કાર્યવાહી / સુરતમાં મસમોટા GST કૌભાંડનો પર્દાફાશ, ભંગારના ધંધાના નામે સામે આવી 19 કરોડની કરચોરી

સુરત શહેરમાં એક મોટું GST કૌભાંડ બહાર આવ્યું છે. ડિરેક્ટોરેટ જનરલ ઓફ ગુડ્સ એન્ડ સર્વિસિઝ ટેક્સ ઇન્ટેલિજન્સ (DGGI)ની ટીમે 125 કરોડ રૂપિયાનું બનાવટી ટ્રાન્ઝેક્શન કરીને સરકારને 19 કરોડ રૂપિયાનું નુકસાન પહોંચાડનાર શખ્સને ઝડપી લીધો છે.

મુખ્ય આરોપી શેખ યુસુફ અબ્દુલ ગફુરએ એમ.એસ. સ્ક્રેપના ધંધાના નામે પેઢી ખોલી હતી અને ન્યૂ નાલબંધ ટ્રેડિંગ નામે પણ અલગ કંપની શરૂ કરી હતી. આ બંને કંપનીઓનો ઉપયોગ માત્ર બોગસ બિલિંગ માટે થતો હતો. આરોપીએ નકલી કંપનીઓના નામે ખોટા બિલ બનાવી GST ઇનપુટ ટેક્સ ક્રેડિટ (ITC) મેળવ્યો હતો.

સરકારને મોટો ચૂનો લગાવવામાં આવ્યો

તપાસ દરમિયાન જાણવા મળ્યું છે કે આરોપીએ 125 કરોડ રૂપિયાનું ખોટું ટ્રાન્ઝેક્શન દર્શાવી આશરે 19 કરોડ રૂપિયાની ઇનપુટ ટેક્સ ક્રેડિટ મેળવી લીધી હતી. આ રકમનો ઉપયોગ પછી અન્ય વ્યવહારોમાં કરી સરકારને મોટો ચૂનો લગાવવામાં આવ્યો હતો.

4 દિવસની જ્યુડીશીયલ કસ્ટડીમાં મોકલી દીધો

DGGIની ટીમે છાપા મારીને આરોપી યુસુફ અબ્દુલ ગફુરને ગોરાટ રોડ સ્થિત તેના આલિશાન ફ્લેટમાંથી ઝડપી લીધો હતો. આરોપી પાસે કરોડો રૂપિયાની મિલકત અને વૈભવી જીવનશૈલી હોવાનું પણ બહાર આવ્યું છે. આરોપીને કોર્ટમાં રજુ કરતા કોર્ટએ તેને 14 દિવસની જ્યુડીશીયલ કસ્ટડીમાં મોકલી દીધો છે. DGGIની ટીમ હવે આ કૌભાંડમાં સામેલ અન્ય શખ્સો અને નકલી કંપનીઓની પણ તપાસ કરી રહી છે.

આ પણ વાંચોઃ 6 લાખનો દંડ, PMJAYમાંથી પણ સસ્પેન્ડ, રાજ્યમાં ગેરરીતિ આચરનારી હોસ્પિટલો સહિત ડૉક્ટર વિરૂદ્ધ એક્શન

સુરતના ઉદ્યોગ જગતમાં આ કૌભાંડને કારણે ખળભળાટ મચી ગયો છે. કરચોરીના આ કેસે ફરી એકવાર બતાવ્યું છે કે બોગસ બિલિંગના માધ્યમથી કરચોરી કરનાર તત્વો સામે DGGI કડક પગલાં લઈ રહી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ