અમદાવાદ / અનૈતિક ધંધામાં રૂપિયા ઉઘરાવવાનો ઝઘડો, કરી નાખ્યું ખૂન, 5 મહિના પહેલાનો નગ્ન મર્ડર કેસ સોલ્વ, નીકળ્યું ચોંકાવનારું

• અમદાવાદના સરખેજમાં યુવકની હત્યા કરી દેવાતાં ચકચાર 
• સનાથલ બ્રિજ પાસે પૈસાની લેતીદેતી મામલે યુવકની હત્યા
• પોલીસે હત્યામાં સંડોવાયેલા ત્રણ આરોપીઓની ધરપકડ કરી, બે ફરાર

અમદાવાદના સરખેજ વિસ્તારમાં પાંચ માસ પહેલા થયેલી હત્યા ભેદ ઉકેલવામાં અમદાવાદ ક્રાઈમ બ્રાન્ચને સફળતાં મળી છે. સરખેજ પોલીસ સ્ટેશન હદ વિસ્તારમાં સનાથલ બ્રિજ પાસે એક વ્યક્તિને માર મારી નગ્ન હાલતમાં લાશ ફેંકી દેવામાં આવી હતી. જે મામલે સરખેજ પોલીસ સ્ટેશનમાં અજાણ્યા શખ્સોની વિરુદ્ધ હત્યાનો ગુનો નોંધાયો હતો. ઘટનાને પાંચ મહિના બાદ અંતે ક્રાઈમ બ્રાન્ચની ટીમે હ્યુમન ઇન્ટેલિજન્સ આધારે ત્રણ આરોપીને ઝડપી પડ્યા છે. ક્રાઇમ બ્રાન્ચની કસ્ટડી માં જોવા મળતા આરોપી અરવિંદ ઉર્ફે અન્નનો ઠાકોર, દિવ્યાશું ઉર્ફે દેવો ચૌહાણ, અને બેચર ઠાકોરએ પપ્પુ નિશાદ નામના યુવકની હત્યા કરીને મૃતદેહ નગ્ન અવસ્થામાં ફેંકી દીધો હતો.

 

પૈસા ઉઘરાવવા બાબતે થયો હતો ઝઘડો
પોલીસ તપાસમાં સામે આપ્યું છે કે મૃતક પપ્પુ નિશાદ અને આરોપીઓ વચ્ચે અનૈતિક ધંધા માટે પૈસા ઉઘરાવવાની બાબતે ઝઘડો થયો હતો. સરખેજના સનાથલ બ્રિજના છેડે યુવતીઓ ચોરી છુપેથી અનૈતિક વેપારની પ્રવૃત્તિઓ કરતી હતી. જેમાં ઝડપાયેલા 3 આરોપીઓ એમની પાસેથી  દેહ વેપારના ધંધામાં સરળતા રહે તે માટે નાણા ઉઘરાવતા. આ બાબતની જાણ પપ્પુને થતા તેને પણ દેહ વેપાર કરતી યુવતીઓ પાસે પૈસાની માંગણી કરી હતી. જેથી આરોપીઓ અને મૃતક વચ્ચે ઝઘડો થયો. 

પાંચ મહીના પહેલા સરખેજ સનાથળ બ્રીજ નજીક કાચા રસ્તા ઉપર શરીરે મુંઢ માર મારેલ નગ્ન હાલતમાં એક પુરુષની લાશ મળી આવેલ. જે પુરુષના શંકાસ્પદ મોત બાબતે સરખેજ પોલીસ સ્ટેશનમાં દાખલ કરવામાં આવેલ અનડીટેકટ મર્ડરના ગુન્હાનો ભેદ ઉકેલી ત્રણ આરોપીઓને ઝડપી પાડતી અમદાવાદ શહેર, ક્રાઈમ બ્રાન્ચ. pic.twitter.com/YVkHSzpFJX

— Ahmedabad Police અમદાવાદ પોલીસ (@AhmedabadPolice) September 30, 2023

પકડાયેલા આરોપીઓમાંથી બે આરોપીઓ ગુનાહિત પ્રવૃતિ સાથે સંકળાયેલા
23 એપ્રિલના રોજ રાત્રે આ બાબતની અદાવત રાખી ત્રણેય આરોપીઓએ પપ્પુને દંડાથી હુમલો કરીને મોતને ઘાટ ઉતારીને નગ્ન અવસ્થામાં મૃતદેહ ફેંકી દીધો હતો. મહત્વનું છે કે ઘટના સ્થળ પર સીસીટીવી અથવા તો કોઈ પણ પ્રકારના ગુનેગારો સુધી પહોંચી શકાય તેવી કડીઓ ન હતી.  જોકે ક્રાઈમ બ્રાન્ચની ટીમને પણ હ્યુમન ઇન્ટેલિજન્સની મદદથી વણ ઉકેલ્યા ગુનાનો ભેદ ઉકેલવામાં સફળતા મળી. પકડાયેલ આરોપી પૈકી અરવિંદ ઠાકોર અને બેચર ઠાકોર વિરુદ્ધ ચાંગોદર પોલીસ સ્ટેશન માં ગુનો નોંધાયો છે. 

હત્યા કેસમાં પાંચમાંથી ત્રણની ધરપકડ
આ હત્યા કેસમા પાંચ આરોપીની સંડોવણી ખુલી છે. ક્રાઇમ બ્રાન્ચે ત્રણ આરોપીની ધરપકડ કરી છે. જ્યારે હજુ બે આરોપી ફરાર છે. જીગર ચૌહાણ અને શભુ પરમાર નામના બન્ને આરોપી ની પોલીસે શોધખોળ શરૂ કરી છે.