પ્રશંસનીય કામ / 10મા ધોરણમાં 100 માર્ક્સ લાવનાર છોકરીની મદદે આવ્યાં હરિયાણાના CM, મહિને વીસ હજારની સ્કોલરશીપ આપી

• હરિયાણા સીએમ મનોહરલાલ ખટ્ટરનું પ્રશંસનીય કામ
• મહેન્દ્રગઢની 10મા ધોરણની છોકરીને મહિને વીસ હજારની સ્કોલરશીપ બાંધી આપી
• અંજલી યાદવ 10મા ધોરણમાં 100 માંથી 100 માર્ક્સ લાવી છે
• ખટ્ટરે અભિનંદન આપવા ફોન કર્યો ત્યારે અંજલિ આર્થિક કટોકટી કહી સંભળાવી
• મુખ્યમંત્રીએ તાત્કાલિક મદદ આપીને 20 હજારની સ્કોલરશીપ બાંધી આપી 

જેને ભણવું હોય છે તેને ક્યારેય પણ પૈસાની ખોટ પડતી નથી ગમે ત્યારે અને ગમે તે રીતે પૈસા આવી જતા હોય છે. માતા સરસ્વતીનો જ્યાં વાસ હોય ત્યાં સદા લક્ષ્મી દેવી આવી જતી હોય છે અને હરિયાણાના મહેન્દ્રગઢની 10મી વિદ્યાર્થીની અંજલી યાદવની સાથે પણ આવી જ એક ઘટના બની છે. અંજલી યાદવે તાજેતરના જાહેર થયેલા ધોરણ 10મા રિઝલ્ટમાં 100માંથી 100 માર્ક્સ મેળવ્યાં છે. અંજલીને આગળ બનીને ડોક્ટર બનવું છે પરંતુ તેના પરિવારની સ્થિતિ સારી નથી અને તેઓ માંડ કરીને પરિવારનું ગાડું ચલાવી રહ્યાં છે. ઘરની આવી આર્થિક હાલતમાં અંજલીને કેવી રીતે ભણાવવી તે તેની માતા માટે મોટો સવાલ થઈ પડયો. પરંતુ કહેવત છે ને કે જેની હૈયામાં હામ હોય તેનું ક્યારેય પણ અહિત થતું નથી. 

સીએમ ખટ્ટરે અંજલીને દર મહિને 20,000ની સ્કોલરશીપ બાંધી આપી 
માતા અને પુત્રીની આવી સ્થિતિની વચ્ચે એક દિવસ અચાનક તેમની પર હરિયાણાના સીએમ મનોહરલાલ ખટ્ટરનો ફોન આવ્યો. વાતવાતમાં અંજલીએ તેને આગળ ભણવું છે પરંતુ પરિવારની આર્થિક સ્થિતિ સારી નથી તેવું તેમને જણાવી દીધું. અંજલીને આવી વાત સાંભળીને ખટ્ટરને લાગી આવ્યું અને તેમણે તાત્કાલિક અંજલીને દર મહિને 20,000ની સ્કોલશીપ આપવાનું વચન આપી દીધું છે. ખટ્ટરની વાત સાંભળીને અંજલિના હર્ષનો પાર રહ્યો નહોતો અને તેને જાણે જિંદગીનું મોટું દુખ ટળી ગયું હોય તેવું અનુભવ્યું હતું. 

પરિવાર માથેથી આર્થિક સંકટ ટળ્યું 
અંજલિએ સિંધુ વેલી પબ્લિક સ્કૂલ, ડોંગરા, મહેન્દ્રગઢમાંથી અભ્યાસ કર્યો હતો. આ પરિવાર સિલારપુરમાં રહે છે. ખટ્ટરની આર્થિક મદદની જાહેરાત બાદ અંજલિની માતા ઉર્મિલાએ સીએમનો આભાર માન્યો હતો. તેમણે કહ્યું કે અંજલીએ  બહુ મહેનત કરી. તે હંમેશાં કહેતી હતી કે જો તે સફળતા મેળવશે, તો મેં જે મુશ્કેલીઓનો સામનો કરવો પડ્યો હતો તે હળવી થઈ જશે. હું હંમેશાં તેની સાથે ઉભી રહી છું અને તેને તેના અભ્યાસ પર ધ્યાન કેન્દ્રિત કરવાનું કહ્યું છે.