કાબૂલ: અફઘાનિસ્તાનના હજારા લઘુમતિના સભ્યો દ્વારા કાઢવામાં આવેલી વિશાળ રેલીમાં આત્મઘાતી બોમ્બ વિસ્ફોટ થયો. સ્થાનિક અધિકારીઓના જણાવ્યા પ્રમાણે ઘટનામાં ઓછાંમાં ઓછાં 61 લોકોના મોત થયા છે જ્યારે 200 કરતા વધુ લોકો ગંભીર રીતે ઘાયલ થયા છે.
હાજારના સભ્યો દ્વારા મલ્ટિમિલિયન ડોલર પાવર લાઈનના રૂટમાં રેલી કાઢવામાં આવી હતી. જ્યાં હજારા લઘુમતિના હજારો લોકોની ભીડ જામેલી હતી. ઘટના સ્થળે થયેલા વિસ્ફોટ બાદ ટેલિવિઝન ફૂટેજમાં રસ્તા પર ઠેર ઠેર લાશો જોવા મળી હતી.
કાબૂલના જાહેર સ્વાસ્થ્ય સંભાળ મંત્રાલયના પ્રવક્તા મહોમ્મદ ઇસ્માઇલ કાવાઉસીના જણાવ્યા પ્રમાણે આ ઘટનામાં ઓછામાં ઓછાં 61 લોકોના મોત થયા છે અને 200થી વધુ ઘાયલોને સારવાર અર્થે હોસ્પિટલમાં ભરતી કરવામાં આવ્યા છે. આ ઘટનામાં મૃત્યુ આંક વધવાની આશંકા સેવવામાં આવી રહી છે.
