આનંદો / PM કિસાન સન્માન રાશિ વધીને થશે આટલી!, નવા વર્ષમાં ખેડૂતોને મોદી સરકાર આપી શકે છે ગુડ ન્યૂઝ, પાક નુકસાન માટે પણ આયોજન

• નાણાકીય વર્ષ 2024-25માં ખેડૂતોને મળશે ખુશખબર
• આવતાં બજેટમાં કૃષિ વ્યવસાય માટે સરકાર વધારી શકે છે બજેટ
• ખેડૂતોને મળતી આર્થિક સહાયતાની રકમમાં થશે વધારો

મોદી સરકાર આવનારા બજેટમાં ખેડૂતો માટે પોતાનો ખજાનો ખુલ્લો મૂકવાની તૈયારીમાં છે.  નાણાકીય વર્ષ 2024-25નાં બજેટમાં સરકાર ખેડૂતોને મોટો ફાયદો કરાવી શકે છે. કૃષિ મંત્રાલય સાથે જોડાયેલા અધિકારીએ કહ્યું કે ખેડૂતોની આવક વધવાની સાથે તેમને મળતી આર્થિક સહાયતાની રકમ પણ 1.5 ગણી વધી જશે.  સાથે જ પાક વીમા પૉલિસીનો લાભ પણ વધુને વધુ ખેડૂતો સુધી પહોંચાડવામાં આવશે. જો કે આ વાતની કોઈ ઓફિશિયલ જાહેરાત કરવામાં આવી નથી.

ખેડૂતો માટે મોટું બજેટ
મંત્રાલય સાથે જોડાયેલા અધિકારીઓએ જણાવ્યું કે સરકાર 2024-25નાં બજેટમાં કૃષિ ક્ષેત્ર માટે આશરે 2 લાખ કરોડ રૂપિયાની ફાળવણી કરી શકે છે. આ ફંડની મદદથી ખેડૂતોની આવક વધવાની સાથે સાથે પાક વીમા પૉલિસી પણ વધુને વધુ લોકોને મળશે. હાલનાં નાણાકીય વર્ષમાં જારી કરેલા બજેટથી આશરે 39% વધારે બજેટ 2024-25માં કૃષિ માટે ફાળવવામાં આવી શકે છે.

ખેડૂતોને સીધો ફાયદો
ખેડૂતોને મળતી વાર્ષિક આર્થિક મદદની રાશિ વધારવામાં આવશે. બજેટમાં ફાળવવામાં આવતી રાશિ બાદ ખેડૂતોને વાર્ષિક 6 હજારની જગ્યાએ 9 હજાર રૂપિયા મળશે. એટલે કે હવે ખેડૂતોને દર મહિને 500ની જગ્યાએ 750 રૂપિયા આપવામાં આવશે. હાલમાં PM કિસાન યોજના અંતર્ગત ખેડૂતોને વાર્ષિક 6000 રૂપિયા આપવામાં આવે છે. અત્રે ઉલ્લેખનીય છે કે ફેબ્રુઆરીમાં આ યોજનાને શરૂ થયે 5 વર્ષ થઈ જશે અને આવતાં પાંચ વર્ષ સુધી ખેડૂતોને મળતી આર્થિક મદદમાં આશરે 50%નો વધારો થઈ જશે.

પાક વીમા પૉલિસી પર લાભ
આ જ રીતે ખેડૂતોને પોતાના પાક માટે મળતા વીમાનાં પૈસાની રકમ પણ વધી જશે. પ્રધાનમંત્રી પાક વીમા યોજના કે જેની શરૂઆત 2016માં થઈ હતી, તેની અંતર્ગત ખેડૂતોને ખૂબ જ ઓછા પ્રિમિયમ પર પાકનો વીમો આપવામાં આવે છે. આ માટે ખેડૂતોને કુલ પ્રીમિયમની માત્ર 1.5%થી 5% રકમ જ આપવી પડે છે જ્યારે બાકીની રકમ સરકાર જમા કરે છે.