ફરિયાદ / અમદાવાદમાં IPL ટાણે ચોર ટોળકી સક્રિય, સંખ્યાબંધ મોબાઇલ ફોન સહિત ચેઇનની ઉઠાંતરી

• આઇપીએલની મેચ દરમ્યાન ચોર ટોળકી સક્રિય
• ગત રોજ નરેન્દ્ર મોદી સ્ટેડિયમમાંથી સંખ્યાબંધ મોબાઈલ તેમજ ચેઈનની ચોરી થઈ
• ચાંદખેડા પોલીસ મથકે સંખ્યાબંધ મોબાઈલ ચોરીની  ફરિયાદ નોંધાઈ

 અમદાવાદમાં જ્યારે પણ આઇપીએલની કોઇ પણ મેચ રમાય ત્યારે ગઠિયાઓ ચોરી કરવા માટે સક્રિય થતા હોય છે. ગઇ કાલે સાંજે ગુજરાત ટાઇટન્સ અને રાજસ્થાન રોયલ્સની મેચ નરેન્દ્ર મોદી સ્ટેડિયમ ખાતે રમાઇ હતી. જેમાં સંખ્યાબંધ મોબાઇલ ફોન તેમજ ચેઇનની ચોરી થઇ છે. ચાંદખેડા પોલીસે બે ગુના દાખલ કર્યો છે. જેમાં ઓસ્ટ્રેલિયામાં રહેતા વડોદરાના યુવકની સોનાની ચેઇન ચોરાઇ છે જ્યારે અમદાવાદ જિલ્લાના દેત્રોજ ખાતે રહેતા યુવકનો મોબાઇલ ચોરાયો છે. 

ઓસ્ટ્રેલિયાનાં યુવકે ફરિયાદ નોંધાવી
વડોદરાના આઇટીઆઇ રોડ પાસે આવેલી ભાગ્યલક્ષ્મી સોસાયટીમાં રહેતા અને હાલમાં ઓસ્ટ્રેલિયામાં ધંધો કરતા અલ્પેશ બોરસેએ ચાંદખેડા પોલીસ સ્ટેશનમાં ચોરીની ફરિયાદ કરી છે. ગઇ કાલે અમદાવાદના નરેન્દ્ર મોદી સ્ટેડિયમ ખાતે રમાયેલી ગુજરાત ટાઇટન્સ અને રાજસ્થાન રોયલ્સની મેચ જોવા માટે વડોદરાના અલ્પેશ બોરસે તેની પત્ની, સાળો તેમજ સાળી સાથે આવ્યાં હતાં. રાતે મેચમાં ઇન્ટરવલ પડતાં અલ્પેશ ચા પાણી નાસ્તો તેમજ પાણી લેવા માટે પિલર નંબર ૨૫૧ની સામે ગયા હતા. જ્યાં ભીડનો લાભ લઇને ગઠિયાએ તેમના ગળામાંથી ચેઇન ચોરી લીધી હતી. 

દેત્રોજનાં યુવકનો પણ મોબાઈલ ચોરાયો
બીજી તરફ અમદાવાદ જિલ્લાના દેત્રોજ ખાતે રહેતા અશોક પટેલે પણ મોબાઇલ ચોરીની ફરિયાદ કરી છે. અશોક પટેલ પોતાના ગ્રૂપ સાથે મેચ જોવા માટે આવ્યા હતા ત્યારે ગઠિયાએ તેમના મોબાઇલ ફોનની ચોરી કરી હતી. અશોક પટેલ મેચ જોવા માટે જતા હતા ત્યારે ગઠિયાએ મોબાઇલ ચોરી લીધો હતો. અશોક પટેલે મેચ જોવા જવાનું મૂકીને સીધા ચાંદખેડા પોલીસ સ્ટેશનમાં પહોંચીને ફરિયાદ આપી હતી. ચાંદખેડા પોલીસે આ મામલે ચોરીનો ગુનો દાખલ કરીને તપાસ શરૂ કરી છે.