હવામાન અપડેટ / દેશના કેટલાક રાજ્યોમાં વરસાદ મચાવશે તાંડવ, પહાડી રાજ્યોમાં એલર્ટ! IMDએ જારી કરી ચેતવણી

Weather News: હાલમાં દેશના વિવિધ ભાગોમાં ચોમાસુ સંપૂર્ણપણે સક્રિય છે અને ઘણા રાજ્યોમાં ભારે વરસાદ ચાલુ છે. હવામાન વિભાગે આજથી દેશભરના ઘણા વિસ્તારોમાં વરસાદ અને તોફાની પવનોને લઈને ચેતવણી જારી કરી છે. રાજધાની દિલ્હી સહિત ઉત્તર ભારતના ઘણા ભાગોમાં હળવાથી મધ્યમ વરસાદની આગાહી છે, જ્યારે ઉત્તરાખંડ અને હિમાચલ પ્રદેશ જેવા પહાડી રાજ્યોમાં ભારે વરસાદ સાથે ભૂસ્ખલન અને વાદળ ફાટવાની ચેતવણી જારી કરવામાં આવી છે. છેલ્લા કેટલાક દિવસોથી રાજધાની દિલ્હીમાં હવામાન ખુશનુમા રહ્યું છે.

ભારતીય હવામાન વિભાગ (IMD) એ રવિવારે દિલ્હીના કેટલાક ભાગોમાં વાદળછાયું વાતાવરણ અને વાવાઝોડાની આગાહી કરી છે. હવામાન વિભાગે દિલ્હી-NCR ના ઘણા વિસ્તારોમાં ઓરેન્જ અને યલો એલર્ટ જારી કર્યું છે. હવામાન વિભાગના જણાવ્યા અનુસાર, 17 જુલાઈ સુધી દિલ્હીમાં તૂટક તૂટક વરસાદ ચાલુ રહેશે. આજે સવારે દિવસની શરૂઆત હળવાથી મધ્યમ વરસાદથી થઈ શકે છે. આ પછી હવામાન સ્વચ્છ રહેશે પરંતુ 25-40 કિમી પ્રતિ કલાકની ઝડપે જોરદાર પવન ફૂંકાશે. ચોમાસુ સક્રિય થતાં લોકોને ભેજથી રાહત મળશે.

યુપીમાં ભારે વરસાદની આગાહી

ઉત્તર પ્રદેશમાં ફરી ભારે વરસાદની આગાહી છે. હવામાન વિભાગના જણાવ્યા અનુસાર, આગામી 24 કલાકમાં પૂર્વ અને પશ્ચિમ યુપીના ઘણા ભાગોમાં વાવાઝોડા સાથે ભારે વરસાદ પડી શકે છે. આ વરસાદ ખેડૂતો માટે રાહતદાયક સાબિત થઈ શકે છે, પરંતુ પાણી ભરાવા અને ટ્રાફિક જામ જેવી સમસ્યાઓ પણ ઊભી થઈ શકે છે.

આ સિવાય પંજાબ, હરિયાણા, ઝારખંડ, ઉત્તર રાજસ્થાનના વિસ્તારોમાં હળવોથી મધ્યમ વરસાદ, પશ્ચિમ બંગાળ, ઓડિશા, કેરળમાં મધ્યમ વરસાદની શક્યતા છે. જયારે પૂર્વ રાજસ્થાન અને મધ્યપ્રદેશમાં ભારેથી અતિ ભારે વરસાદની આગાહી કરવામાં આવી છે તો પશ્ચિમ રાજસ્થાન, છત્તીસગઢ, દરિયાકાંઠાના કર્ણાટક, ગુજરાત, આસામ અને મેઘાલયમાં અલગ અલગ સ્થળોએ ભારે વરસાદની ચેતવણી જારી કરવામાં આવી છે. મુંબઈમાં ચોમાસું ધીમું છે. હવામાન વિભાગના જણાવ્યા અનુસાર, આગામી 10 દિવસ સુધી ભારે વરસાદની કોઈ શક્યતા નથી.

રાજસ્થાનમાં વરસાદ મહેરબાન

રાજસ્થાનના વિવિધ જિલ્લાઓમાં ચોમાસાનો વરસાદ ચાલુ છે, જ્યાં છેલ્લા 24 કલાકમાં ઘણી જગ્યાએ હળવોથી ભારે વરસાદ થયો છે. હવામાન કેન્દ્રએ જણાવ્યું કે આગામી 2 અઠવાડિયા દરમિયાન પૂર્વી રાજસ્થાનના મોટાભાગના વિસ્તારોમાં ચોમાસું સક્રિય રહેવાની ધારણા છે અને સરેરાશ કરતા વધુ વરસાદ પડવાની શક્યતા છે. આગામી એક અઠવાડિયામાં પશ્ચિમ રાજસ્થાનના મોટાભાગના વિસ્તારોમાં ચોમાસું સક્રિય રહેવાની ધારણા છે અને સામાન્ય કરતા વધુ વરસાદ પડવાની શક્યતા છે.

ઝારખંડમાં ભારે વરસાદની ચેતવણી

હવામાન વિભાગે 13 થી 15 જુલાઈ દરમિયાન ઝારખંડના ઘણા જિલ્લાઓમાં ભારે વરસાદની આગાહી કરી છે. હવામાન વિભાગે જણાવ્યું કે રાજ્યના ગુમલા, ખૂંટી, સિમડેગા, સરાયકેલા-ખરસાવન અને પૂર્વ-પશ્ચિમ સિંહભૂમ જિલ્લામાં 13 અને 14 જુલાઈ માટે યલો એલર્ટ જારી કરવામાં આવ્યું છે.

આ પણ વાંચો: ખેડૂતોને પાક નુકસાની પર પૂરેપૂરા રૂપિયા મળશે, માત્ર બે ટકા પ્રીમિયમ ભરીને મેળવો લાભ

પહાડી રાજ્યોમાં એલર્ટ

છેલ્લા કેટલાક દિવસોમાં મુશળધાર વરસાદને કારણે હિમાચલ પ્રદેશ અને ઉત્તરાખંડમાં જનજીવન ખોરવાઈ ગયું હતું. હવે હવામાન વિભાગે ફરીથી ચેતવણી જારી કરી છે કે વેસ્ટર્ન ડિસ્ટર્બન્સ સક્રિય થવાને કારણે આ રાજ્યોમાં ભારે વરસાદ પડી શકે છે. આનાથી અચાનક પૂર, ભૂસ્ખલન અને વાદળ ફાટવા જેવી ઘટનાઓ બની શકે છે. પ્રવાસીઓ અને સ્થાનિક લોકોને સલામત સ્થળોએ રહેવાની સલાહ આપવામાં આવી છે. ઉત્તરાખંડ અને હિમાચલમાં પહેલાથી જ સામાન્ય કરતાં વધુ વરસાદ પડ્યો છે. હવે બીજી વેધર સીસ્ટમ 12 થી 16 જુલાઈ દરમિયાન સક્રિય થવાની સંભાવના છે, જેના કારણે 13 અને 14 જુલાઈએ વરસાદ પડી શકે છે. પહાડોમાં જમીન પહેલેથી જ ભીની છે અને નદીઓમાં પૂર છે, જેના કારણે પૂર અને ભૂસ્ખલન જેવી ઘટનાઓનું જોખમ વધી રહ્યું છે. વહીવટીતંત્રે પ્રવાસીઓ અને સ્થાનિક લોકોને સાવચેત રહેવા અને હવામાન વિભાગની ચેતવણીઓનું પાલન કરવાની અપીલ કરી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ