T20 World Cup / અમદાવાદીઓમાં ક્રિકેટનો જુસ્સો ચરમસીમાએ, T20 વર્લ્ડ કપ ફાઇનલ પહેલાં હોટલના ભાડા આસમાને

અમદાવાદ શહેરમાં ક્રિકેટનો જોરદાર માહોલ જોવા મળી રહ્યો છે. T20 વર્લ્ડ કપની ફાઇનલ મેચને લઇને દેશ-વિદેશમાંથી હજારો ક્રિકેટ પ્રેમીઓ શહેરમાં પહોંચી રહ્યા છે. મેચ પહેલા જ અમદાવાદની હોટલો લગભગ હાઉસફુલ બની ગઈ છે, જેના કારણે રૂમના ભાડામાં પણ નોંધપાત્ર વધારો થયો છે.

ક્રિકેટના આ મહામુકાબલાને નિહાળવા માટે ન્યૂઝીલેન્ડ સહિત વિવિધ દેશોમાંથી વિદેશી પર્યટકો અને NRI ક્રિકેટ પ્રેમીઓ અમદાવાદમાં ઉમટી પડ્યા છે. ઘણા ફેન્સે મેચની ટિકિટ મળતાની સાથે જ હોટલ બુકિંગ અગાઉથી કરી લીધું હતું. શહેરના મુખ્ય વિસ્તારોમાં આવેલી હોટલો અને ગેસ્ટહાઉસમાં રૂમ મેળવવો હવે મુશ્કેલ બની ગયો છે.

ક્રિકેટના આ ઉત્સાહનો લાભ લઇને અનેક હોટલ સંચાલકોએ રૂમના ભાડામાં 2થી 3 ટકાનો વધારો કર્યો છે. સામાન્ય દિવસોમાં મળતા રૂમના ભાડા કરતા હાલના દિવસોમાં ભાવ થોડા વધ્યા છે, છતાં ક્રિકેટ પ્રેમીઓ માટે આ વધારાનો ખર્ચ મોટો મુદ્દો બન્યો નથી.

વિદેશી પર્યટકોમાં પણ ફાઇનલ મેચને લઇને ભારે ક્રેઝ જોવા મળી રહ્યો છે. અમદાવાદના પર્યટન સ્થળો, રેસ્ટોરાં અને બજારોમાં પણ વિદેશી મહેમાનોની અવરજવર વધતા શહેરમાં આંતરરાષ્ટ્રીય માહોલ સર્જાયો છે.

આ પણ વાંચોઃ ઈન્દ્રનીલ રાજ્યગુરુના રામ-રામ, રાજકોટ મનપા ચૂંટણી પહેલા કોંગ્રેસને પડ્યો મોટો ફટકો

ફાઇનલ મેચના દિવસ નજીક આવતા અમદાવાદમાં ક્રિકેટનો ઉત્સાહ વધુ વધવાની સંભાવના છે. શહેરની હોટલો, પ્રવાસન ઉદ્યોગ અને સ્થાનિક વેપારીઓ માટે પણ આ મોટો અવસર સાબિત થઈ રહ્યો છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ