- PM મોદીના જન્મદિવસે ભારત માટે એકસાથે 2 સૌથી સારા સમાચાર
- અમેરિકન માઈક્રોન ટેક્નોલોજી કંપની સેમિકન્ડક્ટર એસેમ્બલી અને પેકેજિંગ પ્લાન્ટ સ્થાપશે
- તાઈવાનની કોન્ટ્રાક્ટ મેન્યુફેક્ચરિંગ ફર્મ ફોક્સકોન કંપની 600 મિલિયન ડોલરનું રોકાણ કરશે
વડાપ્રધાન નરેન્દ્ર મોદીના જન્મદિવસે ભારત માટે એકસાથે 2 સૌથી મોટા અને સારા સમાચાર સામે આવ્યા છે. વાત જાણે એમ છે કે, દેશને સેમિકન્ડક્ટરની બાબતમાં આત્મનિર્ભર બનાવવાના પ્રયાસોને સફળતા મળવા લાગી છે. ઘણી વિદેશી કંપનીઓએ ભારત માટે મોટી યોજનાઓ તૈયાર કરી છે અને આવનારા દિવસોમાં મેન્યુફેક્ચરિંગમાં મોટું રોકાણ કરવા જઈ રહી છે. આનાથી માત્ર ભારતને આત્મનિર્ભર બનવામાં મદદ મળશે નહીં પરંતુ ચીનને વિશ્વની ફેક્ટરી તરીકે બદલવાના તેના પ્રયાસોને પણ મજબૂત બનાવશે.
અહીંથી આવ્યા સારા સમાચાર
આ સપ્તાહની શરૂઆત ભારત માટે મેન્યુફેક્ચરિંગ મોરચે બે સારા સમાચાર સાથે થઈ છે. એક સારા સમાચાર અમેરિકન સેમિકન્ડક્ટર કંપની માઈક્રોન ટેક્નોલોજી લિમિટેડ તરફથી આવ્યા છે, જ્યારે બીજા સારા સમાચાર તાઈવાનની કોન્ટ્રાક્ટ મેન્યુફેક્ચરિંગ ફર્મ ફોક્સકોન તરફથી આવ્યા છે. માઈક્રોન આવનારા સમયમાં ભારતમાં ઘણા સેમિકન્ડક્ટર એસેમ્બલી અને પેકેજિંગ પ્લાન્ટ સ્થાપવા જઈ રહી છે. આ પ્લાન્ટ્સ સૂચિત ફેબ્રિકેશન યુનિટથી અલગ હશે.
ફોક્સકોનનો પ્લાન શું છે ?
તાઈવાનની કોન્ટ્રાક્ટ મેન્યુફેક્ચરિંગ ફર્મ ફોક્સકોને ભારતમાં તેના રોકાણ અને કર્મચારીઓની સંખ્યા બમણી કરવાની તૈયારી કરી છે. ફોક્સકોનના ભારતના પ્રતિનિધિ વેઈ લીએ વડાપ્રધાન નરેન્દ્ર મોદીના જન્મદિવસના અવસર પર લિંક્ડઈન પોસ્ટમાં આ માહિતી આપી હતી. તેમણે રવિવારે જણાવ્યું કે, તેમની કંપની આગામી એક વર્ષમાં ભારતમાં તેનું રોકાણ બમણું કરવાની યોજના ધરાવે છે. આ ઉપરાંત, કંપની આગામી 12 મહિનામાં તેના કર્મચારીઓની સંખ્યા પણ બમણી કરશે.
તમિલનાડુમાં ચાલી રહી છે ફેક્ટરી
ફોક્સકોન એ વિશ્વની સૌથી મોટી કોન્ટ્રાક્ટ મેન્યુફેક્ચરિંગ ફર્મ અને એપલની સૌથી મોટી સપ્લાયર છે. અત્યાર સુધી ચીન ફોક્સકોનનું ઉત્પાદન હબ રહ્યું છે, પરંતુ હવે તાઈવાનની કંપની ભારત પર ફોકસ કરી રહી છે. કંપની પહેલાથી જ તમિલનાડુમાં iPhone ફેક્ટરી ચલાવી રહી છે, જેમાં લગભગ 40 હજાર લોકો કામ કરી રહ્યા છે.
થોડા વર્ષોમાં ચીન જેવો સ્તર
ફોક્સકોન કર્ણાટકમાં પ્લાન્ટ સ્થાપવા જઈ રહી છે. કર્ણાટક સરકારે ગયા મહિને કહ્યું હતું કે કંપની 600 મિલિયન ડોલરનું રોકાણ કરશે અને આઇફોન અને ચિપ્સ બનાવવા માટે રાજ્યમાં બે પ્લાન્ટ સ્થાપશે. ફોક્સકોનની પેરેન્ટ કંપની હોન હૈ ટેક્નોલોજી ગ્રુપના ચેરમેન અને સીઈઓ યંગ લિયુએ ગયા મહિને કહ્યું હતું કે, ભારત ઇકોસિસ્ટમનું તે સ્તર હાંસલ કરશે જે ચીનને થોડા વર્ષોમાં બનાવવામાં 30 વર્ષ લાગ્યા હતા. તેમણે ભારતને મેન્યુફેક્ચરિંગનું ભવિષ્ય પણ ગણાવ્યું હતું.
ફોક્સકોન ભારતમાં પણ એક ચિપ મેન્યુફેક્ચરિંગ યુનિટ સ્થાપવા જઈ રહી છે. અગાઉ કંપનીએ આ માટે વેદાંત સાથે ભાગીદારી કરી હતી અને ગુજરાતમાં પ્લાન્ટ માટેનું લોકેશન પણ નક્કી કરવામાં આવ્યું હતું, પરંતુ બાદમાં બંને કંપનીઓએ અલગ-અલગ આગળ વધવાની જાહેરાત કરી હતી. તાજેતરમાં બ્લૂમબર્ગના અહેવાલમાં દાવો કરવામાં આવ્યો છે કે, ફોક્સકોનને તેનો પોતાનો ભાગીદાર મળી ગયો છે અને તેણે સેમિકન્ડક્ટર પ્લાન્ટ માટે સરકારી મદદ માટે અરજી કરી છે.
માઇક્રોનનો પ્લાન શું છે ?
અમેરિકન સેમિકન્ડક્ટર કંપની માઈક્રોનના પ્લાનની વાત કરીએ તો તેની માહિતી ઈલેક્ટ્રોનિક્સ અને ઈન્ફોર્મેશન ટેક્નોલોજી રાજ્ય મંત્રી રાજીવ ચંદ્રશેખરે આપી છે. માઈક્રોને આ વર્ષે જુલાઈમાં સેમિકોન ઈન્ડિયા 2023 ઈવેન્ટ દરમિયાન ભારતમાં તેના આયોજિત રોકાણ વિશે માહિતી આપી હતી. કંપનીએ ભારતમાં સેમિકન્ડક્ટર એસેમ્બલી પ્લાન્ટ સ્થાપવા માટે $800 મિલિયનના રોકાણની જાહેરાત કરી હતી. કંપનીનો આ પ્લાન્ટ ગુજરાતના સાણંદમાં સ્થાપિત થવા જઈ રહ્યો છે. મંત્રીનું કહેવું છે કે, પ્રથમ પ્લાન્ટના ઉદઘાટન બાદ માઈક્રોન ભારતમાં અન્ય ઘણા પ્લાન્ટ પણ સ્થાપશે.
