ટેક ટિપ્સ / આખો દિવસ ચાલશે તમારા મોબાઈલની બેટરી! સ્માર્ટફોનમાં બદલો આ 5 સેટિંગ

આજકાલ સ્માર્ટફોન આપણા જીવનનો અગત્યનો ભાગ બની ગયો છે. આપણે અનેક કાર્યો માટે સ્માર્ટફોન પર આધાર રાખીએ છીએ. પરંતુ સ્માર્ટફોનની બેટરી ઝડપથી ખૂટી જાય તો તે એક મોટી સમસ્યા બની ગઈ છે. તેનો ઉપયોગ ઘટાડ્યા વગર પણ ફોનની બેટરી લાઇફ વધારી શકાય છે. બેટરી ખૂટી જવાની સમસ્યાથી બચવા માટે નીચે આપેલા પાંચ શ્રેષ્ઠ ઉપાય અપનાવશો તો લાભ મળશે.

પાવર સેવિંગ મોડ વાપરો

મોટાભાગના નવા સ્માર્ટફોનમાં બિલ્ટ-ઇન બેટરી સેવર અથવા પાવર સેવિંગ મોડ હોય છે. આ મોડ ફોનની બેકગ્રાઉન્ડ એક્ટિવિટી ઓછી કરે છે, સ્ક્રીનની તેજસ્વિતા ઘટાડી આપે છે અને બેટરી બચાવવા માટે પરફોર્મન્સમાં થોડી મર્યાદા લાવે છે. જ્યારે ફોનમાં ચાર્જિંગ ઓછું હોય, ત્યારે આ એક ઉત્તમ વિકલ્પ બની શકે છે.

બેકગ્રાઉન્ડ એપ્લિકેશન્સ અને ઑટો-સિંક બંધ કરો

ફોનમાં ઘણી એપ્લિકેશન્સ બંધ કર્યા પછી પણ બેકગ્રાઉન્ડમાં ચાલી રહી હોય છે. સોશિયલ મીડિયા પ્લેટફોર્મ, ઈમેલ, મેસેજિંગ એપ્લિકેશન્સ સતત ઑટો-સિંક ફીચર દ્વારા અપડેટ થતી રહે છે. આ કારણે બેટરી ઝડપથી ખૂટી જાય છે. ફોનની સેટિંગ્સમાં જઈને ઉપયોગ ન થતી એપ્લિકેશન્સ બંધ કરો અથવા તેમની બેકગ્રાઉન્ડ એક્ટિવિટી પર મર્યાદા મૂકો. જરૂરી ન હોય તેવી એપ્લિકેશન્સ માટે ઑટો-સિંક બંધ કરવાથી બેટરી વધુ ચાલશે.

સ્ક્રીનની તેજસ્વિતા અને ટાઈમઆઉટ સેટિંગ્સમાં ફેરફાર કરો

તમારા ફોનની બેટરી સૌથી વધુ સ્ક્રીનના ઉપયોગથી ખૂટી જાય છે. સ્ક્રીનને 100% બ્રાઈટનેસ પર રાખવી અને ટાઈમઆઉટ વધારે રાખવો બેટરીને ઝડપથી ખતમ કરે છે. ફોનમાં ઓટો-બ્રાઈટનેસ ચાલુ કરો અથવા બ્રાઈટનેસ ઓછી કરો. ઉપરાંત, ફોનનો ઉપયોગ ન કરતાં હોય ત્યારે સ્ક્રીન 15-30 સેકંડમાં બંધ થાય એવી સેટિંગ રાખો.

લોકેશન સર્વિસ અને કનેક્ટિવિટી ફીચર્સ બંધ કરો

GPS, બ્લૂટૂથ, Wi-Fi, મોબાઇલ ડેટા જેવી સુવિધાઓ બેટરી ખૂબ ઝડપથી ખતમ કરે છે. જો તમને હંમેશાં આ સર્વિસની જરૂર નથી હોતી, તો તેને બંધ રાખો. ઓછી નેટવર્ક કવરેજ ધરાવતા વિસ્તારોમાં ફોન સતત સિગ્નલ શોધવામાં બેટરી વાપરે છે. આવી સ્થિતિમાં એરોપ્લેન મોડ ચાલુ કરવો યોગ્ય રહેશે.

સોફ્ટવેર અને એપ્લિકેશન્સ અપડેટ કરો

સોફ્ટવેર અપડેટમાં ઘણીવાર બેટરી ઓપ્ટિમાઈઝેશન અને બગ ફિક્સેસ સામેલ હોય છે. જૂના વર્ઝનનો ઉપયોગ કરવાથી ફોનની કામગીરી ધીમી પડે છે અને બેટરી વધુ વપરાય છે.

વધુ વાંચો: WhatsAppમાં આવો ફોટો આવે તો ડાઉનલોડ ન કરતા, એક ક્લિક અને બેંક ખાતુ ખાલીખમ!

તમારા ઓપરેટિંગ સિસ્ટમ અને એપ્લિકેશન્સ હંમેશાં અપડેટ રાખો જેથી નવી સુવિધાઓનો લાભ મળી શકે અને બેટરી પણ લાંબો સમય ચાલે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ