ભયાનક બ્લાસ્ટ / જોહાનિસબર્ગમાં જમીન નીચે એવો બ્લાસ્ટ થયો કે ગાડીઓ હવામાં ફંગોળાઇ, સામે આવ્યો ચોંકાવનારો Video

• દક્ષિણ આફ્રિકાના જોહાન્સબર્ગમાં ચોંકાવનારી ઘટના
• ઘટનામાં એક વ્યક્તિનું મૃત્યુ પણ થયાના સમાચાર
• 48 લોકો ઘાયલ થયા

દક્ષિણ આફ્રિકાના જોહાન્સબર્ગ શહેરમાં બુધવારે એક ચોંકાવનારી ઘટના સામે આવી. અહીં જમીનની અંદર જોરદાર વિસ્ફોટ થયો અને આખી સડક ઉખડી ગઇ હતી. ડામરનો રસ્તો ઉખડી જતાં ત્યાં મસમોટો ખાડો પડી ગયો હતો. વિસ્ફોટ દરમિયાન રસ્તા જપર ચાલી રહેલી કાર હવામાં ફુટબોલની જેમ ફંગોળાય હતી. આ ઘટનાનો વીડિયો સોશિયલ મીડિયા પર વાયરલ થઇ રહ્યો છે. માનવામાં આવી રહ્યું છે કે ગેસ પાઇપ લાઇનમાં વિસ્ફોટને કારણે આ દુર્ઘટના ઘટી. આ ઘટનામાં એક વ્યક્તિનું મૃત્યુ પણ થઇ ગયું છે અને 48 લોકો ઘાયલ થયા છે. 

ગેસ પાઇપલાઇન ક્ષતિગ્રસ્ત થવાનું માનવું

ઘટના જોહાન્સબર્ગના બ્રી સ્ટ્રીટ વિસ્તારની છે, અહીં રહસ્યમય વિસ્ફોટના કારણે અનેક કારને નુકશાન પહોંચ્યું છે. બ્લાસ્ટ કેમ થયો તેનું સચોટ કારણ હજુ જાણવા મળ્યું નથી પરંતુ અધિકારીઓનું માનવું છે કે જમીનની અંદરથી પસાર થઇ રહેલા ગેસ પાઇપલાઇન ક્ષતિગ્રસ્ત થવાને કારણે આ વિસ્ફોટ થયો હશે. હાલ ઘટનાની તપાસ ચાલી રહી છે.

સમગ્ર વિસ્તારની ઘેરાબંધી કરવામાં આવી

તો બીજી બાજુ સ્થાનિક ગેસ સપ્લાયરે સ્વીકાર્યું કે રસ્તા નીચેથી ગેસની પાઇપ લાઇન પસાર થાય છે અને તેમાં નાનું લીક પણ છે પરંતુ આ વિસ્ફોટ ગેસ પાઇપલાઇનના કારણે થઇ નથી.ઘટના બાદ સ્થાનિક તંત્રએ વિસ્ફોટ થયો ત્યાં જવાની મનાઇ કરી છે. પ્રભાવિત વિસ્તારોની વીજ પુરવઠો બંધ કરી દેવામાં આવ્યો છે અને સમગ્ર વિસ્તારની ઘેરાબંધી કરવામાં આવી છે.