BIG NEWS / રાણા દંપતિએ હજુ આ તારીખ સુધી જેલમાં જ રહેવું પડશે, જાણો ક્યારે થશે આગામી સુનાવણી

• સેશન્સ કોર્ટ દ્વારા નવનીત અને રવિ રાણાને રાહત ન મળી
• જામીન અરજી પર હવે 29 એપ્રિલે સુનાવણી થશે
• હાલ દંપતિએ જેલમાં જ રહેવું પડશે

મુંબઈમાં માતોશ્રીની બહાર હનુમાન ચાલીસાના પાઠ કરવાની જાહેરાત બાદ વિવાદમાં આવેલી અમરાવતીથી અપક્ષ સાંસદ નવનીત રાણા અને પતિ રવિ રાણાને સેશન્સ કોર્ટમાંથી રાહત નથી મળી. હવે તેઓની જામીન અરજી પર 29 એપ્રિલે સુનાવણી થશે, ત્યાં સુધી બંનેએ જેલમાં જ રહેવું પડશે. અપક્ષ સાંસદ નવનીત રાણા, તેમના પતિ અને ધારાસભ્ય રવિ રાણાને બોમ્બે હાઈકોર્ટમાંથી રાહત નથી મળી. ત્યાર બાદ તેઓએ મુંબઈ સેશન્સ કોર્ટમાં અરજી કરી હતી.

#UPDATE | Maharashtra: Mumbai Session Court has asked Special Public Prosecutor to file a reply on Navneet Rana & Ravi Rana's bail applications on 29th April. The court will hear the bail pleas of the Rana Couple on 29th April now.

— ANI (@ANI) April 26, 2022

સરકારી વકીલે રાણા દંપતિની જામીન અરજીનો વિરોધ કર્યો

આ પહેલાં નવનીત રાણા અને રવિ રાણાની જામીન અરજી પર મુંબઇની સેશન્સ કોર્ટમાં સુનાવણી દરમ્યાન સરકારી વકીલે રાણા દંપતિની જામીન અરજીનો વિરોધ કર્યો હતો. તેઓએ જણાવ્યું કે, નીચલી કોર્ટમાં હાલ જામીન અરજી પર કોઇ જ નિર્ણય નથી આવ્યો. એવામાં સેશન્સ કોર્ટમાં અરજી કેવી રીતે કરી શકીએ છીએ. રાણાના વકીલે તેઓની જામીન અરજી સાંભળવા માટે નજીકની તારીખ માંગી.

બંને નેતાઓ સામે રાજદ્રોહનો કેસ દાખલ છે

મહારાષ્ટ્રમાં હનુમાન ચાલીસાને લઈને રાજકારણ ગરમાયું છે. ત્યારે અપક્ષ સાંસદ નવનીત રાણા અને રવિ રાણાની ધરપકડ પર મહારાષ્ટ્રના ગૃહમંત્રી દિલીપ વાલસે પાટીલનું સ્પષ્ટીકરણ આવ્યું છે. તેઓએ કહ્યું કે, રાણા દંપતીની ધરપકડ હનુમાન ચાલીસાના પાઠ માટે નહીં પરંતુ રાજ્યની કાયદો અને વ્યવસ્થાને પડકારવા, ધાર્મિક સૌહાર્દને ખલેલ પહોંચાડવા તેમજ રમખાણો કરાવનારા નિવેદન માટે કરવામાં આવી હતી. કોર્ટે દંપતીને 6 મે સુધી ન્યાયિક કસ્ટડીમાં મોકલી દીધા છે. બંને વિરુદ્ધ દેશદ્રોહનો કેસ નોંધવામાં આવ્યો છે.