તંત્રનું લૉજિક / રખડતાં ઢોરનો ત્રાસ દૂર કરવા તંત્રનો નવો નિર્ણય: કચરાની ટ્રૉલી જ રસ્તા પરથી હટાવી દેવાશે, જાણો શું છે કારણ

• રસ્તે રખડતા ઢોર મુદ્દે ગુજરાત હાઇકોર્ટમાં અરજીનો મામલો
• અમદાવાદ મ્ચુનિસિપલ કોર્પોરેશનનો મહત્વનો નિર્ણય
• શહેરમાંથી 97 જગ્યા પર કચરાની સિલ્વર ટ્રોલીને રોડ પરથી દૂર કરાશે

ગુજરાત હાઇકોર્ટમાં રખડતા ઢોર મુદ્દે અરજી કરવામાં આવી હતી. જે બાદ ગત ઓગસ્ટ મહિનામાં ગુજરાત સ્ટેટ લીગલ ઓથોરિટીને સર્વે કરવા માટે આદેશ આપવામાં આવ્યો હતો. આ સર્વે અનુસાર શહેરમાં આવેલી  97 જેટલી સિલ્વર ટ્રોલીઓના લોકેશન પર કચરાનો સ્પોટ હોવાના કારણે તે વિસ્તારમાં ગાય-ભેંસ જેવા પશુઓ વધુ ફરતા જોવા મળે છે. 

કચરાના કારણે પશુઓ રોડ પર આવતા હોવાનુ તારણ 
ગુજરાત સ્ટેટ લીગલ ઓથોરિટી દ્વારા આ સર્વેનો રિપોર્ટ રજૂ કરાયા બાદ  અમદાવાદ મ્યુનિસિપલ કોર્પોરેશન દ્વારા આ તમામ 97 જગ્યાએથી હવે સિલ્વર ટ્રોલીઓને હટાવવાનો નિર્ણય લેવામાં આવ્યો છે. શહેરના પૂર્વ ઝોનમાં 13, ઉત્તર પશ્ચિમ ઝોનમાં 4, મધ્ય ઝોનમાં 10, પશ્ચિમ ઝોનમાં 15, ઉત્તર ઝોનમાં 28, દક્ષિણ ઝોનમાં 19, દક્ષિણ પશ્ચિમમાં 8 એમ કુલ મળીને 97 સિલ્વર ટ્રોલીઓને હટાવવાનો નિર્ણય લેવામાં આવ્યો છે. 

ચાર સભ્યોની મોનિટરિંગ ટીમની રચના કરાઈ
આ ઉપરાંત ટ્રોલી હટાવ્યા બાદ લોકો કચરો ફેંકી ન જાય તે માટે સવારના 6થી રાતના 12 વાગ્યા સુધી સુપરવિઝનની વ્યવસ્થા ગોઠવવાનું પણ આયોજન કરાયું છે. આ 97 લોકેશન પર ઓબ્ઝર્વેશન માટે ચાર સભ્યોની મોનિટરિંગ ટીમની પણ રચના કરી દેવામાં આવી છે.