મોરચો / 'હું ડરીને ચૂપ નહીં બેસું..' ભાજપ ધારાસભ્ય હાર્દિક પટેલની પોસ્ટથી ખળભળાટ, કોને ઈશારો?

Hardik Patel : ભાજપના વિરમગામના ધારાસભ્ય હાર્દિક પટેલ ફરીવાર મેદાનમાં ઉતરવાની તૈયારી કરી રહ્યાં છે. પ્રાથમિક સુવિધાઓને લઈને તેમણે ચિંતા અને આક્રોશ સાથે મુખ્યમંત્રીને પત્ર લખ્યાની ઘટનાની શાહી સુકાઇ નથી ત્યાં ફરી એકવાર તેમની પોસ્ટનાં કારણે સમગ્ર ગુજરાતનાં રાજકારણમાં ગરમાવો આવી ગયો છે. અત્રે ઉલ્લેખનીય છે કે, અગાઉ પણ હાર્દિક પટેલે મુખ્યમંત્રીને પત્ર લખ્યો હતો. આ માત્ર પત્ર લખીને સીએમને મોકલવાનાં બદલે સોશિયલ મીડિયામાં શેર પણ કર્યો હતો. આ પત્રમાં વિરમગામમાં ઉભરાતી ગટરો અને ગંદા પાણીની સમસ્યા હલ કરવામાં નહી આવે તો ઉપવાસની ચિમકી પણ ઉચ્ચારવામાં આવી હતી.

હાર્દિકને મંત્રીપદથી વંચીત રખાયો હતો

દિવાળી સમયે થયેલા મંત્રીમંડળનાં વિસ્તરણમાં હાર્દિક પટેલને મંત્રીપદ મળે તેવી મહત્તમ શક્યતા હતા. જો કે આશ્ચર્યજનક રીતે હાર્દિક પટેલ અને સાથે સાથે જયેશ રાદડિયાનું પણ પત્તું કાપી નાખવામાં આવ્યું હતું. આ પ્રકારે સરકારે ફરી એકવાર હાર્દિક પટેલને કટ ટુ સાઇઝ કરી દીધો હતો. જેના કારણે બહારથી તો હાર્દિક પટેલે કાર્યકર્તા છું જે જવાબદારી મળે તે નિભાવીશનુ વાજું વગાડ્યું હતું પરંતુ અંદર ખાને તેને પણ ખુબ જ આઘાત લાગ્યો તે તેના ચહેરા પરથી સ્પષ્ટ છલકાતું હતું.

હાર્દિક પટેલે કાયદેસર બાંયો ચઢાવી

હવે હાર્દિક પટેલ ફરી એકવાર સરકાર વિરુદ્ધ બાંયો ચઢાવી છે. સરકાર અને તંત્ર માટે ખુબ જ સુચક પોસ્ટ કરી હતી. પોતાનાં સોશિયલ મીડિયા પર શેર કરતા હાર્દિક પટેલે લખ્યું કે, "વિરોધ ના કારણે હું ડરીને ચૂપ નહીં બેસું. સોશિયલ મીડિયા પર કોણ બદનામ કરે છે તેનાથી મને જરા પણ ફરક નથી પડતો. હું ઘણું સહન કરીને અહીં સુધી પહોંચ્યો છું. જેથી કોઇ કોમેન્ટ કરીને મને વિચલિત કરી શકે તેવું સમજતું હોય તો તેઓ ખોટા છે. બદનામીના ડરથી ક્રાંતિકારી ઘરમાં બેઠા હોત તો આજે આપણે અંગ્રેજોની ગુલામી કરતા હોત"

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ