રિટેલર્સ રોષે / .નહીં તો ઓનલાઇન ભાવે જ ફોન વેચીશું, જાણો કેમ રિટેઇલર્સે મલ્ટી નેશનલ કંપનીઓ સામે બાંયો ચઢાવી

• મોબાઈલ રિટેઇલર્સે ઉગ્રતા દાખવી
• ઇ-કોમર્સ પ્લેટફોર્મના ભાવે જ મોબાઈલ વેચવાની માંગ
• રિટેઇલર્સને મોટી નુકસાની ભોગવી પડે છે

આજના યુગમાં લોકો ઓનલાઇન શોપિંગ વધારે કરી રહ્યા છે. દુકાનમાં જવાનુ અને પૈસા વધારે આપવાના આવુ વિચારીને લોકો ઓછા ભાવે ઓનલાઇન મળતી વસ્તુઓ પહેલા ખરીદવાનો આગ્રહ રાખે છે પરિણામે મોબાઇલ માર્કેટ પર આની ગંભીર અસરો જોવા મળી છે. મોબાઇલ રિટેલર્સનું કહેવુ છે કે ઇ-કોમર્સ પ્લેટફોર્મ પર જે ભાવે મોબાઇલ આપવામાં આવે છે તે ભાવે જ રિટેલર્સને પણ આપવામાં આવે.  જેથી ગ્રાહકો રિટેલર્સ પાસેથી મોબાઇલ ખરીદે. ઓનલાઇન ઓછો ભાવ હોવાથી ગ્રાહકો મોબાઇલ રિટેલર્સ પાસેથી ખરીદતા નથી.

રિટેલર્સે શું ઉચ્ચારી ચીમકી

મોબાઇલની મલ્ટી નેશનલ કંપનીઓ સામે મોબાઈલ રિટેઇલર્સે બાંયો ચઢાવી છે. ઇ-કોમર્સ કંપનીઓના પ્રમાણમાં રિટેઇલર્સને ફોન મોંઘા આપવામાં આવી રહ્યા છે. આથી ઓલ ઇન્ડિયા મોબાઈલ રિટેઇલર્સ એસોસિએશને અલગ અલગ મોબાઈલ કંપનીઓને પત્ર લખી ઇ-કોમર્સ પ્લેટફોર્મના ભાવે જ રિટેઇલર્સને પણ સેલફોન આપવા માંગ કરી છે. આ સાથે જ ચીમકી પણ ઉચ્ચારવામાં આવી છે કે જો ઇ-કોમર્સના ભાવે જ સેલફોન નહીં આપે તો ઓનલાઈન ભાવે જ ફોન વેચશે. અને ભાવફેરની ડેબિટ નોટ જે-તે કંપનીએ ભોગવવાની રહેશે.

રિટેલર્સને શું છે સમસ્યા

ઇ-કોમર્સ કંપનીઓના પ્રમાણમાં રિટેઇલર્સને ફોન મોંઘા આપવામાં આવી રહ્યા છે પરિણામે સ્ટોરમાં અને ઓનલાઇન શોપિંગમાં ભાવમાં વધારે ફરક જોવા મળે છે. આ કારણોસર ગ્રાહક ઓછા ભાવે ઓનલાઇન મોબાઇલની ખરીદી કરે છે જેથી રિટેલર્સને નુકસાન વેઠવાનો વારો આવે છે.

શું કહે છે નિષ્ણાંતો

નિષ્ણાતો જણાવે છે કે ઓનલાઈન-ઓફલાઇન ભાવમાં એક હજાર થી 15 હજાર સુધી ભાવ ફેર હોય છે.. જેના કારણે ગ્રાહકો ઓનલાઈન મોબાઈલ ની ખરીદી કરવામાં માનતા હોવાથી રિટેઇલર્સને નુકસાની ભોગવવાનો વારો આવે છે.. આગામી સમયે આવનાર સેલ ને લઈ રિટેઇલર્સે કંપનીઓને ચેતવણી સમાન પત્ર લખ્યો છે.