સાવધાન! / દિલ્હીમાં મંકીપોક્સનો વધુ એક કેસ નોંધાતા હડકંપ, દેશમાં કુલ કેસનો આંકડો 14 એ પહોંચ્યો

• દિલ્હીમાં વધુ એક મંકીપોક્સનો કેસ નોંધાયો 
• દર્દી નાઈજિરિયન નાગરિક
• દેશમાં હવે 14 દર્દીઓ 

 રાજધાની દિલ્હીમાં સોમવારે મંકીપોક્સનો નવો કેસ મળી આવ્યો હતો. મંકીપોક્સ વાયરસથી સંક્રમિત આ દર્દી નાઈજિરિયન નાગરિક છે, જે હાલમાં દિલ્હીમાં રહે છે.

દેશમાં દર્દીઓનો આંકડો 14 એ પહોંચ્યો 

દિલ્હીમાં મંકીપોક્સ વાયરસથી સંક્રમિત નવા દર્દીના આગમન સાથે, દેશમાં મંકીપોક્સથી સંક્રમિત લોકોની સંખ્યા 14 પર પહોંચી ગઈ છે. આમાંના મોટાભાગના દર્દીઓ એવા લોકો છે જેમની પાસે એવા દેશોની ટ્રાવેલ હિસ્ટ્રી છે જ્યાં વાયરસ ઝડપથી ફેલાયો છે.

શુક્રવારે દિલ્હીમાં નાઈજીરિયાની 30 વર્ષની એક મહિલા મંકીપોક્સથી સંક્રમિત મળી આવી છે. સૂત્રોએ જણાવ્યું કે મહિલાને લોક નાયક જય પ્રકાશ નારાયણ હોસ્પિટલમાં સારવાર માટે દાખલ કરવામાં આવી છે. તેમણે કહ્યું હતું કે અન્ય એક મહિલાને મંકીપોક્સથી સંક્રમિત થવાની આશંકા છે અને તેને પણ દિલ્હીની સરકારી હોસ્પિટલમાં દાખલ કરવામાં આવી છે.

30 વર્ષની મહિલા સંક્રમિત, વધુ એક શંકાસ્પદ 

સૂત્રોએ જણાવ્યા અનુસાર “દિલ્હીમાં અત્યાર સુધીમાં મંકીપોક્સના આઠ કેસ નોંધાયા છે. તાજેતરમાં એક 30 વર્ષની મહિલા સંક્રમિત છે અને તેને એલએનજેપી હોસ્પિટલમાં દાખલ કરવામાં આવી છે. તેણીની સ્થિતિ પર નજર રાખવામાં આવી રહી છે.” અન્ય એક સૂત્રએ જણાવ્યું હતું કે અન્ય મહિલા કે જે સંક્રમિત હોવાની શંકા છે, તે પણ નાઇજિરિયન છે અને તેને 14 સપ્ટેમ્બરે હોસ્પિટલમાં દાખલ કરવામાં આવી હતી.