ગાંધીનગર / વિધાનસભા ગૃહમાં એવો કયો મુદ્દો ઉછળ્યો કે MLA જીજ્ઞેશ મેવાણીને હાંકી કઢાયા, જાણો વિગત

ગાંધીનગર: ગુજરાતના વિધાનસભાના ત્રણ દિવસીય સત્રના અંતિમ દિવસે ભારે હોબાળો થયો હતો. વડગામના ધારાસભ્ય જીગ્નેશ મેવાણીએ જસદણમાં બાળકી પર થયેલા બળાત્કારની વાત કરતા જ હોબાળો થયો. ધારાસભ્ય જીગ્નેશ મેવાણી વેલમાં આવી ગયા હતા. બંને પક્ષના ધારાસભ્યો, મંત્રીઓ પર પોતાની જગ્યા પર ઉભા થઈ ગયા હતા. એ પછી અધ્યક્ષે અમિત ચાવડાને જીગ્નેશ મેવાણીને બેસાડી દેવા કહ્યું. અધ્યક્ષે અમિત ચાવડાને એમ પણ પૂછ્યું કે જીગ્નેશ મેવાણી તમારું નથી માનતા. જીગ્નેશ મેવાણી ફરી જગ્યા પર ઊભા થતા ફરી હોબાળો થયો. ત્યારે અધ્યક્ષે જીગ્નેશ મેવાણીને કહ્યું કે તેઓ બંધારણનું અપમાન કરી રહ્યા છે. કાયદાનું પાલન નથી કરી રહ્યા. આ પછી જીગ્નેશ મેવાણીને ગૃહની બહાર કાઢી દેવામાં આવ્યા.

વિધાનસભામાંથી બહાર આવ્યા પછી જીગ્નેશ મેવાણીએ કહ્યું કે, થોડા દિવસ પહેલા રાજકોટ ગેમ જોનમાં નિર્દોષ લોકો હોમાયા હતા. તેમના પરિવારના સભ્યોએ રજૂઆત કરી હતી. આ કેસને ફાસ્ટ ટ્રેક કોર્ટમાં ચલાવવામાં આવેની રજૂઆત કરી હતી. જસદણની દીકરી પર બળાત્કાર અંગે ચર્ચા કરવામાં આવે એવી માંગ કરવામાં આવી હતી. રાજ્યના ગૃહ મંત્રી કેમ પીડિતોની વેદના સંભાળવા માંગતા નથી. આ સમગ્ર મામલે પણ ગૃહમાં ચર્ચા થવી જોઈએ અને તેનું લાઇવ ટેલિકાસ્ટ થવું જોઈએ એ માંગ હતી.

ત્યારે જીગ્નેશ મેવાણીના વલણ પર ધારાસભ્ય રમણલાલ વોરાએ કહ્યું કે જીગ્નેશ મેવાણી સદનમાં અને બહાર મીડિયાનું ધ્યાન દોરવા આવી પ્રવૃત્તિ કરે છે. જીગ્નેશ મેવાણી અને કોંગ્રેસને સ્નાન સૂતકનો સંબંધ નથી. જીગ્નેશ મેવાણી ગૃહમાં અને બહાર મીડિયાનું ધ્યાન દોરવા રાજકારણ કરે છે. તેમણે જીગ્નેશ મેવાણી પર બાબા સાહેબ આંબેડકરનું અપમાન કરવાનો આરોપ લગાવ્યો. તેમણે કહ્યું કે વેલમાં બે-બે વાર ધસી આવવું યોગ્ય નથી. બંધારણના નિયમ મુજબ જીગ્નેશ મેવાણી સામે પગલાં લેવા જોઈએ. જીગ્નેશ મેવાણી ગૃહ બહાર ઉશ્કેરણી જનક ભાષણ કરે છે તેવું વર્તન ગૃહમાં ના ચાલે.

આ પણ વાંચો: અરબી સમુદ્ર અને બંગાળની ખાડીમાં સિસ્ટમ સક્રિય, ગુજરાતમાં 7 દિવસ અતિભારે વરસાદની આગાહી

તો ધારાસભ્ય જીતુ વાઘાણીએ જીગ્નેશ મેવાણી પર આરોપ લગાવ્યા કે જીગ્નેશ મેવાણી મારામારી કરવા આવ્યા હોય તેવું વર્તન કર્યું છે. આ ઘટના ક્રમમાં કોંગ્રેસની માનસિકતા છતી થાય છે. કોંગ્રેસના નેતાઓએ જીગ્નેશ મેવાણીને રોક્યા નહીં. જીગ્નેશ મેવાણીએ ગૃહના અધ્યક્ષનું અપમાન કર્યાનો આરોપ પણ લગાવવામાં આવ્યો છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ