવતા તપાસના આદેશ છૂટયા છે. મંત્રાલય દ્વારા 34 રાજ્યોના 100 જિલ્લાઓમાં આંતરિક તપાસ હાથ ધરવામાં આવી છે. 

830 સંસ્થાઓમાં 144.83 કરોડ રૂપિયાનું કૌભાંડ થયું !
દેશમાં સૌથી મોટા કહી શકાય તેવા લઘુમતી શિષ્યવૃત્તિ કૌભાંડનો પર્દાફાશ થયો છે. જેને લઈને 21 રાજ્યોની 1572 સંસ્થાઓમાંથી 830 સંસ્થાઓ બોગસ હોવાનુ પણ પ્રાથમીક તપાસમાં સામે આવ્યું છે.આ સંસ્થાઓ ક્યાં તો અસ્તિત્વમાં નથી અથવા બિન-કાર્યકારી છે. મીડિયા અહેવાલ મુજબ લગભગ 53 ટકા નકલી ઉમેદવારો મળી આવતા સબંધિત વિભાગ ચોંકી ઉઠ્યો છે. એટલુ જ નહીં પ્રાથમિક દ્રષ્ટિએ છેલ્લા 5 વર્ષમાં આ બોગસ 830 સંસ્થાઓમાં 144.83 કરોડ રૂપિયાનું કૌભાંડ થયું હોવાનું પણ બહાર આવ્યું છે. 

સીબીઆઈમાં  ફરિયાદ
વધુમાં ઘણા રાજ્યોમાં નકલી લાભાર્થીઓ, નકલી સંસ્થાઓ અને નકલી નામો દ્વારા બનાવેલા બેંક ખાતાઓ સામે આવ્યા છે. જેને લઈને કેન્દ્રીય મંત્રી સ્મૃતિ ઈરાની પણ અકળાયા છે. જેમણે સીબીઆઈ તપાસ અંગે માંગ કરી છે. લઘુમતી બાબતોના મંત્રાલય દ્વારા 10 જુલાઈના રોજ સીબીઆઈમાં તેની ફરિયાદ નોંધાવી હતી.