HMPV Update / HMPV વાયરસ સામે લડવા ગુજરાતની હોસ્પિટલોનું તંત્ર સજ્જ, ચિંતા નહીં, સતર્ક રહેવું જરૂરી

ગાંધીનગર: ગુજરાતમાં HMPVનો એક્ટિવ કેસ આવતા તંત્ર સતર્ક થઈ ગયું છે. HMPV વાયરસ સામે રાજ્યની હોસ્પિટલોને સજ્જ કરવામાં આવી છે, ગાંધીનગર, વડોદરા, ભાવનગર સહિતના શહેરોની હોસ્પિટલોમાં વાયરસનો સામનો કરવા માટે તૈયારીઓ કરવામાં આવી રહી છે. ગાંધીનગર સિવિલ હોસ્પિટલમાં પણ ખાસ વોર્ડ તૈયાર કરવામાં આવ્યો છે. HMPV સંક્રમિત દર્દીઓ માટે આઈસોલેશન વોર્ડ તૈયાર કરી દેવામાં આવ્યો છે. 4 વોર્ડનો આઈસોલેશન વોર્ડ તરીકે ઉપયોગ થશે.

વડોદરાની SSG હોસ્પિટલ સજ્જ

રાજ્યમાં HMPV વાયરસનો કેસ નોંધાતા વડોદરા SSG હોસ્પિટલમાં પણ તૈયારીઓ શરૂ થઈ ગઈ છે. SSG હોસ્પિટલમાં એક અલાયદો વોર્ડ શરૂ કરવામાં આવ્યો છે, જેમાં 26 બેડની વ્યવસ્થા, ઓક્સિજન પ્લાન્ટ, ઓક્સિજન ટેંકની સુવિધા ઉભી કરવામાં આવી છે. વોર્ડમાં 160 બેડ ઓક્સિન્જ સુવિધા સાથે તૈયાર કરવામાં આવ્યા છે. સાથે જ પૂરતી દવા, ઓક્સિજન અને સ્ટાફની વ્યવસ્થા કરવામાં આવી છે. કોઈ પરિસ્થિતિ ઊભી થાય તો પહોંચી વળવા તૈયારીઓ કરવામાં આવી છે.

ભાવનગરમાં સિવિલ હોસ્પિટલનું તંત્ર એલર્ટ મોડ પર

ભાવનગરમાં પણ સિવિલ હોસ્પિટલનું તંત્ર HMPV વાયરસ સામે એલર્ટ મોડ પર આવી ગયું છે. ચિલ્ડ્રન વોર્ડની બાજુમાં 32 બેડ સાથે NRC વોર્ડ તૈયાર કરવામાં આવ્યો છે. NRC વોર્ડમાં 12 વેન્ટીલેટર સાથે 32 બેડની વ્યવસ્થા કરવામાં આવી છે. 20 બેડ પુખ્તવયના દર્દીઓ માટે અને 12 બેડ બાળકો માટે તૈયાર કરવામાં આવ્યા છે. સાથે જ ઓક્સિજન અને જરૂરી દવાઓ, ડોકટરનો સ્ટાફ સાથેની તૈયારી કરવામાં આવી છે.

રાજ્યમાં HMPVનો કેસ સામે આવતા સરકાર સતર્ક

ગુજરાતમાં HMPV નો એક્ટિવ કેસ આવતા સરકાર સતર્ક થઈ ગઈ છે. ગુજરાત સરકારે વિદેશથી આવનારા લોકો માટે એડવાઈઝરી જાહેર કરી છે. હોસ્પિટલોને RTPCR ટેસ્ટ કીટ ખરીદવા સૂચના પણ આપવામાં આવી છે. કેન્દ્ર સરકાર રાજ્ય સરકારને ગાઈડ લાઈન આપશે. તેમજ રાજ્ય સરકારે ટેસ્ટિંગ કીટ ખરીદવાની મંજૂરી આપી છે.

HMPV વાયરસના લક્ષણો

બાળકો અને વૃદ્ધો આ વાયરસથી સૌથી વધુ પ્રભાવિત થઈ શકે છે. આમાં, શ્વસન અને ફેફસાની નળીઓમાં ચેપ થાય છે, જેના કારણે ઉધરસ અને શ્વાસ લેવામાં તકલીફ થાય છે. આ સિવાય ગળામાં દુખાવો, માથાનો દુખાવો, ઉધરસ, તાવ, શરદી અને થાક પણ છે.

આ બાબતો ધ્યાનમાં રાખવી

• કોઈપણ સંક્રમિત વ્યક્તિથી દૂર રહેવું અથવા માસ્કનો ઉપયોગ કરવો.
• સાબુથી નિયમિતપણે હાથ ધોવા, ઉધરસ ખાતી વખતે કે છીંકતી વખતે રૂમાલથી મોં ઢાંકો.
• અન્ય લોકોથી દૂર જઇને ઉધરસ કે છીંક ખાઓ, ઉધરસ કે છીંક ખાતી વખતે મોં આડે હાથ રાખ્યો હોય તો હાથ તુરંત સેનેટાઇઝ કરો.

હ્યુમન મેટાન્યુમોવાયરસ (HMPV) વિશે જાણવા જેવી બાબતો

• હ્યુમન મેટાન્યુમો વાયરસ (HMPV) અન્ય શ્વસન વાયરસ જેવો જ વાયરસ છે.
• આ વાયરસની ઓળખ વર્ષ 2001માં થઈ હતી.
• આ વાયરસ શિયાળાની ઋતુ દરમિયાન ખાસ કરીને નાના બાળકો અને વૃદ્ધોમાં દેખાય છે અને તેના લક્ષણોમાં સામાન્ય શરદી અને ફલુનો સમાવેશ થાય છે.

મેટાન્યુમોવાયરસ (HMPV)ના લક્ષણો દેખાય તો શું કરવું (Do's)?

• જ્યારે ઉધરસ અથવા છીંક આવે ત્યારે મોઢું અને નાકને રૂમાલ અથવા ટિસ્યુથી ઢાંકવું.
• હાથ નિયમિત રીતે સાબુ અને પાણીથી ધોવાં કે સેનેટાઈઝરનો ઉપયોગ કરવો.
• ભીડભાડવાળા સ્થળોથી દૂ૨ રહેવું અને ફલૂથી પીડિત વ્યક્તિઓથી ઓછામાં ઓછું એક હાથનું અંતર રાખવું.
• તાવ, ઉધરસ કે છીંક આવે છે તો જાહેર સ્થળો પર જવાનું ટાળવું.
• વધુ પાણી પીવું અને પૌષ્ટિક ખોરાક ખાવો.
• પ્રબળ પ્રતિરોધક શક્તિ માટે પૂરતી ઊંઘ લેવી.
• બીમારીઓ ફેલાતી અટકાવવા માટે યોગ્ય વેન્ટિલેશનવાળા વાતાવરણમાં રહેવું.
• શ્વસનને લગતા લક્ષણો જણાય તો ઘરમાં જ રહેવું, બીજાઓ સાથે સંપર્ક મર્યાદિત કરવો અને તાત્કાલિક નજીકના સરકારી દવાખાનાનો સંપર્ક કરવો.

આ પણ વાંચો: HMPV વાયરસ મામલે અમદાવાદની આ હોસ્પિટલને તંત્રની નોટિસ, કહ્યું 'ખુલાસો કરવો પડશે

વાયરસ ન ફેલાય એ માટે શું કરવું?

• આવશ્યક ના હોય તો આંખ, નાક કે મોઢાને સ્પર્શ કરવો નહીં.
• સંક્રમિત વ્યક્તિએ વ્યક્તિગત ચીજવસ્તુઓ જેમ કે ટુવાલ, રૂમાલ અથવા અન્ય વાસણો બીજા વ્યક્તિના સંપર્કમાં કે ઉપયોગમાં ના આવે તેનું ધ્યાન રાખવું.
• જાતે દવા લેવાનું ટાળવું, લક્ષણોમાં વધારો દેખાય તો આરોગ્ય કર્મચારીનો સંપર્ક કરવો.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ