ચોંકાવનારો કિસ્સો / જૂનાગઢમાં સર્વિસ સ્ટેશનમાં મૂકેલી 'સ્કોર્પિયો' ગુમ થઇ જતા મામલો પહોંચ્યો પોલીસ સ્ટેશન, અને પછી...!

Junagadh Scorpio Missing : જો તમે પણ તમારી કાર શોરૂમમાં સર્વિસ કરવા માટે આપો છો તો આ સમાચાર વાંચી લેજો. તાજેતરમાં જુનાગઢથી એક ચોંકાવનારો અને ચેતવણીજનક બનાવ સામે આવ્યો છે. માનો કે તમે કાર શોરૂમમાં સર્વિસ માટે મૂકી દીધી અને પછી તમને ખબર પડે કે તમારી કાર તો શોરૂમમાં નહીં પણ બીજે ક્યાંક ફરી રહી છે ? તો તમને ઝટકો તો લાગે જ ને. આવી જ એક ઘટના બની છે જુનાગઢમાં. વિગતો મુજબ જૂનાગઢ શહેરમાં એક ગ્રાહકે પોતાની 19 લાખ રૂપિયાની સ્કોર્પિયો કાર શોરૂમમાં સર્વિસ માટે મૂકી અને થોડા કલાકો બાદ કાર ગુમ થઇ ગઈ. જોકે હવે આ ઘટનાએ સમગ્ર શહેરમાં ચકચાર મચાવી છે અને ગ્રાહકોમાં ભયનું વાતાવરણ સર્જાયું છે.

જુનાગઢમાં પ્રતાપ આગટ નામના વ્યક્તિએ પોતાના મિત્રની સ્કોર્પિયો બપોરના 12 વાગ્યે શોરૂમમાં સર્વિસ માટે મૂકી હતી. જોકે દરેક ગ્રાહકની જેમ તેમણે પણ માની લીધું કે, ગાડી સુરક્ષિત છે અને પોતાના કામે લાગી ગયા. પરંતુ રાત્રે 9 વાગ્યે એક ફોન કોલ આવ્યો જે તેમની માટે આશ્ચર્યજનક રહ્યો હતો. બન્યું એવું કે, પ્રતાપ આગટના મિત્રએ તેમને કહ્યું કે, સ્કોર્પિયો કાર મેંદરડા નજીક રસ્તા પર ફરતી જોવા મળી છે. આ સાંભળીને પ્રતાપ આગટ તાત્કાલિક શોરૂમ પર પહોંચ્યા અને પછી જે જાણવા મળ્યું તે ખરેખર ચોંકાવનારું હતું.

શોરૂમમાં તો પહોંચ્યા પણ ગાડી ન મળી...

આ તરફ પ્રતાપ આગટ શોરૂમ પર તપાસ કરતાં તેમને ગાડી હાજર મળી નહોતી. જેથી તેમણે તાત્કાલિક શોરૂમના મેનેજરને બોલાવ્યા બાદ મેનેજરે સ્વીકારી લીધું કે, હા, ગાડી શોરૂમમાંથી કોઈ લઈ ગયું છે અને અમે પણ ફરિયાદ કરવાના પ્રયત્નમાં છીએ.

આ પણ વાંચો : ગુજરાતમાં આગામી સાત દિવસ વરસાદની આગાહી, માછીમારોને દરિયો ન ખેડવાની ચેતવણી

પોલીસ તપાસ શરૂ

આ તરફ પ્રતાપભાઈએ ગુસ્સો વ્યક્ત કરતાં જણાવ્યું, હવે તો ગાડી ચોરાઈ ગઈ છે. જો ગાડી સાથે કોઈ દુર્ઘટના થઈ હોય તો તેની જવાબદારી કોણ લેશે? હવે તો મને એ ગાડી જોઈએ જ નહીં! આ સાથે તેમણે શંકા વ્યક્ત કરી કે, સર્વિસ માટે મૂકી હોય તેવી ગાડી જો શોરૂમમાંથી સુરક્ષિત ન રહે તો ગ્રાહક કોના પર વિશ્વાસ કરે? આ સમગ્ર કેસમાં પીડિતે પોલીસ સ્ટેશન પહોંચીને ફરિયાદ નોંધાવાની પ્રક્રિયા હાથ ધરી છે. પોલીસ પણ સમગ્ર મામલાની ગંભીરતાથી તપાસ કરી રહી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ