ગુંડાગર્દી / સુરતમાં ખુલ્લી તલવારના જોરે, સનકી યુવકે યુવતી પર એસિડ એટેકની ધમકી આપી કર્યું એવું કે પરિવાર ઘર છોડવા મજબૂર

• સુરત કડોદરામાં અસામાજીક તત્વોનો આતંક 
• યુવતીની છેડતી કરી એસિડ એટેકની આપી ધમકી
• રાહુલસિંગ નામનો યુવક અવારનવાર કરતો હતો યુવતીને પરેશાન: પીડિત પરિવાર

સુરતમાં અસામાજિક તત્વોનો આતંક વધી રહ્યો છે. સરાજાહેર પરિવારને મારી નાખવાની ધમકી આપી નબીરો યુવતી પર એસિડ એટેકની ધમકી આપી રહ્યો છે. પીડિત પરિવાર 3 વર્ષથી લુખ્ખાતત્વોનો આતંક ઝેલી રહ્યો છે. અનેક વખત પોલીસને રજૂઆત કરવા છતાંય પોલીસ કઈક અઘટિત બને તેની રાહે બેઠી છે. હાલ આ યુવક ગુંડાગર્દી કરી મનફાવે તેમ વર્તન કરી રહ્યો છે. પણ ન કોઈ કાર્યવાહી થઇ રહી છે. ન કોઈ આવારાતત્વો સામે બોલવાની હિંમત કરી રહ્યું છે. પોલીસ પણ હાથ પર હાથ ધરી બેઠી છે. ફરિયાદ કરી તો સબૂત માંગે છે. સીસીટીવી યુવકના આતંકનો બોલતો પુરાવો છે. છતાંય પોલીસ હજુ નબીરાને છાવરી રહી છે. પીડિત પરિવાર ઘર છોડવા મજબૂર થયો છે.

રાહુલસિંહ નામના સનકી યુવકની દાદાગીરી
સુરતના કડોદરામાં યુવતીને એસિડ એટેકની ધમકી આપી એક શખ્સ ખુલ્લેઆમ દાદાગીરી કરી રહ્યાના આરોપ લાગી રહ્યા છે. સીસીટીવીમાં એક શખ્સ ખુલ્લેઆમ હાથમાં તલવાર લઈ સોસાયટીમાં સરાજાહેર પીડિત પરિવારને જોઇ લેવાની ધમકી આપી રહ્યો છે.સીસીટીવીમાં જે નબીરો  ગુંડાગર્દી કરી રહ્યો છે તેનું નામ છે રાહુલસિંગ.પરિવારનો આરોપ છે કે યુવક 3 વર્ષથી પરેશાન કરી રહ્યો છે. સોસાયટીમાં આવી કે યુવતી શાળાએ જાય તો પણ અવાર નવાર બબાલ કરતો રહે છે.પીડિત પરિવાર રાહુલસિંહના ત્રાસથી એટલો કંટાળી ગયો છે કે તે હવે જો પોલીસ કોઈ કાર્યવાહી ન કરે તો ઘર છોડવા મજબૂર થયો છે.અને કહી રહ્યો છે કે ઘટનાથી અમે ડરી ગયા છીએ. સાથે જ આસપાસ રહેતા પાડોશી પણ પીડિત પરિવારને ન્યાય મળે તેની માગણી કરી રહ્યા છે.

સુરત પોલીસે કેમ કોઈ કાર્યવાહી ન કરી?
છેલ્લા 3 વર્ષથી આરોપી રાહુલસિંહ સતત યુવતીને અભ્યાસ ન કરવા દબાણ કરી રહ્યો છે. અનેક વખત માર મારવાની ધમકી અને હવે એસિડ એટેકની ધમકી આપી રહ્યો છે. પરિવારના કહ્યા પ્રમાણે શાળા પ્રશાસનથી માંડી પોલીસના મોટા અધિકારીઑ સુધી નબીરાની હરકતોની ફરિયાદ કરવામાં આવી હતી. પણ આરોપ મુજબ પોલીસ દ્વારા એવું કહેવામાં આવ્યું છે કેજ્યાં સુધી કઇ થાય નહીં ત્યાં સુધી કાર્યવાહી ન કરી શકાય, એસિડ એટેકની ધમકી આપી તેના પુરાવા લાવો. ત્યારે CCTV ફૂટેજ યુવકના આતંકનો બોલતો પુરાવો છે. તો શું હવે નબીરા પર કડક કાર્યવાહી કરી કાયદાના પાઠ ભણાવાશે? એસિડ એટેકની ધમકી આપવીએ મોટો ગુનો છે પીડિતા કહી રહી છે કે યુવક હેરાન કરી રહ્યો છે તો શું સુરત પોલીસ યુવતી પર કોઈ અઘટિત બનાવ બને તેની રાહ જોઇ રહી છે? કેમ પીડિત પરિવારને મીડિયા સમક્ષ આવી પોતાના ન્યાય માટે રજૂઆત કરવી પડે છે. શું પોલીસ તેનું કામ ભૂલી ફરિયાદ લેવાને બદલે આવારા તત્વોને છાવરી રહી છે.  હાલ તો યુવકને સજા મળે તેની આશા પરિવાર રાખી રહ્યો છે. અને યુવકની ધમકીના ભયના ઓથાર હેઠળ ન્યાયની લડત ચલાવી રહ્યો છે.

યુવકની દાદાગીરી સી.સી.ટી.વી માં થઈ કેદ, પોલીસ તપાસ શરૂ
આખરે મામલાએ જોર પકડાતાં પોલીસે પીડિત પરિવારની ફરિયાદ નોંધી છે. રહી રહીને જાગેલી કડોદરા પોલીસે સી.સી.ટી.વી ફૂટેજના આધારે તપાસ હાથ કાર્યવાહી કરવાના દેખાડા કર્યા છે.. આવા આવારા તત્વોના આંતકને પોલીસ કેમ હેન્ડલ કરે છે અને પીડિત પરીવારને ન્યાય અને ભવિષ્યમાં સુરક્ષા આપે છે કે નહીં તે જોવું રહ્યું.