તમારા કામનું / GST લાગુ થયા બાદ પણ ઓછા ભાવ પર સામાન નથી મળતો? અહીં કરો ફરિયાદ

દેશભરમાં 22 સપ્ટેમ્બરથી નવાં GST દર લાગુ થઈ ગયા છે. સરકારે અનેક વસ્તુઓ પર ટેક્સ ઘટાડ્યો છે જેથી સામાન્ય જનતાને સીધો ફાયદો મળે. સાથે જ કંપનીઓને પણ સ્પષ્ટ સૂચના આપવામાં આવી છે કે જૂના સ્ટોક પર નવાં રેટના સ્ટિકર ચોંટાડવા ફરજિયાત છે, જેથી ગ્રાહકને સાચી કિંમતોની જાણ થાય.

એક જ વસ્તુ પર જોઈ શકાશે બે MRP

નવાં GST દર લાગુ થતા બજારમાં એક જ વસ્તુ પર બે અલગ-અલગ ભાવ લખેલા જોવા મળી શકે છે. એક જૂનો અને બીજો નવો ભાવ. આવી સ્થિતિમાં તમારે માત્ર નવાં GST દર મુજબની સાચી કિંમત જ ચૂકવવી પડશે. એટલે ખરીદી કરતી વખતે ખાતરી કરો કે પ્રોડક્ટ પર નવી MRP લગાવેલી છે કે નહીં?

ઘણા નાના દુકાનદારો જૂના ભાવ પર જ સામાન વેચી દે છે, જેના કારણે ગ્રાહકને ટેક્સ ઘટાડાનો લાભ મળતો નથી. આવી પરિસ્થિતિમાં ગ્રાહકે ચૂપ ન બેસવું જોઈએ પરંતુ સીધી ફરિયાદ કરવી જોઈએ. સરકાર દ્વારા ફરિયાદ કરવા માટે સરળ રીતો પણ આપવામાં આવી છે જેથી ગ્રાહકને તેમનો હક મળી રહે.

ક્યાં અને કેવી રીતે કરશો ફરિયાદ?

જો કોઈ દુકાનદારે તમને ખોટા ભાવ પર સામાન વેચ્યો હોય અથવા GST ઘટ્યા બાદ પણ વધારે પૈસા લીધા હોય, તો તેની ફરિયાદ સરળતાથી કરી શકાય છે અને તે પણ એકદમ ફ્રીમાં.

• તે માટે સરકારની વેબસાઇટ consumerhelpline.gov.in પર જઈને ફરિયાદ નોંધાવી શકાય છે.
• સૌપ્રથમ આ વેબસાઇટ પર રજીસ્ટ્રેશન કરવું પડશે, ત્યારબાદ OTPથી લોગિન કરીને ફરિયાદનું સંપૂર્ણ વર્ણન લખવું પડશે.
• સાથે જ જરૂરી દસ્તાવેજો જેમ કે બિલ, ફોટોઝ વગેરે અપલોડ કરવા પડશે.
• જો વેબસાઇટ વાપરવામાં મુશ્કેલી હોય તો તમે ટોલ-ફ્રી નંબર 1915 પર કોલ કરીને પણ ફરિયાદ કરી શકો છો.
• ઉપરાંત મોબાઇલ નંબર 8800001915 પર WhatsApp કે SMS મોકલીને પણ તમારી વાત મૂકી શકો છો.
• National Consumer Helpline App અથવા UMANG App મારફતે પણ ફરિયાદ શક્ય છે.

આ તમામ માધ્યમોથી કરાયેલી ફરિયાદો સીધી સરકાર સુધી પહોંચે છે અને તેને ગંભીરતાથી લેવામાં આવે છે.

View this post on Instagram

A post shared by VTV Gujarati News and Beyond (@vtv_gujarati_news)

પ્રોડક્ટની સાચી કિંમત કેવી રીતે જાણવી?

ઘણી વાર એવું થાય છે કે GST ઘટ્યા બાદ પણ દુકાનદાર જૂની જ કિંમત વસૂલે છે. આવી પરિસ્થિતિમાં ગ્રાહકને સમજાતું નથી કે સાચી કિંમત કેટલી હોવી જોઈએ? આ મુશ્કેલી દૂર કરવા માટે સરકારે એક ખાસ વેબસાઇટ savingwithgst.in શરૂ કરી છે. અહીં તમે કોઈપણ પ્રોડક્ટનું નામ નાખીને જાણી શકો છો કે GST ઘટ્યા પછી તેની સાચી કિંમત કેટલી થવી જોઈએ.

વધુ વાંચો : ઓનલાઈન સેલમાં સસ્તી ઓફર્સની લાલચ જોજો મોંઘી ન પડે! લોકો સાથે આ રીતે થાય છે ફ્રોડ

સરકારનું સ્પષ્ટ કહેવું છે કે GSTના દરમાં થયેલા ઘટાડોનો દરેક લાભ સીધો ગ્રાહકોને આપવો ફરજિયાત છે.જો તમારી સાથે પણ આ બાબતે કોઈ અન્યાય થાય છે તો તમે પણ ગ્રાહક તરીકે ફરિયાદ કરી શકો છો.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ