ઇમિગ્રેશન / માતાપિતાને બોલાવવા હવે સરળ, કેનેડાએ સુપર વિઝા માટે નિયમોમાં કર્યો મોટો બદલાવ

Canada Super Visa Update: કેનેડાએ પરિવાર કેનેડામાં સાથે વસવાટ કરવા માટેના નિયમને વધુ સરળ બનાવતા એક મહત્વપૂર્ણ નિર્ણય લીધો છે. સરકારે સુપર વિઝા માટેના આવકના નિયમોમાં રાહત આપી છે. જેના કારણે માતાપિતા અને દાદા-દાદીને આમંત્રણ આપવું હવે સરળ બનશે.

કેનેડા સરકાર દ્વારા જાહેર કરવામાં આવેલા નવા નિયમો 31 માર્ચ 2026થી અમલમાં આવશે. આ ફેરફારો ખાસ કરીને તે કેનેડિયન નાગરિકો અને કાયમી રહેવાસીઓ માટે લાભદાયક છે. જે સુપર વિઝા હેઠળ તેમના માતાપિતા અથવા દાદા-દાદીને બોલાવવા માંગે છે. સુપર વિઝા 10 વર્ષ માટે માન્ય રહે છે અને તેમાં એકથી વધારે વાર પ્રવેશ સાથે એક સમયે પાંચ વર્ષ સુધી રહેવાની મંજૂરી મળે છે.

નવી વ્યવસ્થા મુજબ આવકના માપદંડોમાં મહત્વપૂર્ણ ફેરફાર કરવામાં આવ્યો છે. હવે અરજદારોની આવકનું મૂલ્યાંકન માત્ર એક વર્ષના બદલે પાછલા બે ઇન્કમ ટેક્સ વર્ષોના આધારે કરવામાં આવશે. એટલે કે આ બેમાંથી કોઈપણ એક વર્ષમાં જરૂરી આવક મર્યાદા પૂર્ણ થાય તો અરજદાર પાત્ર ગણાશે. ઉપરાંત હવે માતાપિતા અથવા દાદા-દાદીની આવકનો પણ એક ભાગ ગણતરીમાં લઈ શકાય છે. જો યજમાન અને સહ-સહી કરનાર પહેલેથી જ લઘુત્તમ આવકની શરત પૂર્ણ કરતા હોય.

આ નવા નિયમો 31 માર્ચ 2026 પછી કરવામાં આવતી તમામ નવી અરજીઓ અને હાલ પ્રક્રિયામાં રહેલી અરજીઓ પર લાગુ પડશે. અરજદારોને તેમની આવકના પુરાવા તરીકે કર આકારણી, પગાર સ્લિપ અથવા નોકરીદાતાના પત્રો જેવા દસ્તાવેજો રજૂ કરવા ફરજિયાત રહેશે. જે પરિવારો અગાઉ પાત્ર હતા, તેઓ નવી વ્યવસ્થામાં પણ પાત્ર રહેશે.

આ પણ વાંચો: યુરોપમાં નોકરી કરવાનો ગોલ્ડન ચાન્સ! આ દેશ આપી રહ્યુ છે ભારતીયોને વર્ક વિઝા

લાયકાતના માપદંડો મુજબ પરિવારના કદના આધારે લઘુત્તમ આવક નક્કી કરવામાં આવી છે. જે એક વ્યક્તિ માટે આશરે 30526 કેનેડિયન ડોલરથી શરૂ થાય છે અને પરિવાર વધતાં વધે છે. અરજદારે કેનેડાની બહારથી અરજી કરવી જરૂરી છે. સાથે તબીબી તપાસ અને ઓછામાં ઓછા એક વર્ષ માટે 100000 ડોલર કવરેજ ધરાવતા આરોગ્ય વીમો લેવું ફરજિયાત છે. આ નિર્ણયથી ઘણા પરિવારોને ફરી સાથે આવવાની તક મળશે અને સુપર વિઝા કાર્યક્રમ વધુ સુલભ બનશે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ