રોષ / મોબાઈલની ચોરીમાં ફાયરિંગ અને ફ્લેટમાં 10 ધાડપાડુઓની ગેંગ...: બે ઘટનાઑથી હચમચી ગયું સુરત

• સુરતમાં હલદરૂ ગામની સીમમાં લૂંટારૂઓએ કર્યું ફાયરિંગ
• ફાયરિંગ કરી એક યુવક પાસેથી મોબાઈલની લૂંટ ચલાવી લૂંટારૂઓ ફરાર 
• રામેસ્વર ગ્રીન સોસાયટીમાં તસ્કરો ત્રાટક્યા

એક સમયના શાંત શહેર સુરતમાં હવે કાયદો અને વ્યવસ્થાની સ્થિતિ કથળી રહી છે. પોલીસનું જાણે અસ્તિત્વ જ ન હોય તેમ ગુનેગારો બેફામ બનીને ક્રાઇમ કરી રહ્યા છે. જે ને પગલે પોલીસની કામગીરી સામેં પણ સવાલો ઉભા થયા છે. આવી સ્થિતિ વચ્ચે સુરતના હલદરૂ ગામની સીમમાં લૂંટારૂઓએ ફાયરિંગ કર્યાની ઘટના સામે આવી છે તો સુરતની રામેસ્વર ગ્રીન સોસાયટીમાં એક સાથે 10 કરતા વધુ તસ્કરો ત્રાટક્યા હોવાની ઘટના સામે આવી છે.

મોબાઈલની લૂંટ ચલાવી લૂંટારૂઓ ફરાર 

સુરતના હલદરૂ ગામની સીમમાં બેફામ બનેલા લૂંટારૂઓએ ફાયરિંગ કર્યું હતું. ફાયરિંગ કરી એક યુવક પાસેથી મોબાઈલની લૂંટ ચલાવી લૂંટારૂઓ નાસી છૂટયા હતા. બીજી બાજુ સ્થાનિક યુવાનોને લૂંટારૂ અંગે જાણ થતાં તેને અટકાવી વિરોધ કર્યો હતો. જેને લઈને ઝપાઝપીના દ્રશ્યો સર્જાયા હતા આ દરમિયાન લૂંટારૂઓએ ફાયરિંગ કર્યું હતું. આ ઘટનામાં ફાયરિંગને લઈને એક યુવકના હાથમાં ગોળી વાગતા ગંભીર ઇજા થવા પામી હતી. ઇજાગ્રસ્ત યુવકને સુરત સિવિલમાં સારવાર માટે ખસેડાયો હતો.જે અંગે જાણ થતા પોલીસ ઘટનાસ્થળે દોડી ગઈ હતી. જ્યા આજુબાજુના સીસીટીવી તપાસી કાર્યવાહી હાથ ધરી છે.

ગ્રીન સોસાયટી 10 કરતા વધુ તસ્કરો ત્રાટક્યા

અન્ય એક ઘટના સુરતની રામેસ્વર ગ્રીન સોસાયટીમાં સામે આવી હતી. જ્યા એક સાથે 10 કરતા વધુ તસ્કરો ત્રાટક્યા હતા.મોઢા પર માસ્ક પહેરીને હથિયારો સાથે તસ્કરોનો ટોળું ઘસી આવ્યું હતું. જેમાં પાંચ કરતા વધુ ફ્લેટના દરવાજા તોડી ચોરીને અંજામ આપ્યો હતો. આ દરમીયાન તસ્કરોએ એક મહિલા પર હુમલો કરીને ચેઇનની  લૂંટ ચલાવી હતી. સિક્યુરિટી ગાર્ડને છરી બતાવીને ફ્લેટમાં તસ્કરો ઘુસ્યા હતા. જે ફ્લેટમાં ચોરી કરતા આ સમગ્ર ઘટના CCTV માં કેદ થઈ હતી. આથી પોલીસે CCTV ફૂટેજના આધારે તપાસ શરૂ કરી છે.