હવામાન અપડેટ / શીતલહેર, ભારે ધુમ્મસ અને વરસાદનો માર, પંજાબથી બિહાર સુધી ‘કોલ્ડ ડે’ની ચેતવણી

Weather Update : ગુજરાત સહિત દેશભરમાં હવે હાડ થીજવતી ઠંડી પડી રહી છે. આ તરફ હવે ઉત્તર અને મધ્ય ભારતમાં છેલ્લા કેટલાક દિવસોથી ઠંડીમાં સતત વધારો થઈ રહ્યો છે અને હવામાન વિભાગે પણ આગામી દિવસો માટે ચેતવણી આપી છે. ઘણા રાજ્યોમાં ઠંડીની સાથે ગાઢ ધુમ્મસ, વરસાદ અને પર્વતીય વિસ્તારોમાં હિમવર્ષાની શક્યતા વ્યક્ત કરવામાં આવી છે.

પર્વતીય વિસ્તારોમાં વરસાદ અને હિમવર્ષા

હવામાન વિભાગના અનુમાન મુજબ જમ્મુ-કાશ્મીર, લદ્દાખ તેમજ હિમાચલ પ્રદેશ અને ઉત્તરાખંડના ઊંચા વિસ્તારોમાં આગામી દિવસોમાં વરસાદ અને બરફવર્ષા થઈ શકે છે. કેટલીક જગ્યાએ ભારે હિમવર્ષાની શક્યતા છે, જેના કારણે રસ્તાઓ બંધ થવાની અને મુસાફરીમાં મુશ્કેલી ઊભી થવાની સંભાવના છે. તેજ પવન પણ ફૂંકાઈ શકે છે, જેના કારણે ઠંડી વધુ અનુભવી શકાય છે.

દિલ્હીમાં ઠંડી અને ધુમ્મસ વધશે

રાજધાની દિલ્હી સહિત આસપાસના વિસ્તારોમાં ઠંડી વધુ કડક બનવાની શક્યતા છે. ખાસ કરીને સવાર અને મોડી રાત્રે ગાઢ ધુમ્મસ છવાઈ શકે છે. તેના કારણે રસ્તા પર વાહન ચલાવતાં લોકોને મુશ્કેલી પડી શકે છે. આગામી દિવસોમાં લઘુત્તમ તાપમાનમાં વધુ ઘટાડો થવાની શક્યતા છે, જેથી દિવસ દરમિયાન પણ ઠંડી અનુભવાશે.

તાપમાનમાં થશે ઘટાડો

ઉત્તર પશ્ચિમ ભારતના ઘણા વિસ્તારોમાં થોડા દિવસોમાં તાપમાનમાં 3 થી 5 ડિગ્રી સેલ્સિયસ સુધીનો ઘટાડો થઈ શકે છે. ઉત્તર પ્રદેશ, બિહાર, પંજાબ, હરિયાણા અને મધ્ય પ્રદેશ જેવા રાજ્યોમાં ઠંડી વધુ તીવ્ર બનવાની સંભાવના છે. પૂર્વ ભારતના રાજ્યોમાં પણ તાપમાન ધીમે ધીમે ઘટશે.

ગાઢ ધુમ્મસની ચેતવણી

હવામાન વિભાગે ઘણા રાજ્યોમાં ગાઢ ધુમ્મસ અંગે ચેતવણી આપી છે. પંજાબ, હરિયાણા, ઉત્તર પ્રદેશ, બિહાર, રાજસ્થાન, ઝારખંડ અને મધ્ય પ્રદેશમાં આગામી દિવસોમાં સવાર અને રાત્રે ધુમ્મસ છવાયેલું રહી શકે છે. ધુમ્મસને કારણે દૃશ્યતા ઘટશે, જેના કારણે રોડ, રેલ અને હવાઈ ટ્રાફિકને અસર થઈ શકે છે.

આ પણ વાંચો : મહારાષ્ટ્ર મ્યુનિસિપલ ચૂંટણીમાં મહાયુતિએ 288 માંથી 215 બેઠકો જીતી, MVAનો સફાયો

પંજાબથી બિહાર સુધી ‘કોલ્ડ ડે’

કેટલાક રાજ્યોમાં ‘ઠંડા દિવસો’ રહેવાની શક્યતા છે, જ્યાં દિવસ દરમિયાન પણ તાપમાન સામાન્ય કરતાં ઓછું રહેશે. ખાસ કરીને પંજાબ, હરિયાણા, દિલ્હી, ઉત્તર પ્રદેશ અને બિહારમાં લોકો દિવસભર ઠંડીનો અનુભવ કરશે. ખેડૂતોને પણ પાકની સુરક્ષા માટે સાવચેતી રાખવાની સલાહ આપવામાં આવી છે.

બધા જ સમાચાર અને અપડેટ્સ મેળવવા માટે પ્લે સ્ટોર/ એપ સ્ટોર પર જઈને અથવા આ લાઈન પર ક્લિક કરીને ડાઉનલોડ કરો અમારી લેટેસ્ટ એપ