અકસ્માત / આણંદમાં હિટ એન્ડ રન: 2 વર્ષના બાળકને અડફેટે લેતા મોત, અકસ્માત સર્જી કાર ચાલક રફુચક્કર

• હિટ એન્ડ રનમાં 2 વર્ષીય બાળકનું મોત
• કારચાલકે બાળકને અડફેટે લેતા મોત 
• અકસ્માત કરીને કારચાલક ફરાર
• આણંદ પોલીસે તપાસ શરૂ કરી

ગુજરાતમાં રોડ અકસ્માતની ઘટનાઓ સતત વધી રહી છે. રોજબરોજ ક્યાંક ને ક્યાંક અકસ્માતમાં કોઇકના મોત થયાના સમાચાર સામે આવતા જ રહે છે. ત્યારે આજે આણંદમાંથી અકસ્માતનો બનાવ સામે આવ્યો છે. જેમાં 2 વર્ષના માસુમ બાળકનું મૃત્યુ નિપજ્યું છે. હાલ આણંદ પોલીસે કારચાલક સામે ગુનો નોંધી તપાસ હાથ ધરી છે.

કારચાલક અકસ્માત સર્જી ફરાર
મળતી માહિતી અનુસાર, આણંદ શહેરના સરદાર ગંજ વિસ્તારમાં આવેલી અલકાપુર સોસાયટીની સામે કાર ચાલકે 2 વર્ષીય માસુમ બાળકને અડફેટે લેતા દુર્ઘટના સર્જાઈ હતી. કારચાલકે બાળકને અડફેટે લેતા બાળકને ગંભીર ઇજાઓ પહોંચી હતી. આ અકસ્માતને પગલે લોકોનું ટોળું ઘટના સ્થળે એકઠું થઈ ગયું હતું. જોકે, કારચાલક અકસ્માત સર્જીને ઘટનાસ્થળેથી ફરાર થઈ ગયો હતો. 

હોસ્પિટલમાં સારવાર દરમિયાન બાળકનું મોત
જે બાદ ઈજાગ્રસ્ત બાળકને તાત્કાલિક સારવાર અર્થે હોસ્પિટલમાં ખસેડવામાં આવ્યું હતું. હોસ્પિટલમાં સારવાર દરમિયાન બાળકનું મોત નિપજ્યું છે. 2 વર્ષના બાળકના મોતથી પરિવાર શોકમાં ગરકાવ થઈ ગયો છે. આ અંગેની જાણ પોલીસને કરવામાં આવતા પોલીસની ટીમ પણ તાત્કાલિક હોસ્પિટલ ખાતે દોડી આવી છે. હાલ આણંદ પોલીસે અકસ્માત સર્જી ફરાર થનારા અજાણ્યા ચાલક વિરૂદ્ધ ગુનો નોંધી તેને ઝડપી પાડવાની કાર્યવાહી હાથ ધરી છે.

ઉનામાં દંપતીને ડમ્પરે મારી હતી ટક્કર
અત્રે ઉલ્લેખનીય છે કે, ગઈકાલે ઉનાના દેલવાડા રોડ પર અવર લોડ પથ્થર ભરેલાં ડમ્પરે બાઈક સવાર દંપતીને અડફેટે લીધું હતું. આ અકસ્માતમાં પત્નીનું ઘટનાસ્થળે જ કમકમાટીભર્યુ મોત નિપજ્યું હતું, જ્યારે પતિને ગંભીર ઈજા થતાં સારવાર અર્થે હોસ્પિટલ ખાતે ખસેડવામાં આવ્યા હતા.