ટીમ ઇન્ડિયા એડિલેડમાં ડે-નાઇટ ટેસ્ટની બીજી ઇનિંગ્સમાં ભારતીય ક્રિકેટના ઇતિહાસમાં સૌથી ઓછા - ૩૬ રનના સ્કોર પર આઉટ થઈને પરાજિત થઈ, પરંતુ ટીમ ઇન્ડિયા મેલબર્ન મેદાનમાં પોતાના સારા રેકોર્ડને કારણે ચાર ટેસ્ટની શ્રેણીમાં વાપસીની આશા રાખી રહી છે.
ભારત-ઓસી. વચ્ચે બીજી ટેસ્ટ આવતી કાલે ૨૬ ડિસેમ્બરથી મેલબર્નમાં રમાવાની છે, જ્યાં ભારતીય રેકોર્ડ ઘણો સારો છે.
પ્રથમ મેચ માર્ચ-૧૮૭૭માં ઓસ્ટ્રેલિયા અને ઈંગ્લેન્ડ વચ્ચે રમાઈ હતી
મેલબર્નના ઐતિહાસિક મેદાનમાં ટેસ્ટ ઇતિહાસની પ્રથમ મેચ માર્ચ-૧૮૭૭માં ઓસ્ટ્રેલિયા અને ઈંગ્લેન્ડ વચ્ચે રમાઈ હતી. એ મેચ ઓસ્ટ્રેલિયાએ ૪૫ રનથી જીતી લીધી હતી. ભારતે મેલબર્નમાં પોતાની પ્રથમ ટેસ્ટ જાન્યુઆરી-૧૯૪૮માં રમી હતી, જેને ઓસ્ટ્રેલિયાએ ૨૨૩ રનથી જીતી લીધી હતી.
આ મેદાન ઉપર ભારતની પ્રથમ મેચ
ત્યાર બાદ ભારતે ફેબ્રુઆરી-૧૯૪૮માં આ જ મેદાન પર રમાયેલી ટેસ્ટ ઇનિંગ્સ અને ૧૭૭ રનથી ગુમાવી હતી. જાન્યુઆરી ૧૯૬૮માં ઓસ્ટ્રેલિયાએ ભારતને ઇનિંગ્સ અને ચાર પરથી પરાજિત કર્યું હતું.
ભારતે જાન્યુઆરી-૧૯૭૮માં ઓસ્ટ્રેલિયાને મેલબર્નમાં ૨૨૨ રને હરાવ્યું હતું. બંને ટીમ વચ્ચે ફેબ્રુઆરી-૧૯૮૧માં રમાયેલી ટેસ્ટ ટીમ ઇન્ડિયાએ ૫૯ રને જીતી લીધી હતી. ડિસેમ્બર-૧૯૮૫માં બંને ટીમનો મુકાબલો ડ્રો રહ્યો હતો. ૧૯૯૧માં ઓસ્ટ્રેલિયા આઠ વિકેટથી જીત્યું હતું.
ભારત મેલબર્નમાં પોતાના પાછલા પ્રદર્શનથી ઉત્સાહિત થઈને વાપસી કરવા તૈયાર
ડિસેમ્બર-૧૯૯૯માં પણ ઓસ્ટ્રેલિયાએ ૧૮૦ રનથી અને ડિસેમ્બર-૨૦૦૩માં નવ વિકેટે જીત હાંસલ કરી હતી. ડિસેમ્બર-૨૦૦૭માં ઓસ્ટ્રેલિયા ૩૩૭ રનથી અને ડિસેમ્બર-૨૦૧૧માં ૧૨૨ રનથી જીત્યું હતું. ડિસેમ્બર-૨૦૧૪નો મુકાબલો ડ્રો રહ્યો હતો. છેલ્લે આ મેદાન પર ડિસેમ્બર-૨૦૧૮માં બંને ટીમ ટકરાઈ હતી, એ ટેસ્ટ મેચ ટીમ ઇન્ડિયાએ ૧૩૭ રનથી જીતી લીધી હતી.
ભારતે ચેતેશ્વર પૂજારાના ૧૦૬ રનની મદદથી સાત વિકેટે ૪૩૩ રન બનાવીને ઇનિંગ્સ ડિકલેર કરી હતી. ઓસ્ટ્રેલિયાની ટીમ ૧૫૧ રનમાં જ ઓલઆઉટ થઈ ગઈ હતી, જેમાં જસપ્રીત બૂમરાહે ૩૩ રન આપીને છ વિકેટ ઝડપી હતી. ભારતે બીજી ઇનિંગ્સમાં આઠ વિકેટે ૧૦૬ રન બનાવીને ઇનિંગ્સ ડિકલેર કરી અને ઓસ્ટ્રેલિયા સામે ૩૯૯ રનનું લક્ષ્ય રાખ્યું હતું.
ઓસ્ટ્રેલિયાની ટીમ ૨૬૧ રનમાં જ સમેટાઈ ગઈ હતી. બૂમરાહ અને રવીન્દ્ર જાડેજાએ ત્રણ-ત્રણ વિકેટ ઝડપી હતી. બૂમરાહને મેન ઓફ ધ મેચ જાહેર કરવામાં આવ્યો હતો. આમ ભારત મેલબર્નમાં પોતાના પાછલા પ્રદર્શનથી ઉત્સાહિત થઈને વાપસી કરવા અને શ્રેણીમાં બરોબરી હાંસલ કરવાની આશા રાખી શકે છે.