મહામંથન / પરીક્ષાઓમાં ગેરરીતિની વણઝાર વિદ્યાર્થીઓ લાચાર

રાજ્યમાં લેવાયેલી બિનસચિાલય ક્લાર્કની પરીક્ષાને લઈને એકબાદ એક ચોંકાવનારા ખુલાસાઓ સામે આવી રહ્યા છે. ગત તારીખ 17 નવેમ્બરના રોજ લેવાયેલી બિન સચિવાલય ક્લાર્કની પરીક્ષાનું પેપર લીક થયું હોવાનો વિદ્યાર્થીઓ આરોપ લગાવી રહ્યા છે. ત્યારે આ સમગ્ર મામલે મહામંથનમાં મહાચર્ચા...

17 નવેમ્બરે સવારે 11-6 મિનિટે આ પેપર સોશિયલ મીડિયામાં ફરતુ થયું હોવાનો વિદ્યાર્થીઓ આરોપ લગાવી રહ્યા છે. વિદ્યાર્થીઓએ દાવો કર્યો છે કે ક્લાર્કની પરીક્ષા 12 વાગે લેવાવાની હતી તે પહેલા પેપર સોશિયલ મીડિયામાં વાયરલ થઈ ગયું હતું. જેના કારણે લાખો વિદ્યાર્થીઓના ભાવી પર સવાલ ઉભા થઈ રહ્યા છે. કેટલાક વિદ્યાર્થીઓએ એ પણ દાવો કર્યો છે કે કેટલાક સ્થળે સીલ તુટેલા પેપર નીકળ્યા હતા પરંતુ સમગ્ર ઘટનાને દબાવવાનો પ્રયાસ કરવામાં આવ્યો હતો. વિદ્યાર્થીઓએ એ પણ આરોપ લગાવ્યો કે ઉચ્ચ સ્તરે આ મામલે કોઈ તપાસ ન થઈ અને સમગ્ર મામલાને ભીનું સંકેલવાનો પણ પ્રયાસ કરવામાં આવ્યો છે. મહત્વનું છે કે અગાઉ એલઆરડીનું પેપર લીક થયું હતુ જેને પગલે ફરીથી પરીક્ષાનું આયોજન કરાયું. ત્યારે હવે બિન સચિવાલય ક્લાર્કની પરીક્ષાનું પેપર ખરેખર લીક થયું છે કે પછી ખોટા દાવા કરાઈ રહ્યા છે તેને લઈને સવાલો ઉભા થયા છે.