- સાંસદ નવનીત રાણાના ગંભીર આરોપ
- સ્પીકર ઓમ બીરલાને લખ્યો પત્ર
- જેલમાં મારી પર કરાઈ જાતિવાચક ટીપ્પણી
- મને પાણી ન અપાયું, બાથરુમ પણ ન જવા દેવાઈ
મુંબઈમાં હનુમાન ચાલીસા વિવાદ કેસમાં ધરપકડ થયેલા અને હાલમાં ભાયખલા જેલમાં રહેલા અમરાવતીના અપક્ષ સાંસદ નવનીત રાણાએ લોકસભા સ્પીકર ઓમ બીરલાને પત્ર લખીને જેલ અધિકારીઓ પર ગંભીર આરોપ લગાવ્યાં છે. બીરલાને લખેલા પત્રમાં નવનીત રાણાએ કહ્યું કે હું નીચી જાતીની છું તેવું કહીને જેલ અધિકારીઓએ મને પાણી પણ પીવા દીધું નહોતું,
નવનીત રાણાએ સ્પીકરને લખેલા પત્રમાં શું લખ્યું ?
નવનીત રાણાએ પત્રમાં લખ્યું છે કે, મને 23મીએ પોલીસ સ્ટેશન લઇ જવામાં આવી હતી. 23 એપ્રિલના રોજ મારે આખી રાત પોલીસ સ્ટેશનમાં જ પસાર કરવી પડી હતી. રાત્રે ઘણી વખત પીવા માટે પાણી માગ્યું હતું, પરંતુ કોઈએ મને પાણી આપ્યું નહોતું. નવનીતે વધુમાં મોટો આક્ષેપ કરતાં કહ્યું હતું કે, ઘટનાસ્થળે હાજર પોલીસ સ્ટાફે કહ્યું હતું કે હું અનુસૂચિત જાતિની છું, તેથી તેઓ જે ગ્લાસમાં પાણી પીવે છે તે જ ગ્લાસમાં તેમને પાણી આપી નહીં શકે. મારો કહેવાનો અર્થ એ છે કે મારી જાતિને કારણે મને પીવા માટે પાણી પણ આપવામાં આવ્યું નહોતું. હું એ વાત પર ભાર મૂકવા માગું છું કે મારી જ્ઞાતિને કારણે મને મૂળભૂત માનવાધિકારોથી વંચિત રાખવામાં આવી હતી.
મને રાતે બાથરુમ પણ ન જવા દેવાઈ
નવનીત વધુમાં કહયું કે જેલમાં મારે રાત્રે મને બાથરુમ પણ જવા દેવાઈ નહોતી. પોલીસ સ્ટાફે મારી માગણી પર કોઈ ધ્યાન આપ્યું નહોતું. પછી મારી સાથે દુર્વ્યવહાર કરવામાં આવ્યો. એવું કહેવામાં આવ્યું હતું કે તેઓ (પોલીસ સ્ટાફ) નીચલી જાતિના લોકોને તેમના બાથરૂમનો ઉપયોગ કરવાની મંજૂરી આપતા નથી. નવનીતે લોકસભા અધ્યક્ષને લખેલા પત્રમાં કહ્યું કે ઉદ્ધવ ઠાકરેના નેતૃત્વવાળી શિવસેના સરકાર પોતાના હિંદુત્વના સિદ્ધાંતોથી સંપૂર્ણપણે ભટકી ગઈ છે. આ લોકો લોકોના વિશ્વાસને તોડવાનો પ્રયાસ કરી રહ્યા છે, જેના આધારે તેઓ સત્તામાં આવ્યા હતા.
હનુમાન ચાલીસાના પાઠની જાહેરાત કરીને મેં કંઈ ખોટું કર્યું નથી-નવનીત રાણા
પત્રમાં નવનીતે કહ્યું હતું કે, "મેં શિવસેનામાં હિન્દુત્વની જ્યોતને પુનર્જીવિત કરવાનો પ્રયાસ કર્યો હતો. એટલા માટે સીએમ ઉદ્ધવ ઠાકરેના નિવાસસ્થાને માતોશ્રીની બહાર હનુમાન ચાલીસાના પાઠની જાહેરાત કરી હતી. તેમાં કોઈની ધાર્મિક ભાવનાઓને ઠેસ પહોંચાડવાની કે તણાવ ભડકાવવાનું ક્યાંય આવતું નથી. મેં સીએમ ઉદ્ધવ ઠાકરેને હનુમાન ચાલીસાના પાઠમાં જોડાવા આમંત્રણ આપ્યું હતું. મારું આ પગલું મુખ્યમંત્રીની વિરુદ્ધ નહોતું. પરંતુ મારા પર આરોપ મૂકવામાં આવ્યો હતો કે મારા આ પગલાથી મુંબઈમાં કાયદો અને વ્યવસ્થાને ખતરો થઈ શકે છે. એ પછી મેં એમ પણ કહ્યું હતું કે હું સીએમના નિવાસસ્થાને નહીં જાઉં.
શું છે મામલો
મહારાષ્ટ્રમાં ચાલી રહેલી હનુમાન ચાલીસા અને લાઉડસ્પીકર વિવાદ વચ્ચે આજે ચર્ચામાં જો કોઇ એક ચહેરો સૌથી આગળ હોય તો તે છે અપક્ષ સાંસદ નવનીત રાણા. દક્ષિણ ભારતીય ફિલ્મોની પૂર્વ અભિનેત્રી અને સાંસદ નવનીત રાણાએ મુખ્યમંત્રી ઉદ્ધવ ઠાકરેના ઘરે હનુમાન ચાલીસાના પાઠની શું જાહેરાત કરી, શિવસૈનિકોમાં ભારે હોબાળો મચી ગયો હતો. જેને પગલે મહારાષ્ટ્ર પોલીસે અનેક કેસ નોંધીને સાંસદ નવનીત રાણા અને તેમના પતિ, ધારાસભ્ય રવિ રાણાની ધરપકડ કરીને જેલમાં મોકલી દીધા હતા. હવે નવનીત રાણાએ લોકસભા સ્પીકરને પત્ર લખીને ઉદ્ધવ સરકાર અને મહારાષ્ટ્ર પોલીસ પર અનેક આરોપ લગાવ્યા છે.
