સાચવજો! / વાવાઝોડું બન્યું વધુ આક્રમક: દરિયો થયો ગાંડોતૂર, 3 જિલ્લાઓમાં ઓરેન્જ એલર્ટ જાહેર, અતિભારે વરસાદની પણ આગાહી

• ગુજરાત પર બિપોરજોય વાવાઝોડાનો ખતરો
• દરિયામાં વાવાઝોડું વધી રહ્યું છે આગળ
• જખૌ નજીક ટકરાઈ શકે છે બિપોરજોય વાવાઝોડું
• વાવાઝોડાને પહોંચી વળવા તંત્ર સજ્જ

અરબી સમુદ્રમાં સક્રિય બિપોરજોય વાવાઝોડું વધુ આક્રમક બન્યું છે. વાવાઝોડું 8 કિલોમીટર પ્રતિ કલાકની સ્પીડથી આગળ વધી રહ્યું છે. વાવાઝોડાની અસરના કારણે સૌરાષ્ટ્રના દરિયાકાંઠે ભારે પવન ફૂંકાઇ રહ્યો છે. વાવાઝોડું નજીક આવતા દરિયો ગાંડોતૂર બન્યો છે. દરિયાકાંઠાના વિસ્તારોમાં ભારે પવન ફૂંકાઈ રહ્યો છે. ગુજરાત માટે આગામી 36 કલાક મહત્વના છે. વાવાઝોડાને લઈને ગુજરાતના બે જિલ્લામાં આજે રેડ એલર્ટ જાહેર કરવામાં આવ્યું છે. આજે કચ્છ અને દેવભૂમિ દ્વારકામાં રેડ એલર્ટ જાહેર કરવામાં આવ્યું છે. જેથી અહીં ભારેથી અતિ ભારે વરસાદ વરસી શકે છે.

ગુજરાતના 3 જિલ્લામાં ઓરેન્જ એલર્ટ જાહેર
જ્યારે મોરબી, જામનગર અને પોરબંદરમાં ઓરેન્જ એલર્ટ જાહેર કરવામાં આવ્યું છે. અહીં ભારે પવન સાથે વરસાદની આગાહી છે. તો રાજકોટ અને જૂનાગઢમાં યલો એલર્ટ જાહેર કરવામાં આવ્યું છે. મોરબી, જામનગર અને પોરબંદર આ 3 જિલ્લામાં તોફાની પવન સાથે ભારે વરસાદની આગાહી કરવામાં આવી છે. 

આવતીકાલે ગુજરાતના ત્રણ જિલ્લાઓમાં રેડ એલર્ટ
આગામી 15 જૂનના રોજ ગુજરાતના ત્રણ જિલ્લાઓમાં હવામાન વિભાગ દ્વારા રેડ એલર્ટ જાહેર કરવામાં આવ્યું છે. 15 જૂને કચ્છ, જામનગર અને દેવભૂમિ દ્વારકામાં રેડ એલર્ટ જાહેર કરવામાં આવ્યું છે. અહીં ભારેથી અતિ ભારે વરસાદ વરસી શકે છે. તો મોરબી, રાજકોટ, જૂનાગઢ અને પોરબંદરમાં ઓરેન્જ એલર્ટ જાહેરવામાં આવ્યું છે. તો 16 જૂને કચ્છ, મોરબી, પાટણ, મહેસાણા, બનાસકાંઠા અને સાબરકાંઠામાં વરસાદનું ઓરેન્જ એલર્ટ જાહેર કરવામાં આવ્યું છે. 

તમામ જિલ્લામાં વહીવટીતંત્ર એલર્ટ 
અરબી સમુદ્રમાં સક્રિય થયેલા શક્તિશાળી વાવાઝોડાએ હજુ પોતાની દિશા બદલી નથી. હજુ ગુજરાત તરફ જ આગળ વધી રહ્યું છે. હવામાન વિભાગની આગાહી મુજબ, આગામી 15 જૂને વાવાઝોડું ગુજરાતમાં ત્રાટકી શકે છે. જેથી ગુજરાતના દરિયાકાંઠાના તમામ જિલ્લામાં વહીવટીતંત્ર એલર્ટ બન્યું છે. 

આજની કેબિનેટની બેઠક રદ
ગુજરાત સરકારની દર બુધવારે ગાંધીનગર ખાતે કેબિનેટની બેઠક યોજાય છે. જેમાં કેટલાક વિષયો પર ચર્ચા કર્યા બાદ મહત્વના નિર્ણયો લેવામાં આવે છે. ત્યારે બિપોરજોય વાવાઝોડાને પગલે આજની કેબિનેટ બેઠક રદ કરવામાં આવી છે. મુખ્યમંત્રી ભૂપેન્દ્ર પટેલે તમામ મંત્રીઓને સોંપેલા જિલ્લામાં જ હાજર રહેવા માટે સૂચના આપી છે. આ ઉપરાંત અત્યારે સીએમ ભૂપેન્દ્ર પટેલની દરિયાકાંઠાના જિલ્લાઓના જિલ્લા કલેક્ટર સાથે બઠક ચાલી રહી છે. આ બેઠકમાં જિલ્લા વિકાસ અધિકારી, જિલ્લા પોલીસ વડાઓ અને મ્યુનિસિપલ કમિશનરો જોડાયા છે.