એક્શન / 5 આતંકીઓની ધરપકડ, PM મોદીના જન્મદિન પહેલા દિલ્હી પોલીસને મોટી સફળતા, હતું બોમ્બ બ્લાસ્ટનું ષડયંત્ર

Delhi Police Terror Operation : દિલ્હી પોલીસના સ્પેશિયલ સેલ અને કેન્દ્રીય એજન્સીઓ દ્વારા કરવામાં આવેલા સંયુક્ત ઓપરેશનમાં એક મોટા આતંકવાદી કાવતરાને નિષ્ફળ બનાવવામાં સફળતા મળી છે. દેશની રાષ્ટ્રીય રાજધાની દિલ્હીમાં બોમ્બ વડે ભયાનક હુમલો કરવાની જહેમત લેનાર ISISથી પ્રેરિત આતંકી મોડ્યુલને વેળાએ જ પકડી પાડવામાં આવ્યો છે. તંત્ર દ્વારા દિલ્હી, મુંબઈ અને ઝારખંડમાં ચાલી રહેલા વિવિધ ઓપરેશનો દરમિયાન કુલ 5 આતંકવાદીઓને ઝડપી લેવામાં આવ્યા છે. આ સફળ કાર્યવાહીને ભારતની આંતરિક સુરક્ષાની દ્રષ્ટિએ મહત્વપૂર્ણ માનવામાં આવી રહી છે.

ધરપકડ થયેલા આતંકવાદીઓ અને તેમની ભૂમિકા

બુધવારે મુંબઈના રહેવાસી બે શંકાસ્પદ આતંકવાદીઓ આફતાબ અને સુફિયાનને દિલ્હીમાંથી ઝડપવામાં આવ્યા હતા. તપાસ દરમિયાન બંને પાસે હથિયારો અને IED (ઇમ્પ્રોવાઈઝ્ડ એક્સપ્લોઝિવ ડિવાઈસ) બનાવવાની સામગ્રી મળતા સંભવિત હુમલાની ઘાતકી યોજના બહાર આવી હતી. તેમજ ઝારખંડના રાંચી શહેરથી અશર દાનિશ નામના તૃતીય આતંકીને પણ ઝડપી લેવામાં આવ્યો હતો. પોલીસે તેની ધરપકડ સમયે તેના નિવાસસ્થાનમાંથી રાસાયણિક IED બનાવવાની સામગ્રી જપ્ત કરી છે, જે ઘણી ગંભીર બાબત છે.

મોડ્યુલના સભ્યો રાસાયણિક બોમ્બ બનાવવામાં નિષ્ણાત

પોલીસના સૂત્રો મુજબ આ મોડ્યુલના ઘણા સભ્યો રાસાયણિક બોમ્બ બનાવવામાં નિષ્ણાત છે. મોડી રાતે મળેલી ગુપ્ત માહિતી અને ટેકનિકલ સર્વેલન્સના આધારે પોલીસે વધુ બે શંકાસ્પદોને પણ ઝડપી લીધા છે. આ રીતે, કુલ પાંચ આતંકવાદીઓને અત્યારે કસ્ટડીમાં લેવાયા છે.

દિલ્હીમાં વિશાળ આતંકી હુમલાની તૈયારી

પ્રાપ્ત માહિતી અનુસાર, આ આતંકવાદી નેટવર્ક દ્વારા દિલ્હીમાં મોટા પાયે આતંકી હુમલાની યોજના રચવામાં આવી રહી હતી. જેમા સામાન્ય જનતા અને અગત્યના લક્ષ્યોને નિશાન બનાવવાની શકયતા હતી. રાસાયણિક બોમ્બનો ઉપયોગ કરીને મોટી તબાહી લાવવાનો ષડયંત્ર રચાયું હતું.

આ પણ વાંચો : 75માં જન્મદિવસે મોહન ભાગવત પર PM મોદીએ લખ્યો આર્ટિકલ, વાંચો VTV પર

શું કહ્યું દિલ્હી પોલીસે ?

દિલ્હી પોલીસના સ્પેશિયલ સેલના વરિષ્ઠ અધિકારીએ જણાવ્યું હતું કે, આ કાર્યવાહી ભારત માટે એક મોટી સફળતા છે. જેના દ્વારા એક વિકટ ખતરો ટળી ગયો છે. અમારું તફતીષી કામ સતત ચાલુ છે અને ટૂંક સમયમાં વધુ ખુલાસાઓ થવાની સંભાવના છે. દિલ્હી પોલીસ તરફથી જણાવાયું છે કે, સમગ્ર કેસમાં કેટલાક આંતરરાષ્ટ્રીય કડિયા હોવાની પણ શક્યતા છે, જેને લઈ એજન્સીઓ સક્રિય તપાસ કરી રહી છે. શંકા વ્યક્ત કરવામાં આવી છે કે આ આતંકવાદીઓની પાછળ કોઈ વિશાળ ગ્લોબલ નેટવર્ક કામ કરી રહ્યું હતું. ટૂંક સમયમાં પોલીસ દ્વારા પ્રેસ કોન્ફરન્સ યોજીને વધુ માહિતી જાહેર કરાશે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ