નેશનલ / ભારતીય સેનાની વધશે તાકાત, પાકિસ્તાન સાથે તણાવ વચ્ચે મળશે ઘાતક હથિયાર

ભારતની વાયુ શક્તિને જલ્દી જ એક ઘાતક ધાર મળવા જઈ રહી છે. ભારતીય વાયુસેના અને નૌકાદળ તેમના રાફેલ ફાઇટર જેટમાં બ્રહ્મોસ-NG (નેક્સ્ટ જનરેશન) સુપરસોનિક ક્રુઝ મિસાઇલ તૈનાત કરવાની તૈયારી કરી રહ્યા છે. 290 કિલોમીટરની રેન્જ અને 4170 કિમી/કલાકની ઝડપે ઉડતી આ મિસાઇલ દુશ્મન પર ચોક્કસ અને વિનાશક પ્રહાર કરવામાં સક્ષમ હશે. દસોલ્ટ એવિએશને રાફેલમાં ભારતની સ્વદેશી શસ્ત્ર પ્રણાલીઓના એકીકરણને મંજૂરી આપી દીધી છે, જેનાથી 'મેક ઇન ઇન્ડિયા'ને નવી તાકાત મળશે અને ભારતની વ્યૂહાત્મક સ્વતંત્રતા વધુ મજબૂત બનશે.

પાકિસ્તાન પહેલાથી જ ભારતના રાફેલ કાફલાને લઈને ચિંતિત હતું. હવે જ્યારે આ અતિઆધુનિક ફાઇટર પ્લેન બ્રહ્મોસ-NG જેવા ઘાતક મિસાઇલોથી સજ્જ થશે, ત્યારે તેની આતંકવાદને ટેકો આપતી વ્યૂહરચના પર મોટી અસર પડશે. હવે ભારતીય હવાઈ ક્ષેત્રમાં દુશ્મનની ઘૂસણખોરીના કોઈપણ પ્રયાસનો જવાબ વધુ ઝડપી, વધુ સચોટ અને ઘાતક હશે.

રાફેલ પહેલાથી જ પાકિસ્તાનના JF-17 જેવા વિમાનો કરતાં અનેક ગણું વધુ સક્ષમ છે અને બ્રહ્મોસ-NGના સામેલ થયા પછી, તે એક વ્યૂહાત્મક સ્ટ્રાઇક પ્લેટફોર્મ બની જશે. આ મિસાઈલ પાકિસ્તાનના કોઈપણ લશ્કરી મથક, કમાન્ડ સેન્ટર અથવા આતંકવાદી લોન્ચપેડને ક્ષણભરમાં નિશાન બનાવી શકે છે, તે પણ સરહદ પાર કર્યા વિના.

2026 માં ટેસ્ટિંગ, લખનૌથી પ્રોડક્શન

આ મિસાઈલનું પહેલું પરીક્ષણ 2026 માં થશે અને તેનું પ્રોડક્શન ઉત્તર પ્રદેશના લખનૌમાં બની રહેલા બ્રહ્મોસ પ્રોડક્શન સેન્ટરમાં કરવામાં આવશે. આ સેન્ટર ભારતમાં મિસાઇલ ઉત્પાદનમાં આત્મનિર્ભરતા તરફ એક મોટું પગલું સાબિત થશે.

બ્રહ્મોસ-NG એ બ્રહ્મોસ સુપરસોનિક ક્રુઝ મિસાઇલનું હળવું અને અદ્યતન વર્ઝન છે, જે ખાસ કરીને આધુનિક ફાઇટર જેટ અને મોબાઇલ પ્લેટફોર્મ પરથી લોન્ચ કરવા માટે વિકસાવવામાં આવી રહ્યું છે.

સ્પીડ - બ્રહ્મોસ-NGની સ્પીડ Mach 3.5 (લગભગ 4170 કિમી/કલાક) છે, જેનાથી તે દુશ્મનના રડાર અને ડિફેન્સ સિસ્ટમમાં ટ્રેક થયા વિના ચોકસાઈથી હુમલો કરી શકે છે.

રેન્જ - તેની રેન્જ 290 કિલોમીટર છે, એટલે કે તે સરહદ પાર કર્યા વિના સરહદ પાર બેઠેલા દુશ્મનના ઠેકાણાઓને ધ્વસ્ત કરી શકે છે.

આ પણ વાંચો: પહેલગામ હુમલા બાદ ભારતનો સૌથી મોટો નિર્ણય, પાકિસ્તાન હવે આ ચીજો માટે તરસશે, ટોટલ પ્રતિબંધ

હલકી અને કોમ્પેક્ટ ડિઝાઇન - તેનું વજન લગભગ 1.5 ટન છે, જે મૂળ બ્રહ્મોસ મિસાઇલ કરતા લગભગ 50 ટકા ઓછું છે. તેથી, તેને તેજસ Mk1A, રાફેલ, મિરાજ-2000, સુખોઈ-30MKI જેવા ફાઇટર જેટથી સરળતાથી ફાયર કરી શકાય છે.

ચોકસાઈ - બ્રહ્મોસ-NGની સ્ટ્રાઇક એકયુરસી સેમી-એક્ટિવ લેસર અને ઇનર્શિયલ GPS/GLONASS નેવિગેશન સિસ્ટમ્સ પર આધારિત છે, જે તેને હાઈ-પ્રિસિશન સ્ટ્રાઇક હથિયાર બનાવે છે.

લો રડાર સિગ્નેચર - તેની ડિઝાઈન સ્ટીલ્થ લાક્ષણિકતાઓ અનુસાર તૈયાર કરવામાં આવી છે, જેનાથી તે દુશ્મનના રડારની પકડમાં આવતું નથી.

ફાઇટર જેટથી ડિપલૉયમેન્ટ - એક ફાઇટર જેટ પર એકસાથે બે મિસાઇલો લઈ જઈ શકાય છે, જેનાથી એક જ ઉડાનમાં બે અલગ અલગ ટાર્ગેટ પર હુમલો કરવાનું શક્ય બને છે.

સેના, વાયુસેના અને નૌકાદળ માટે યોગ્ય - આ મિસાઇલ એર લોન્ચ, લેન્ડ બેઝ્ડ અને શીપ બેઝ્ડ વર્ઝનમાં ઉપલબ્ધ હશે. આનો અર્થ એ છે કે જમીન, પાણી અને આકાશ - દરેક મોરચે સમાન ઘાતક શક્તિ.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ